1 Shakapanu Ayubu kankula:

2 Nakaka, mwenga ndo wantu wa luhala.

Luhala haluperi shaka shilii pamhowa.

3 Neni nivimana gambira mwenga.

Ata neni nana mahala handa mwenga.

Goseri gamtakuliti kila muntu kagamana.

4 Waganja waneni wankunseka,

neni nimluwiti Mlungu na kanankula,

neni nana haki na kutakulwa shidoda,

wera muntu gwa kusekwa na wantu

5 Yomberi yakikuta kawaholerandiri wana njala,

kwa walii yawawera na shiwembu wawera na ntabiku nentu.

6 Kumbiti wapoka walitenda kuwera wana ponga.

Yawamsoziya Mlungu waliwona waponeka,

makakala gawu ndo wamlungu wawu.

7 Kumbiti guwakosiyi wankanyama na womberi hawakufundi,

guwakosiyi wampongu na womberi hawakugambili,

8 Ama guyikosiyi isi yeni hayikufundi,

guzumbi na wasomba wa muhabari naweni hawakugambili.

9 Gaa pakati pa viwumbi avi,

yakavimanandiri kuwera Mtuwa Mlungu katenda aga?

10 Ukomu wa kila shiwumbi wa mumawoku mwakuyi,

ntambu iraa na pumla ya ukomu wa muntu.

11 Hashi, likutu lipimandiri visoweru

gambira lulimi ntambu yalulawilira shiboga?

12 Wazewi wana luhala,

na walii yawalikaliti shaka shitangala wana luhala.

13 Kumbiti luhala na uwezu ndo vya Mlungu,

yomberi kana mahala na umani.

14 Mlungu pakabomola, kwahera yakaweza kunyawa kayi,

pakamtawa muntu, kwahera yakaweza kumyopola.

15 Handa Mlungu pakalewelera mvula, isi iyuma,

pakayivugulira, isi ipata malawa.

16 Yomberi kana makakala na luhala,

yawapayilwa na wazyanga woseri ndo wakuyi.

17 Kawatenda watakuziya wawoni soni,

kawatenda walonguziya kuwera wazyigizyigi.

18 Kawawusilira wafalumi ukolamlima wawu,

na kuwatenda wamanda.

19 Kawatenda watambika wawoni soni,

na kuwagusiya wana makakala.

20 Kawapoka watakuziya uwezu wa kuyowera,

kawusiya luhala kwa wazewi.

21 Kawatenda wakolamlima waweri na soni,

na kuwawusilira wana uwezu makakala gawu.

22 Kawalanguziya wantu vintu vyaviweriti kubada

na kugajega kuweru yagaweriti kuluwindu.

23 Kawatenda wantu wa isi waweri na makakala,

shakapanu kawalaga.

24 Kawawusilira walonguziya umani wawu,

kawatenda wayeriyeri kushiwala pahera njira,

25 Wajera kutyanga mluwindu pahala yapahera kulangala,

na kuwatenda wawegukiweguki gambira walowera.