1 Hashi guvimana vinjapuli walera shaka gaa,

ama guwona kala kulungu pakalera?

2 Hashi, gumana shaka shakapata yinda kanyama ayu?

Ama gushimana shaka shakuyi sha kulera?

3 Gushimana shaka shakusuntamala kulera,

ama shaka sha kulera wana wawu?

4 Wana wawu wakula kuntundu aku,

shakapanu wawaleka wamawu wawu na kugenda zawu.

5 Gaa yakamlekeziyiti punda gwa kuntundu?

Gaa yawayopoliti wagendi kwa wafira?

6 Neni niwapananiti shiwala shiweri pahala pakulikala,

shiwala shana munu kuwera pahala pawu pa pakulika.

7 Kalitula gweka nakamu na umatu wa miji,

kapikinirandiri umatu wa muntu yakamtendiziya lihengu.

8 Katyangatyanga kumigongu kupata maliwuziwu,

na kusakula shoseri shashiwera shiwisi su kaliyi.

9 Hashi, mbogu hakajimiri kumtendera lihengu?

Ama hakajimili kugonja mlizizi?

10 Hashi, guweza kumtawa mbogu lugoyi kulima lirambu?

Ama kukwega ligembi lya kulimira? 11 Hashi, hagumtumbiri toziya kana makakala gavuwa?

Na kumleka kakutenderi mahengu gaku gazotopa?

12 Hashi gulihola mbogu kaweza kukujegera mabenu gaku,

na kujega viboga pahala pa kukomera?

13 Mbuni kakomangakomanga mbapatiru zakuyi kwa malingu,

kumbiti hapenikawezi kuguluka gambira mzingi.

14 Mbuni kagaleka maligi gakuyi mulitapaka,

su gapati lihemuhemu mumhanga,

15 Kumbiti kavimanandiri kuwera gaweza kutimbangwa,

ama kumegangwa na nkanyama gwa kuntundu.

16 Mbuni kawonera ndiri lusungu wana wakuyi gambira wakuyindiri,

ata lihengu lyakuyi palihalibika yomberi kahera lyoga,

17 Toziya nimtenditi kalyaluwi luhala lwakuyi,

pota kumpanana seemu yoseri ya mahala.

18 Kumbiti pakanja kutuga,

kamseka farasi na yakakwena farasi.

19 Hashi, gwenga Ayubu ndo yagumpananiti farasi makakala,

ama guwavalasiya mibahira mitalipa musingu zawu?

20 Hashi, gwenga ndo yagumtenda farasi kaguruki gambira wanjombi?

Mliru gwakuyi ndo gwakulikangasha!

21 Kakwandakwanda litapaka kululalanda kalongolakalongo,

katugira munkondu kwa makakala gakuyi goseri.

22 Farasi kaliseka lyoga na katikinyikandiri,

pota ligumba hapeni limwuziyi kumbeli.

23 Vintu vya kulikomangira vyawatola wakwena farasi,

vilibonda kwa liziwu na kung'ereng'eta kumshenji.

24 Farasi kendereya kulongolu, pakalendemela kwa maya,

lipenga palilira, yomberi kagolokandiri.

25 Kila paligombwa lipenga, yomberi kalaviya liziwu,

kayipikinira nunkila ya nkondu kulawa kutali,

kapikanira nkinta ya wakulu wa mashonta.

Pakawalagalira kwa umatu.

26 Hashi, shimbowi kalifunda kwagwenga ntambu ya kuguluka,

na kutalipisiya mbapatiru zakuyi kugenda kusika?

27 Hashi, kapungu kaguluka kwa lagalira ya gwenga,

na kunyawa shitukulu shakuyi palugongu?

28 Kapungu kanyawa pakulikala pampindi pa matalabuwi matali,

na usongoka wa matalawu ndo maboma gakuyi.

29 Kulawa aku kalotera mawinga,

masu gakuyi gawona kulawa kutali.

30 Wanawakuyi wayonga mwazi.

Palii pashiwera shibudu ndo na ntapu kawera.