1 Shakapanu Elihu kendereya kutakula.

2 Mpikaniri visoweru vyangu, mwenga wantu yamwana luhala,

mpikaniri weri, mwenga yamwana umani.

3 Gumana unoga wa shiboga pagushilawalira

su mfiruwa kuvimana weri visoweru vyaneni.

4 Tulisyaguliri twaweni yagafiruwa,

tulijimiri twaweni kwa pamuhera yagawera maheri.

5 Su Ayubu kalonga. Neni nahera likosa,

Mlungu kambusilira shanfiruwitwi kupata.

6 Tembera nahera likosa moneka kuwera nampayu,

ntabika na sambira howa.

7 Gaa yakawera gambira Ayubu,

kwakuyi kubeziya ndo gambira kulanda mashi? 8 Kalikola nawatenda makontola

katyanga na wantu wakontola.

9 Mana katakula, muntu kapatandiri mota yoseri,

paligaziya kumfiriziya Mlungu.

10 Su mumpikaniri neni, mwenga wantu yamwana umani.

Mlungu kawezandiri kutenda ukontola,

Mlungu Yakana Likakala kaweza ndiri nakamu kutenda likosa.

11 Mlungu kamwuzilira muntu kulawirana na lyakatenditi,

hakamlipi kulinganira na ntambu yakalikala.

12 Nakaka, Mlungu katendandiri ukontola.

Mlungu Yakana Likakala kagalamburandiri toza yakuyi kwa wantu.

13 Kwana yoseri yakampanana ukulu pasipanu?

Uwezu wakuyi pasipanu ndo wakuyi gweka yakuyi.

14 Handa iwera Mlungu mekaliholeri ulamweni hera,

pakawusiya pumula yakuyi pasipanu,

15 viwumbi vyoseri mevihowi nakamu,

na muntu mekawuyi mulitapaka.

16 Handa gwana mahala gumpikanili,

Ayubu gupikinili shanikugambira.

17 Hashi, yakakalalira yaganfiriziya Mlungu kaweza kukolamlima pasipanu?

Hashi hagumtozi muntu yakamfiliziya Mlungu na yakana makakala?

18 Mlungu kamgambira mfalumi, gwenga gudoda

na wakolamlima, mwenga mwa wakontola!

19 Yomberi kalikolandiri na wakulu,

ama walunda kuliku wahushu,

mana woseri awa ndo lihengu lya mawoku gakuyi.

20 Wantu awa wahowa vumu,

watikiziwa pashiru na kuhowa,

na yawana makakala wawusiwa kutali pota kutendera makakala ga wantu.

21 Mlungu kalola yawagatenda mashaka goseri,

yomberi kagawona mirandu yawayitenda.

22 Kwahera utitu pota luwindu dunyu,

weni yawatenda ukontola waweza kulififa.

23 Mlungu kafirandiri kumgambira muntu,

shaka sha kumjega su kamtozi.

24 Kawalaga yawana makakala pota kulolalola,

na kuwatula wamonga pahala pawu.

25 Toziya kagamana matendu gawu goseri,

kawawusiya makakala gawu pashiru na kuwalaga.

26 Kawakomanga paweru

toziya ya ukontola wawu,

27 Toziya waleka kumfata yomberi,

wazisherandiri njira zakuyi zoseri.

28 Ata kawatenda wahushu wamliri Mlungu,

Na yomberi Mlungu kapikanira kulira kwawu yawatabika.

29 Mlungu pakanyamala, gaa yakaweza kumlawumu?

Pakalififa mweni, gaa yakaweza kumwona?

30 Katenda hangu, su muntu mdoda nakakolamlima,

ama walii yawajegela wantu ntabiku.

31 Handa muntu kamgambira Mlungu,

Nkosa, hapeni ntendi kayi vidoda.

32 Gunanguziyi makosa ganwezandiri kugawona

payiwera ntenda madoda, hapeni mbuyiri kayi.

33 Hashi, Mlungu hakafiruwi kumkomanga muntu ayu ntambu yagufira gwenga?

Gwenga ndo yagwamuwa, neni ndiri.

Su, gutakuli shagulihola gwenga.

34 Yawana luhala hawajimilani na shantakula,

na pawapikanira visoweru vyaneni hawatakuli,

35 Ayubu katakula gambira mzigizigi,

visoweru vyakuyi vyahera mana.

36 Ayubu mekalolwilolwi mpaka upeleru,

toziya kankula gambira wantu wakontola.

37 Kwa vidoda vyaku gongera ugalambuka,

na kulongolu kwa woseri twenga gumjongera Mlungu.