1 Ayubu gushemi guloli pagwana yakakwakula.

Ndo gaa pakati pa malaika hakizi kukutanga?

2 Kutula utama mumoyu kumlaga mzigizyigi,

na weya umlaga mpungasesi.

3 Neni namweni nimwona mzigizyigi kawera na mpatiru,

kumbiti vumu mpangilu zihalibisiya numba zakuyi.

4 Wana wakuyi wahera uponera,

wasinda kumahakama na kwahera wantu wa kuwateteya.

5 Viboga vyakuyi waliya yawana njala,

ata viboga yavimeriti pakati pa misontu,

Yawanamatamata wawufira nentu ulunda wakuyi.

6 Toziya ntabiku yizandiri kulawa muudongu,

pota ntabiku itomolandiri kulawa mulitapaka

7 Kumbiti muntu kiwuka katabiki,

ndo handa nsesi za motu yaziguluka kugenda kunani.

8 Handa meweri gwenga menimluwi Mlungu kantangi,

menimgambili yomberi ntabiku yangu.

9 Yomberi katenda mirandu mikulu yayimanikandiri,

na makangashu yagawezandiri kuwalangika.

10 Kayitowera mvula isi,

kankujega mashi mumalambu

11 Kawanyasula panani yawalisulisiya,

na yawadaya wapananwa nemeru.

12 Kayimeganga mipangu ya wanampayu,

matendu gawu nagawera na mpatiru.

13 Kawabata yawana luhala mumahala gawu,

mipangu yawapayira kayiyasila kutali.

14 Womberi wawona luwindu shaka sha paluwala, wapapasiya paluwala gambira pashiru

15 Kumbiti Mlungu kankuwalopola wahushu nawalagwa,

nakuwawusiya kulawa muwantu yawana likakala.

16 Su kawapanana wahushu litumbiru,

na ukontola umalirwa.

17 Katekelerwa muntu yulii Mlungu yakamkomanga!

Su nagulema makomangu ga Mtuwa Mlungu Yakana makakala.

18 Mana yomberi katenda na viraa kalwaziya,

kakweshula na kwa liwoku lyakuyi kaponiziya.

19 Handa payiwera matabisiya gakwizila mala sita hakalopoli, kwahela mlandu mdoda gwanakupati ata pagukwizira mala zivuwa.

20 Shaka sha njala hakakulopoli na kuhowa,

munkondu nkulu hakakulopoli.

21 Wantu pawakwigilanga hakakuloleri,

pota kutira ntabiku payiza.

22 Shaka sha ntabiku na njala paviza, haguseki,

pota kutira wankanyama wakalipa wa isi.

23 Mabuwi ga kumalambu hapeni gakuleweleri kulima,

pota wankanyama wakalipa hapeni wakukangali.

24 Haguweri na ponga munumba mwaku,

na mifugu yaku yoseri hayiweri palaa,

25 Haguwoni viraa wiwuka waku hawaweli wavuwa,

wavuwa gambira mihamba muisi.

26 Haguhowi paguwera mzewi nentu,

gambira nganu yayikamaliti.

27 Su mirandu ayi tuyilola, ndo nakaka,

hangu guyipikinili mana hayikutangi.