Ezequiel 16

Yerusalem, Onukwale Ɔtanle

1 Ni di SAATE nwu ɔlaa lawa kuatɛɛ alɛ: 2 "Otii obi, ta Yerusalem atofo ku ayududusaa nɔɔ sɛsaabla nwu, 3 faatɔkɔ nwɔ falɛ, ‘Nnya ɔlaa wɔ di SAATE Kplɛ nwu kobuɛ antɔkɔ ni Yerusalem alɛ: Kafa lɛfɔ ku lɛba le baalofo fɔ ni lawɛ di Kanaan batii kasɔ suoto; teefɔ lale Amori otii, yaafɔ kafɔɔ lale Heti otii. 4 Di dii le baalofo fɔ nii, batabudi sɛkɔɔ lɛfɔ ee bakpeesa fɔ ntu alɛ faabla klekle, ee bafifia fɔ mmba ee bamiminisa fɔ di abula kamɛ. 5 Kuonwii ditanyu fɔ di sɛnyaami ɔnya kamɛ ee kafutu kanyinyii nwɔ alɛ aabla asaa ya mmle kuninwii anta fɔ. Kafɔɔ, lepoo kamɛ baafuki fɔ baakpee, diekye baanyu fɔ nyakatãa di dii le baalofo fɔ nii.

6 " ‘Ninfɛ lawaalɛ fɔ lafe, ni lanya fɔ faatɔɔpɛ faatoomunu di ntɔ lɛfɔ kamɛ nɛ. Ni latɔkɔ fɔ di obe wɔ faate ni di ntɔ lɛfɔ kamɛ nlɛ, "Wɛ nkpa!" 7 Lata fɔ faamuɔ fɛle lepoo kamɛ kowoso. Faataka disi, faamuɔ, ni faabakple anyɛnɛ ya nikɔtɛ anlɛ onyu anlenkee ni nɛ. Faatika anyɛɛ, sinwini layie fɔ, afɔ wɔ niasiɛ ni lɛkyɔtɔ, faate ni ototoole.

8 " ‘Sɛmaa lawaalɛ fɔ lafe, di obe wɔ latɛ anu lanyu fɔ nii, lanya nlɛ fatoowo fɛɛta ni kɔsa ɔyɔ, ni lablɛfɛsa akpeele nii latika di suoto lɛfɔ latĩi fɔ lɛkyɔtɔ nɛ. Laka ntam nii lata fɔ osie kanya, ni labla kafɔɔ kanya ninii ku afɔ, ni faabakple ole mi nɛ, SAATE Kplɛ nwu niebuɛ.

9 " ‘Lakpeesa fɔ ntu, lafoto ntɔ di suoto lɛfɔ, ni lafifia fɔ nnɔnyi nɛ. 10 Lanyukũsa fɔ dibula le beeloso ni ku sikũ ateate, layɔ bɔkɛɛ kukũ ntokota lakpee fɔ. Lakpee fɔ akpeele biene fɛnɛnɛɛ fututu, ni layɔ kafɔɔ akpeele ya niafũ ni kɔya latĩi fɔ nɛ. 11 Layɔ anyɛnɛ laklɛɛ fɔ: Lakpee fɔ nkɔnĩi di nnɛɛtũ, lakpee fɔ kafɔɔ anyɛnɛ di siimu lɛfɔ. 12 Ni layɔ lɛkɔnii lakpee fɔ di onwu, lasaka fɔ atokosakasaa di atoko lɛfɔ, layɔ kafɔɔ lɛkakoto le nikɔlɛ ni onyu latukũsa fɔ di disi nɛ. 13 Nkpo baaklɛɛ fɔ ku koto sɛɛle ku koto fututu nɛ; abula lɛfɔ lale abiene fɛnɛnɛɛ fututu ku n-ya niafũ ni kɔya ku dibula le baayɔ sikũ baaloso nii. Alesaa lɛfɔ niale nnaafũ muɛmuɛ, bablɔ ku awosobi nnɔnyi nɛ. Faabalɛ sekpeele osie kanya, ni faataka faabale ɔka-sanko nɛ. 14 Ni di leyooto lɛfɔ lataka katoo di nnle kamɛ ta sekpeele lɛfɔ oso, diekye mmle laklɛɛ fɔ ni lata sekpeele lɛfɔ lawo niimu, SAATE Kplɛ nwu niebuɛ.

15 " ‘Kafɔɔ faatika disi di sekpeele lɛfɔ suoto, ni faayɔ leyooto le faafũ ni faabakple sɔnɔkpeetɛ nɛ. Faadiɛ suoto lɛfɔ faata otii lele ninwaalɛ fɔ anfe di lɛsɔnɔkpee kamɛ. 16 Faayɔ akpeele lɛfɔ awo faabla abula ateate faasasaka di ntakalekɔ, faatookpee asɔnɔ ninfa. Asaa ya ninankaatɛ alɛ ɛɛwa nii, ee bɛɛbla ni diidii. 17 Faayɔ kafɔɔ anyɛnɛ biene ya lata fɔ nii, anyɛnɛ ya baabla ni ku koto sɛɛle ku koto fututu nii, ni faayɔ nya faabla afiɔ-suɔtɔ faata suoto lɛfɔ, ni faakpee asɔnɔ ku mma nɛ. 18 Ni faayɔ abula lɛfɔ ya baayɔ sikũ ateate baaloso ni faakpa ma, faayɔ kafɔɔ nnɔnyi ku olufui nii faase di anu lɛma. 19 Alesaa ya kafɔɔ lata fɔ nii- nnaafũ muɛmuɛ, awosobi nnɔnyi ku bablɔ ba lata fɔ nlɛ faale nii- faayɔ faata fɛ olufui wɔ nikɔpɛ ni ɔkɔnɔ di anu lɛma. Nni niale lɛsaa le niawa ni nɛ, SAATE Kplɛ nwu niebuɛ.

20 " ‘Ninfɛ faayɔ babisuɔtɔbi ku babisankobi lɛfɔ ba faalofo faatɛɛ ni faata ole fɛ alesaa faata afiɔ nɛ. Lɛsɔnɔkpee lɛfɔ nwu ditapɔ? 21 Faalo babi nii, faayɔ ma faata ole faata afiɔ. 22 Di ayududusaa lɛfɔ sɛsaabla simuu ku lɛsɔnɔkpee lɛfɔ nwu kamɛ yi, fatanyuma sekpeele lɛfɔ obe, di obe wɔ faasiɛ ni lɛkyɔtɔ, faate ni ototoole, faatɔɔpɛ faatoomunu ni di ntɔ lɛfɔ kamɛ.

Yerusalem Lasiɛ Nkpa Fɛ Sɔnɔkpeetɛ

23 " ‘Yɔɔsa! Yɔɔsa, SAATE Kplɛ nwu niebuɛ. Diɛkyakaa ni di asiensiesaa lɛfɔ bamba ɔbla kamɛ, 24 faatofo difiɔyo faata suoto lɛfɔ, ni faabla afiɔtii takale di bawo kalɛɛkɔ biala nɛ. 25 Faatofo afiɔyo takale lɛfɔ di lɛkpaka biala, ni faayɔ sekpeele lɛfɔ faakpee asɔnɔ, faatoodiɛ suoto lɛfɔ faatɔɔta otii lele ninwaalɛ anfe ni, faata lɛsɔnɔkpee lɛfɔ nwu latɔɔpɔ diatɔɔkyakaa. 26 Faakpee asɔnɔ ku Egipte batii, ɔkɔnsɔ akleesaa bawo lɛfɔ nwu, faata lɛsɔnɔkpee lɛfɔ nwu lapɔ diatɔɔkyakaa, ni faayɔ ni faakpee mi ɔblɔ nɛ. 27 Nioso lananfi kɔnɛɛ nii di suoto lɛfɔ, ni lakɔlɛkɔlɛ kasɔ lɛfɔ nɛ; ni layɔ fɔ lakpee di balo lɛfɔ ba nimbɛbɛɛ ni anu nnɛɛ nɛ, Filisti batii babisankobi nwu, diabla ni yaaa di asɔnɔkpeesaa lɛfɔ ɔbla nwu suoto. 28 Faakpee asɔnɔ ku Asiria batii kafɔɔ, diekye fatamiɛ; bia di nninkpo sɛmaa kafɔɔ yi, ditakple diamiɛ fɔ. 29 Ninfɛ di lɛsɔnɔkpee lɛfɔ nwu lataka katoo, faayɔ Kaldea asaa-basunsũtɛ kasɔ faakyakaa, kafɔɔ bia nle mmle tintĩ ditamiɛ fɔ.

30 " ‘Lɛ okle di otu lɛfɔ lɛbɔmbɔ lɛwakasɔ nkpo, SAATE Kplɛ nwu niebuɛ alɛ, nse fɛɛbla asaa ya mmle amuu, fɔɔbla fɛle sɔnɔkpeetɛ wɔ ninaa ni sinunsɔ! 31 Faatofo nfiofa di osuku biala suoto, faatofo kafɔɔ afiɔyo takale di lɛkpaka biala, fatadie sɔnɔkpeetɛ, diekye fatatoofũ koto.

32 " ‘Afɔ santɛ sɔnɔkpeetɛ! Bafɔɔ lalɛ fɔ baalenkee afɔ omu lɛfɔ ɔsa! 33 Sɔnɔkpeetɛ biala nfũ koto, kafɔɔ afɔ ninta basɔnɔ lɛfɔ bamuu akyɛsaa, fantɔɔta ma koto di lewofa kamɛ alɛ baakye kakɔ biala manwa fɔ ɔkyɛ alɛ faakpee asɔnɔ ku mma. 34 Nioso di lɛsɔnɔkpee lɛfɔ kamɛ yi, feekyi lete di basɔnɔkpeetɛ bamba suoto; otii kuonwii nintɛ aamiɛ fɔ aata asɔnɔ lɛfɔ okpee. Fɛɛtɛ feekyi lete, diekye fanta koto kafɔɔ manta fɔ kukunwii.

Yaa Lɛkanko Di Yerusalem Suoto

35 " ‘Nkpo oso, afɔ sɔnɔkpeetɛ, nu SAATE nwu ɔlaa! 36 Nnya ɔlaa wɔ di SAATE Kplɛ nwu kobuɛ ni alɛ: Ta fɛnyɛɛnɛ ni lɛsaawɛ lɛfɔ feewii nii, feediki ni kafɔɔ lɛkyɔtɔ lɛfɔ fɛɛtɛ ni di asɔnɔ lɛfɔ okpee kamɛ ku basɔnɔ lɛfɔ oso, ta di afiɔ lɛfɔ ya amuu nikɔkpɛ ni oyududu, fɛɛyɔ ni kafɔɔ babi lɛfɔ ntɔ fɛɛta ma ni oso yi, 37 nkpo oso kamasiisa basɔnɔ lɛfɔ nwu bamuu, ku mba suoto faanya ni ɔmɛnɛfɛ, mba faabɔmbɔ ni ku mba faakyidi nii. Kamasiisa ma nkyeko kakɔ biala di suoto lɛfɔ, anu lɛma kafɔɔ kamadiki fɔ asaa di suoto, man-nya lɛkyɔtɔ lɛfɔ nimuu. 38 Kamakanko fɔ fɛ mmle mankanko ni basanko ba ninkpee ni asɔnɔ, man-wii ni kafɔɔ ntɔ; kamata ntɔ ɔbla okyisa letokonanfi di ɔblɔ yakayaka nii kamɛ ku lɛblɔfiɛ sɛsɔfɔwo ɔkpɛ n-wa di suoto lɛfɔ. 39 Ni kamayɔ fɔ nkpee di basɔnɔ lɛfɔ nnɛɛ, mambibiɛ nfiofa lɛfɔ nwu mantɛ kaasɔ manlalaasa kafɔɔ afiɔyo takale lɛfɔ nwu. Babadiki abula di suoto lɛfɔ, man-yɔ kafɔɔ anyɛnɛ biene lɛfɔ, mandiɛ fɔ fansiɛ lɛkyɔtɔ ku ototoole. 40 Babasiisa batii dikudi di suoto lɛfɔ, mma nimasafɔ fɔ afuɔ, mansasafɔ fɔ kafɔɔ wɛkyɛwɛkyɛ ku mpamii lɛma. 41 Babakpee ayo lɛfɔ ɔtɔ manfiɛ, man-yɔ letokonanfi mantika fɔ di suoto di basanko kpinwu anu. Kamata fandiɛ lɛsɔnɔkpee lɛfɔ nwu, flɔbasinta kafɔɔ basɔnɔ lɛfɔ nwu asaa. 42 N-se ɔblɔ yakayaka nii di suoto lɛfɔ ntɔɔyɔɔ, sɛsɔfɔwo ɔkpɛ lɛblɔfiɛ nii ntoodie di suoto lɛfɔ; otu ntoote mi, ɔblɔ kafɔɔ dilɔbasinfiɛ mi.

43 " ‘Ta fatanyuma ni sekpeele lɛfɔ obe, kafɔɔ feekpee mi ni ɔblɔ ku asaa ya mmle amuu oso yi, nwaako kamasoosa asaa ya fɛɛbla ni ntika di nsintɛɛ lɛfɔ, SAATE Kplɛ nwu niebuɛ. Fatayɔ anunsɔsaa faakyakaa di ayududusaa sɛsaabla lɛfɔ nwu bamba suoto?

Fɛ Mmle Di Obi Ɔya Nte Nii, Nkpo Di Obisankobi Nɔɔ Nte Nɛ

44 " ‘Otii biala nimpɛ akpa kamapɛ lɛkpa le mmle di suoto lɛfɔ alɛ: "Mmle di obi ɔya nte nii, nkpo di obisankobi nɔɔ nte nɛ." 45 Nwaako yaafɔ obisankobi fale, nnwɔ niasĩ ni ɔsa nɔɔ ku babi nɔɔ; nwaako obilɛma-sankobi fale fɛɛta babilee-sankobi, mba niasĩ ni basa lɛma ku babi lɛma. Hiti otii di yaafɔ lale, teefɔ kafɔɔ lale Amori otii. 46 Obilee-sankobi nɔɔfole niale Samaria, nnwɔ niasiɛ ni di katookasɔ lɛfɔ lɛkyɛ ku babisankobi nɔɔ; ku obilee-sankobi bisɔnle wɔ niasiɛ ni di kalakasɔ lɛfɔ lɛkyɛ ku babisankobi nɔɔ ba niale ni Sodom nɛ. 47 Diele sisuku lɛma lete faakyɛ, faanyunko kafɔɔ ayududusaa sɛsaabla lɛma nwu, kafɔɔ di sisuku lɛfɔ simuu kamɛ yi, faabalalaa wla faalenkee ma. 48 Nwaako lɛnya nkpe ni nkpa, SAATE Kplɛ nwu niebuɛ alɛ, obilee-sankobi Sodom ku babisankobi nɔɔ ditabla lɛsaa le di afɔ ku babisankobi lɛfɔ lɛbla ni diidii.

49 " ‘Nyu lo, n-se mmle niale obilee-sankobi Sodom sikpile nɛ: Nnwɔɔ ku babisankobi nɔɔ latakatɛ suoto katoo, baale olepokyoa, batayɔ nwu ole kafɔɔ; batakyakaako bapiitɛ ku mba diafĩ nii. 50 Baatuo suoto, ni baabla ayududusaa di anu nii nɛ. Nkpo oso ladiɛ ma nnɛɛ fɛ mmle fatɔɔnya ni nɛ. 51 Samaria ditabla sikpile se faabla ni ɔfã nɔɔ. Fatɔɔbla ayududusaa kpinwu falenke ma, ni fɛɛbla babilee-sankobi fɛ bate tinini di asaa ya mmle amuu fɛɛbla ni suoto nɛ. 52 Sinunsɔ lɛfɔ sitika fɔ di suoto, diekye fatɔɔbla fɛɛta babilee-sankobi lɛwɛ lɛbɛ lewo. Ta sikpile lɛfɔ lakpɛ oyududu sialenkee ni sele ma oso yi, baate fɛ baabla tinini balenke fɔ. Nioso, sinunsɔ sikpɛ fɔ, sietika fɔ kafɔɔ di suoto, diekye fatɔɔta babilee-sankobi nte fɛ bɛɛbla tinini.

Babakple Manse Sodom Ku Samaria Lelolaa

53 " ‘Kafɔɔ yi, kamakplesa Sodom ku babisankobi nɔɔ, Samaria ku babisankobi nɔɔ lɛlɛ ku lɛlɛ lɛfɔ nta ma, 54 di mmle di sinunsɔ lɛfɔ katika fɔ ni di suoto, sinunsɔ nkpɛ fɔ ni kafɔɔ di asaa ya amuu fɛɛbla fɛɛta diekple ma ni kɔnɛɛ okpee kaafutu. 55 Ni babilee-sankobi, Sodom ku babisankobi nɔɔ ku Samaria ku babisankobi nɔɔ, kamakple manaasiɛ di letembi le baasiɛ ni kamɛ saa; ni afɔ ku babisankobi lɛfɔ kafɔɔ kamakple minaasiɛ di letembi le biasiɛ ni kamɛ saa. 56 Flɔbalɛɛ bia obilee-sankobi Sodom leyooto di ɔkantabee lɛfɔ kamɛ fɛ mmle faabla ni saa, 57 fiɛ nfɛ di akpilesaa lɛfɔ ladie ni kayi. Bia nunua yi, bitookple lɛmansaa biɛta Edom babisankobi ku batii ba bamuu ninsi bakaako nwɔ ni ku Filisti batii babisankobi- batii ba bamuu niɛmana ye beekyi ni boonyu ye ni nyakatãa. 58 Fabafũ letokonanfi di anunsɔsaa lɛfɔ ku ayududusaa lɛfɔ sɛsaabla suoto, SAATE Kplɛ nwu niebuɛ.

Kanya Ninii Ka Ninte Dinaa Ni Kaloo

59 " ‘Nnya ɔlaa wɔ di SAATE Kplɛ nwu kobuɛ ni alɛ: Kamananfi fɔ kootoko fɛ mmle feesiɛko nii, diekye feenyu ntam nii nyakatãa, diefe ni di kanya ninii nwu ɔlalaasa suoto. 60 Kafɔɔ kamanyuma kanya ninii le lanii ni ku afɔ di sekpeele lɛfɔ obe kamɛ, kamabla kafɔɔ kanya ninii ku afɔ dinaa ni kaloo. 61 Ninfɛ fabanyuma ablasaa lɛfɔ, sinunsɔ kafɔɔ nkpɛ fɔ, nse feefũ babilee-sankobi, mba ninle fɔ ni banɔɔfo ku bamaatɛ lɛfɔ, akyuu nwu anyɔ nɛ. Kamayɔ ma nta fɔ fɛ babisankobi, kafɔɔ diele di kanya ninii nii le lanii ni ku afɔ oso. 62 Nioso kamabla kanya ninii nii ku afɔ, ni fabatofo falɛ ami ninle SAATE nwu nɛ. 63 Ni nse lɛbla lekoto otikiti lɛta fɔ di asaa ya amuu fɛɛbla ni suoto yi, fabanyuma, sinunsɔ kafɔɔ nkpɛ fɔ, ni diidii kafɔɔ flɔbasinkple fabɛ kanya lɛfɔ ta sinunsɔ lɛfɔ oso, SAATE Kplɛ nwu niebuɛ.’ "