1 Nakaka kwana mabawiru ga mabuhi ga feza,

na pahala pa kugulula zahabu.

2 Wantu wabawa shuma mulitapaka,

na shaba ilumbuziwa kulawa mumabuhi ga shaba.

3 Wabawa migodi wajega lumiliku muluwindu,

walolalola utali wa litapaka

na kubawa mabuhi yagana madini muluwindu.

4 Muntu kabawa malindi kutali na pawalikala wantu,

patali na wantu na pahala yapafikikandiri,

wabawa madini watyeta pawatawalirwa ngoyi.

5 Kulawa mulitapaka shiboga shiwoneka,

kumbiti pasi pakuyi kila shintu wapantanga mabuhi kwa motu.

6 Mumabuwi gakuyi kwana mabuhi ga beyi nkulu ga rangi ya buluu,

na litapaka lyakuyi lyana livu lya zahabu.

7 Njira za kugenda kumigodi ayi kwahera mpongu yakaliya nyama yakayimana,

pota lisu lya kapungu halyeni woni njira ayi.

8 Wankanyama wa kuntundu wenezitimbi

pota simba hawenizipiti.

9 Wantu wabawanga matalabuwi makamala nentu,

wayibawa migongu na kuyiwusilira kutali.

10 Wapanta shemba pakati pa mabuwi,

na lisu lyakuyi lilola mabuhi ga beyi nkulu.

11 Kadiwa mbwiru nazinyililika,

na kulaviya vintu vyavilififiti.

12 Kumbiti luhala halupatikani koshi?

Na pahala gaa yapapatikana umani?

13 Kwahera muntu yakamana ukulu wa luhala,

pota luhala lupatikanindiri muisi ya wantu yawawera wakomu.

14 Pahala pa mashi matali patakula, kwahera luhala kwatwenga,

na bahali itakula, kwatwenga kwahera viraa.

15 Luhala luwezandiri kupatikana kwa zahabu iherepa pota kwa kupima mabuwi ga feza zivuwa.

16 Hapeni iwezi kupimirwa kwa zahabu yayilawa Ofiri,

pota kwa mabuwi ga beyi nkulu ga Saridoniki ama ga rangi ya samawiti,

17 Zahabu ama shiyowu vilinganilindiri navi.

Pota kugalambulwa na mabuwi ga zahabu iherepa.

18 Luhala lwana mana kuliku mabuwi ga yagashemwa tumbawe na rubi,

beyi yakuyi nkulu kuliku beyi ya lulu,

19 Mabuwi ga Topazi yagalawa kushi yayishemwa Esiyopiya hapeni iwezi kulifana nayi,

pota kuweza kupananwa beyi ya zahabu iherepa.

20 Su, luhala lulawa koshi?

Na umani uwoneka koshi?

21 Luhala lulififa mumasu mwa viwumbi vyoseri vikomu,

na wampongu wa kulyera hapeni wawezi kuyiwona. 22 Uhalibisiya na kuhowa vitakula,

tupikanira mininitira.

23 Mlungu ndo kayimana njira ya luhala,

kavimana pahala palupatikana.

24 Toziya yomberi kawona mpaka upeleru wa pasipanu,

kawona kila shintu pasi pampindi,

25 pakalipananiti liyega makakala gakuyi,

na kugapimira mashi mbaka zyakuyi,

26 na kalagalira mvula itowi koshi,

lumeta na mpanta vipiti koshi,

27 panu ndo pakawoniti mana ya luhala na kulubwera,

kalukagula na kulujimira na kuwona lufaa.

28 Shakapanu Mlungu kamgambira muntu.

Guloli! Kumpanana ligoya Mtuwa Mlungu ndo mwanjiru gwa luhala.

Na kulitula kutali na ukontola ndo umani.