1 Shakapanu Ayubu kankula.

2 Leru viraa lilalamiku lyangu ndo likalipa.

Mpata utama na kukwinkinika toziya Mlungu kendeleya kunkomanga na kuntenda ntabiki.

3 Menivimani pahala pakumpata Mlungu!

Mewezi kugenda pakwegera na yomberi.

4 Menjegi visoweru vyangu kulongolu kwakuyi,

na kumgambira kila shintu yashiwera mumoyu gwangu.

5 Mewezi kuvimana shakafira kunankula,

na kuvimana shakafira kung’ambira.

6 Hashi, Mlungu mekasingani na neni kwa makakala gakuyi goseri?

Nakaka, mekampikaniri.

7 Yomberi kaweza kuyowera na muntu mwaminika,

Mlungu mtoza gwangu mekamuwi handa nahera makosa mashaka goseri.

8 Guloli, ng’enda kwagulawa mshenji, kumbiti nimpatandiri,

mbuya kwaguzyeta mshenji, kumbiti nsinda kumwona.

9 Nimsakula uwega wa kushana kumbiti nimwonandiri,

ng’alambukira kusika viraa, kumbiti nimwonitindiri.

10 Kumbiti yomberi kavimana kwang’endera,

pakamalira kunankula haweri herepa gambira zahabu.

11 Nfata lwayu lwakuyi kwa waminika,

njira yakuyi niyikolera pota kugalambuka.

12 Ndekandiri kuzikola lagiru zyakuyi,

ila nivifira visoweru vyakuyi.

13 Kumbiti yomberi kagalambukandiri, gaa yakaweza kumgalambula?

Lyakalifira, ndo lyakalitenda!

14 Hakamaniziyi goseri gakampangiriti,

na gavuwa gambira aga ga mumahala mwakuyi.

15 Hangu, nendemera kwa lyoga kulongolu kwakuyi,

ata paniliholera goseri aga neni nana lyoga.

16 Mlungu kagutenda moyu gwangu guperuwi makakala kwa kutira,

Mlungu yakana makakala kantulira lyoga. 17 Toziya ya ntabiku yangu yoseri, niliwona kuwera namuluwindu dunyu, luwindu luwoneka kunkubikira neni.

Kumbiti hapenintiri kuyowera.