Ezequiel 47

Okle Wɔ Niabiɛ Kuakye Ni Olekatakɔ

1 Ni di osuɔtɔ nwu lakplesa mi aawako olekatakɔ nwu kayoko nɛ. Ni lanya ntu latoodie diatookye olekatakɔ kayokontũ nwu kalɔ di kufĩkatunkɔ lɛkyɛ nɛ (diekye olekatakɔ nwu lakyɔɔ anu kufĩkatunkɔ). Ntu nwu lasoo diatookye olekatakɔ nwu kalɔ di kalakasɔ lɛkyɛ, di oleɔta akyikye nwu kalakasɔ. 2 Ninfɛ aakpaa mi aafenko di katookasɔ kayoko, ni aaleko mi katũ aakyiko kayi, diofe ni kayoko ka kaayi niakyɔɔ ni anu kufĩkatunkɔ, ntu nwu kafɔɔ latoobiɛ diatookye kalakasɔ lɛkyɛ.

3 Di osuɔtɔ nwu latoofe ni kufĩkatunkɔ lɛkyɛ, aaklee ni lɛklapoosa di kɔnɛɛ nɔɔ yi, aaklapoosa nkpaa kakpe alafa-anɔɔ aadiki, ni aaleko mi katũ aafenko di ntu be lekyofo niadu ni lɛnankpo kanya nɛ. 4 Ni aakple aaklapoosa nkpaa kakpe alafa-anɔɔ bamba aadiki, ni aaleko mi katũ aafenko di ntu be lekyofo niadu ni dikunkyi kanya nɛ. Ni aaklapoosa nkpaa kakpe alafa-anɔɔ bamba aadiki, ni aaleko mi katũ aafenko di ntu be lekyofo niadu ni ɔtɔ̀ kanya nɛ. 5 Ni aakple aaklapoosa lɛba nkpaa kakpe alafa-anɔɔ bamba aadiki nɛ, kafɔɔ nunua okle wɔ nintafuo ni ɔwaalɛ kuale, diekye ntu lapɔ diakyofo alɛ baafia ni ninmi kamɛ- okle wɔ di otii dilaafuo ni ɔwaalɛ kuale. 6 Ni aakaalɛ mi alɛ, "Otii obi, fɔɔnya nle mmle?"

Ninfɛ aaleko mi katũ aakplesa aasifiko okle nwu kotoko nɛ. 7 Obe wɔ ladu ni nfa yi, lanya awoso kpinwu di lɛpɔ kamɛ di okle nwu kotoko ɔfankyi biala. 8 Ni aatɔkɔ mi alɛ, "Okle wɔ mmle kobiɛ kunfe kufĩkatunkɔ kasɔ lɛkyɛ, ni kuosoo kumbuo di Araba*47.8 Yordan Ɔtaata nɛ kamɛ, di lɛba le kuobuo ni di Lekpo*47.8 Nni ninle Lekpo le niekpi ni nɛ kamɛ nɛ. Nse kuobiɛ kuobuo di Lekpo*47.8 Nni ninle Lekpo le niekpi ni nɛ kamɛ yi, ntu nwu mbla nnwaa. 9 Babɔkɛɛ ba ninkpe ni nkpa sɛlambu kamawɛ nkpa di kakɔ lele di okle nwu kobiɛ kunfe. Kɔkpaku kamawɛ di lɛpɔ kamɛ, diekye ntu be mmle mbiɛ ninkyɛ nfa ninta mmba ntu nwu mbla nnwaa; nkpo oso, kakɔ lele di okle nwu lebiɛ kuofe yi, lɛsaa biala kamawɛ nkpa. 10 Kɔkpaku badikitɛ kamayila di lekpo nwu kotoko; diɛyɔ ni di En-Gedi diɛlaadu ni En-Eglaim yi, aba ya manlakasa ni asawu kamawɛ. Kɔkpaku ateate kubale- fɛle Lekpo Kplɛ kɔkpaku okle. 11 Kafɔɔ kasɔ ka ninle afɔ́ ku apatapata kasɔ dilɔbabla nnwaa; babadiɛ mi ninta mmba. 12 Alewoso ateate amuu kamayila di okle nwu ɛfankyi nwu ɛnyɔ atoko. Afata ninya dilɔbayɔɔ, ee abi ninya asĩ otika. Abatika abi kɔwɛntɛ biala, diekye ntu be ninkye ni kakleklekɔ nwu mbiɛ ninkyɛ nya ɔkyɛ. Abi ninya kamale alesaa, afata ninya kafɔɔ kamakyá sifiɛ."

Kasɔ Nwu Amɛ

13 Nnya ɔlaa wɔ di SAATE Kplɛ nwu kobuɛ ni alɛ: "N-ya mmle ninle amɛ ya suoto dikpeni fɛɛsɛ ni kasɔ nwu fɛ atesaa fɛɛta ni Israel ana lefosi-anyɔ nwu. Di Yosef kafɔɔ awɛ aba anyɔ. 14 Dikpeni fɛɛsɛ kasɔ nwu kyɛkyɛ fɛɛta ma. Diekye latakatɛ kɔnɛɛ katoo laka ntam nlɛ kamayɔ ka nta bawa lee, nlɛ kasɔ ka mmle kamale atesaa lee.

15 "Nya mmle di kasɔ nwu kɔmɛ kamatika kunfe ni:

"Di katookasɔ lɛkyɛ yi, kɔmɛ nwu kamayɔ di Lekpo Kplɛ le ninte ni di Hetlon osuku kunfe di Lebo-Hamat kunaadu Sedad, 16 Berota ku Sibraim (wɔ ninte ni di Damasko ku Hamat kɔmɛ obo), kunaadu bia Haser-Hatikon, wɔ ninte ni di Hauran kɔmɛ suoto. 17 Kɔmɛ nwu kamasana kunkye lekpo kunaadu Hasar-Enan, konfe di Damasko katookasɔ kɔmɛ ku Hamat katookasɔ lɛkyɛ kɔmɛ. Nko mmle nimale katookasɔ lɛkyɛ kɔmɛ nɛ.

18 "Di kufĩkatunkɔ lɛkyɛ yi, kɔmɛ nwu kamafe di Hauran ku Damasko obo, kunfe di Yordan wɔ ninte ni di Gilead ku Israel kasɔ obo, kunaadu kufĩkatunkɔ lekpo kunsifi bia Tamar. Nko mmle nimale kufĩkatunkɔ lɛkyɛ kɔmɛ nɛ.

19 "Di kalakasɔ lɛkyɛ yi, kɔmɛ nwu kamakye di Tamar kunaadu bia Meriba-Kades ntu, nse kutoofe di Egipte Kaklenyii kuɔlaadu Lekpo Kplɛ nwu. Nko mmle nimale kalakasɔ kɔmɛ nɛ.

20 "Di kufĩkamɛɛkɔ lɛkyɛ yi, Lekpo Kplɛ nwu nimale kɔmɛ kunaadu lɛba lewo di Lebo-Hamat ɔfankyi. Nko mmle nimale kufĩkamɛɛkɔ kɔmɛ nɛ.

21 "Bisɛ kasɔ ka mmle bita suoto lee di Israel ana nwu kanya. 22 Bisɛ ka fɛ atesaa bita suoto lee ku bafɔɔ ba nintoodiki ni kasiɛ di kamɛ lee bakpe ni babi. Binya ma fɛ ntɔ lee- Israel batii okpoo batii; dikpeni bɛɛta ma atesaa ku aye di Israel ana nwu kamɛ. 23 Kɔna lele kamɛ di ɔfɔɔ nwu lebuo yi, nfa dikpeni biɛtɔɔ atesaa nɛ," SAATE Kplɛ nwu niebuɛ.