1 Elihu kendeleya kulonga,

2 Muheperi shididini, neni hanikulangaziyi shintu,

mana nanashi sha kutakula shirawa kwa Mlungu.

3 Hanjegi luhala lwangu kulawa kutali nentu,

na kulanguziya kuwera Muwumba gwangu ndo mwaminika

4 Nakaka visoweru vyangu vyampayundiri,

yakana mahala kapamuhera na gwenga.

5 Mlungu kana makakala,

pota kambezandiri muntu yoseri,

uwezu wa mahala gakuyi ndo mkulu nentu.

6 Kawalekandiri wakontola wendereyi kulikala,

kumbiti kawapanana yawapunjwa haki zawu.

7 Kawalekandiri kuwalolera wantu waminika,

na womberi kawatula wakolimlima na kukwiswa,

8 Kumbiti handa wantu watawalirwa minyololu,

watenduwa kwa galii gawatenda,

9 Mlungu kawalanguziya matendu gawu makontola,

na handa womberi ndo wantu yawawera na mtiti.

10 Kawavugula makutu wapikaniri mafundu,

na kawalagalira wawuyi na kuleka ukontola.

11 Handa pawamjimira Mlungu na kumtendera,

wanampatiru mumashaka gawu goseri, vinja vyawu vyoseri hawaweri na mpatiru.

12 Kumbiti pawamjimirandiri Mlungu, hawahowi,

na hawahowi pota kuvimana vyaviwera teratera.

13 Yawamguwirandiri Mlungu wafira kukalala,

wamlilirandiri utanga pakawatawa.

14 Wahowa pawawera wantemba,

na upeleru wa makaliru gawu ndo soni.

15 Kumbiti Mlungu kawalopola yawatabika,

katendela ntabiku yawu kuwafunda su wammani yomberi ndo gaa.

16 Mlungu kakukwegiti kakulaviya muntabika,

kakutuli pahala pakulu papahera ntabiku,

na pameza paku kakutandira viboga viherepa.

17 Kumbiti vinu gutozwa ntambu yayifiliziwa,

toza yayifiriziwa ikupata.

18 Guliloleri, makomangu nayiza kukutenda gujongeri,

ama kulihola uvuwa wa lunda hawukulopoli.

19 Hashi, ulunga waku hawukutangi muntabiku,

ama makakala gaku goseri hagakutangi?

20 Nagufira nentu pashiru pizi,

peni pawatenda wantu wagamiri pawawera.

21 Guliloleri, naguwugalambukira ukontola,

mana ntabiku ikutura kutali na ukontola.

22 Guholi ukulu wa makakala ga Mlungu,

Gaa yakaweza kumfunda gambira yomberi?

23 Kwahera yakaweza kumpangira njira yakuyi.

Ama kumgambira Mungu gukoseya.

24 Nagulyaluwa kugazyuma matendu gakuyi,

geni wantu wagafyapilira.

25 Wantu woseri wayiwona mirandu yakatenditi Mlungu,

wantu wawona matendu gakuyi kulawa kutali.

26 Mlungu ndo mkulu nentu ata tuwezandiri kummana,

mashaka ga makaliru gakuyi galolwalolwandiri.

27 Yomberi kagatola mashi ga bahari kwakuyi,

na kulawa mawundi katenda mandonda ga mvula.

28 Kagatenda mawundi gatowi mvula,

na kuwatowera wantu kwa uvuwa.

29 Gaa yakavimana mawundi ntambu yagaliyalikwa,

ama lupanda yaluguguma kuliyera kwakuyi.

30 Yomberi kayalika lumeta lwakuyi kuliyera,

na kugagubika matiwa ga bahari luwindu.

31 Kwa mvula kawaliyiziya wantu na kuwapanana shiboga shivuwa.

32 Kabata lumeta kwa mawoku gakuyi,

shakapanu kankuguma nawu pahala pakafira,

33 Liyega lubwera kwiza kwakuyi Mlungu,

ata wankanyama wavimana kuwera kankwiza.