1 ଏନ୍‌ଇଡ଼ିଂ ପର୍‌ମେସର୍‌ ନୋହ ଆରି ମେଁନେ ଗଡ଼େଅଇଂକେ ଆସିର୍ବାଦ୍‌ ଡିଙ୍ଗ୍‌ଚେ ବାସଙ୍ଗ୍‌କେ, "ପେଇଂ ଜାତିକୁଟୁମ୍‌ ଆରି ଜାବର୍‌ ବଂସ ଡିଂଚେ ମଚ୍‌ପୁର୍‌କେ ବର୍ତି ଆଡିଙ୍ଗ୍‌ପା । 2 ମଚ୍‌ପୁର୍‌ନେ ସାପା ପସୁ କିତଂନେ ସାପା ପ୍ଲିଗ୍‌ ତୁବନ୍ୟା ରେଃସ ଅଲେଙ୍ଗ୍‌ନେ ସାପା ପ୍ରାନି, ବାରି କେଣ୍ଡିଆନ୍ୟା ଲେଃକ୍ନେ ସାପା ଆଃଡ଼ ଆପେକେ ବୁଟ ଆର୍‌ଏ । ସାପା ଜିବ୍‌ ଜନ୍ତୁ ନାଁନେ ନ୍ତିନ୍ୟା ଲେଃଆର୍‌ଏ । 3 ନେଙ୍ଗ୍‌ ଆପେକେ କ‍ଅଁଲ୍‌ ଆମାଃ ରକମ୍‌ ଏନ୍‌ ସାପା ବିମ୍ୱକେ । ସାପା ପସୁ ପେନେ କାଦି ଡିଙ୍ଗ୍‌ଏ । ନେଙ୍ଗ୍‌ ମେଃନେ ସାପା ମଚ୍‌ପୁର୍‌ନ୍ୟା ବିମ୍ୱକେ; ଆତେନ୍‌ ସାପା ପେନେ । 4 ମାତର୍‌ ନେଙ୍ଗ୍‌ ଆପେକେ ମୁଇଂ ଆଦେସ୍‌ ମ୍ୱିଏ । ପେ ଆଣ୍ଡିନେ ଡିଗ୍‌ ପ୍ରାନିନେ ମ୍‌ମ୍ୟାଁ ଲେଃକ୍ନେ ଚିଲି ପେଚଙ୍ଗ୍‌ ଣ୍ଡୁ । ଡାଗ୍ଲା ମ୍‌ମ୍ୟାଁନ୍ୟା ଜିବନ୍‌ ଲେଃକେ । 5 ନେଙ୍ଗ୍‌ ମ୍‌ମ୍ୟାଁବାନ୍‌ ଡଣ୍ଡ୍‌ ମ୍ୱିଏ । ଆତେନ୍‌ ପ୍ରାନି ବାନ୍‌ ଡିଙ୍ଗ୍‌ଲେ ଣ୍ଡୁଲା ରେମୁଆଁଇଂନେବାନ୍‌ । ଜଦି ରେମୁଆଁଇଂ ନିଜେ ନିଜେ ବିତ୍ରେ ବାଗୁଏଆର୍‌ଏ, ନେ ଆତେନ୍‌ ମ୍‌ମ୍ୟାଁବାନ୍‌ ଡଣ୍ଡ୍‌ ନେବିଏ । 6 ପର୍‌ମେସର୍‌ ନିଜର୍‌ ମୁର୍ତିରେ ରେମୁଆଁକେ ତିଆର୍‌ ଡିଙ୍ଗ୍‌ବକେ । ତେସା ଜାଣ୍ଡେ ଡିଗ୍‌ ରେମୁଆଁକେ ବାଗୁଏଃଏ, ଆମେକେ ଡିଲାଡିଗ୍‌ ବିନ୍‌ ରେମୁଆଁ ବାଗୁଏଃଏ ।"

7 ନୋହ ନାଁନେ ଆରି ନାଉଂନେ ଡିଲାଡିଗ୍‌ ଜାବର୍‌ ଗଗସିଆ ଡିଙ୍ଗ୍‌ଏ । ପେଇଂ ମଚ୍‌ପୁର୍‌ନ୍ୟା ରେମୁଆଁ ବର୍ତି ପେରାଡିଙ୍ଗ୍‌ଏ ।

8 ଏନ୍‌ଇଡ଼ିଙ୍ଗ୍‌ ପର୍‌ମେସର୍‌ ନୋହ ଆରି ମେଁନେ ଉଂଡେଇଙ୍ଗ୍‌କେ ବାସଙ୍ଗ୍‌କେ, 9 କେଲା, ପେନେ ଏଃତେ ଆରି ପେନେ ଇଡ଼ିଂଡେନେ ବଂସ ଏଃତେ ଆରି ପେନେ ଏଃତେ ସାପା ଜିବ୍‌ଜନ୍ତୁ ଏଃତେ, 10 ନେଃ ନେଃନେ ନିଅମ୍‌ ନେଃଡିଙ୍ଗ୍‌ପା । ସାପା ପ୍ଲିଗ୍‌, ସାପା ଡୁଆ ବାସାକ୍ନେ ପସୁ ବାରି ସାପା ପସୁଇଂ ଆଣ୍ଡିନେ ସାପା ପେ ଏଃତେ ଜାହାଜ୍‌ବାନ୍‌ ତାର୍‌ ଲେଃଆର୍‌କେ । ନେଃ ନେଃନେ ନିଅମ୍‌ ସାପା ମଚ୍‌ପୁର୍‌ନେ ଜିବନ୍‌ ଲେଃକ୍ନେ ପ୍ରାନି ନ୍‌ସା ଡିଙ୍ଗ୍‌ନେବକେ । 11 ନେ ପେଇଂନେ ଏତେ ଏନ୍‌ ନିଅମ୍‌ ତିଆର୍‌ ନେଡିଙ୍ଗ୍ଏ । ସାପା ପ୍ରାନି ବନ୍ୟାବାନ୍‌ ଆରି ବିନାସ୍‌ ଆଡିଙ୍ଗ୍‌ଆର୍‌ ଣ୍ଡୁ । ବାରି ମଚ୍‌ପୁର୍‌କେ ନସ୍ଟ ଆଡିଙ୍ଗ୍‌ ନ୍‌ସା ଆରି ବନ୍ୟା ଆଡିଙ୍ଗ୍‌ ଣ୍ଡୁ । 12 ପର୍‌ମେସର୍‌ ବାସଙ୍ଗ୍‌କେ, ନେ ପେଇଂନେ ଏତେ ଆରି ପେଇଂନେ ସାଙ୍ଗ ସାପା ପ୍ରାନିଇଂ ଏତେ ରେମୁଆଁଇଂ ନ୍‌ସା ମାଡାନେ କାଲ୍‌ ଜାକ ନିଅମ୍ ତିଆର୍‌ ଣ୍ଡିଂକେ, ଆତେନ୍‌ ଚିନ୍‌ ଆକେନ୍‌; 13 ନେଙ୍ଗ୍‌ ନେଙ୍ଗ୍‌ନେ ଇନ୍ଦ୍ରଦନୁ ତ୍ରିଗ୍‌ଡ୍ୟାନ୍ୟା ତିଆର୍‌ ଡିଙ୍ଗ୍‌ମ୍ୱକେ । ଆତେନ୍‌ ମଚ୍‌ପୁର୍‌ ଏତେ ନେଙ୍ଗ୍‌ନେ ନିଅମ୍‌ନେ ଚିନ୍‌ ଡିଙ୍ଗ୍‌ଏ । 14 ଉଡ଼ିବେଲା ନେଙ୍ଗ୍‌ ମଚ୍‌ପୁର୍‌ ଆଡ଼ାତ୍ରା ତ୍ରିଗ୍‌ଡ୍ୟା ଆତାର୍‌ ମ୍ୱିଏ, ଆତେନ୍‌ ବେଲା ଏନ୍‌ ଇନ୍ଦ୍ରଦନୁ ତ୍ରିଗ୍‌ଡ୍ୟାଃନ୍ନିଆ ତ୍ନାଏ; 15 ନେଙ୍ଗ୍‌ ଉଡ଼ିବେଲା ଇନ୍ଦ୍ରଦନୁକେ ଙ୍କେଏ ଆତେନ୍‌ ବେଲା ନେଙ୍ଗ୍‌ ପେ ଏତେ ବାରି ବିନ୍‌ବିନ୍‌ନେ ଜିବନ୍‌ ଲେଃକ୍ନେ ପ୍ରାନିଇଂ ଏତେ ଡିଙ୍ଗ୍‌ଲେଃକ୍ନେ ନିଅମ୍‌କେ ମନେ ପଡ଼େଏ । ଆତେନ୍‌ ନିଅମ୍‌ ବାସଙ୍ଗ୍ଏ ଜେ, ବବିସତ୍‌ରେ ଦେକ୍‌ ରକମ୍‌ ବନ୍ୟାନ୍ୟା ସାପାରେ ନସ୍ଟ ଆଡିଙ୍ଗ୍‌ଆର୍‌ ଣ୍ଡୁ । 16 ବାରି ଇନ୍ଦ୍ରଦନୁ ଡିଙ୍ଗ୍‌ଲା ନିଂ ମେଁନେ ଆଡ଼ାତ୍ରା ନେକେଏ, ଆତ୍‌ବାନ୍‌ ମଚ୍‌ପୁର୍‌ନେ ସାପା ଜିବନ୍‌ ଲେଃକ୍ନେ ପ୍ରାନି ଏତେ ପର୍‌ମେସର୍‌ନେ ଆଣ୍ଡିନେ ମାଡାନେ କାଲ୍‌ ଜାକ ନିଅମ୍‌ ଲେଃକେ, ଆତେନ୍‌ ନେଙ୍ଗ୍‌ ମନେ ନ୍‌ତ୍ଲାଗ୍‌ଏ । 17 ପର୍‌ମେସର୍‌ ନୋହକେ ବାସଙ୍ଗ୍‌କେ, ମଚ୍‌ପୁର୍‌ନେ ସାପା ପ୍ରାନି ଏତେ ନେ ଆଣ୍ଡିନେ ନିଅମ୍‌ ତିଆର୍‌ ଡିଙ୍ଗ୍‌ନେବକେ । ଆତେନ୍‌ନେ ଇନ୍ଦ୍ରଦନୁ ଏନ୍‌ ଚିନ୍‌ ଡିଙ୍ଗ୍‌ଏ ।

18 ନୋହନେ ଉଂଣ୍ଡେଇଂ ଆମେଇଂକେ ସାଚେ ଜାହାଜ୍‌ବାନ୍‌ ତାର୍‌ଆର୍କେ । ମେଇଂନେ ମ୍ନି ଶେମ, ହାମ ବାରି ଯେଫତ୍‌, ହାମ ଲେଃଗେ କିଣାନନେ ଆବା । 19 ଆତେନ୍‌ ଞ୍ଜିରୁଆ ଜାକ ନୋହନେ ଉଂଡେ । ବାରି ମଚ୍‌ପୁର୍‌ନେ ସାପା ରେମୁଆଁ ଏନ୍‌ ଞ୍ଜିରୁଆ ବାନ୍‌ ଜନମ୍‌ ଡିଙ୍ଗ୍‌ଲେଃଆର୍କେ ।

20 ନୋହ ଲିଜ ସ୍ଲେରେ ଡିଙ୍ଗ୍‌କେ । ମେଁ ଲିଜନ୍ୟା ଅଙ୍ଗୁର୍‌ ସ୍ଲାଃ ଉଂକେ । 21 ନୋହ ଆତ୍‌ବାନ୍‌ ଅଙ୍ଗୁର୍‌ ରସ୍‌ ତିଆର୍‌ ଡିଙ୍ଗ୍‌ଚେ ଉଗ୍‌କେ । ମେଁ ଅଙ୍ଗୁର୍‌ ରସ୍‌ ଉଗ୍‌ଚେ ବୁସାଃଚେ ମେଁ ନାଙ୍ଗ୍‌ଲାଚେ ତମ୍ୱୁନ୍ୟା ଲଃଲେଗେ । 22 କିଣାନନେ ଆବା ହାମ ନିଜର୍‌ ଆବାନେ ଲାଙ୍ଗ୍‌ଲା ଲେଃକ୍ନେ କେଚେ, ବାଏରେ ନିଜର୍‌ ମ୍ୱାକ୍ଲିଗ୍‌ ବୟାଁକେ ବାସଙ୍ଗ୍‌କେ । 23 ଆତେନ୍‌ ବେଲା ଶେମ ବାରି ଯେଫତ୍‌ ଜେବାନ୍ୟା ପାଟାଇ ରାଙ୍ଗ୍‌ପାଙ୍ଗ୍‌ଚେ ଦ୍ରାପ୍ରେ ୱେଚେ ନିଜର୍‌ ଆବା ଲାଙ୍ଗ୍‌ଲା ଲେଃକ୍ନେ କେଚେ ପାଟାଇ ଆୱାଡ଼େଗ୍‌ ବିଃଆର୍କେ । ମେଇଂ ପ୍ଲା ପାକା ସାର୍ମୁଆଃ ବଚେ ୱେଆର୍‌କ୍ନେସାଃ ବାଡ଼େ ଡିକ୍‌ଚା ଲେଃକ୍ନେ କେ ଆୟାଆର୍କେ ଣ୍ଡୁ । 24 ଏନ୍‌ ଇଡ଼ିଙ୍ଗ୍‌ ନୋହ ତଡ଼୍ୟାକେ ମେଁ ଅଙ୍ଗୁର୍‌ ରସ୍‌ ଉଗ୍‌ଚେ ଡୁଲେଗ୍‌ ଲେଃଗେ । ମେଁ ମ୍ୟାକେ ଜେ ମେଁନେ ଡାଆଁ ଉଂଡେ ମେଁନ୍‌ସା ମେଃନି ଡିଙ୍ଗ୍‌ବକେ । 25 ବାରି ନୋହ ବାସଙ୍ଗ୍‌କେ । "କିଣାନ ଅବିସାପ୍‌ ବାଲେଃ । ମେଁ ନିଜର୍‌ ବୟାଁଇଂନେ ଚାକର୍‌ ଡିଙ୍ଗ୍‌ଏ ।" 26 ନୋହ ବାରି ବାସଙ୍ଗ୍‌କେ, ଶେମନେ ପର୍‌ମେସର୍‌ ମାପ୍‌ରୁ ଦନ୍ୟ ଡିଙ୍ଗ୍‌ଲେ, କିଣାନ ଶେମନେ ଚାକର୍‌ ଡିଙ୍ଗ୍‌ଲେ । 27 ପର୍‌ମେସର୍‌ ଯେଫତ୍‌କେ ଜାବର୍‌ ଲିଜ ବିଲେ । ମେଁ ଶେମନେ ତମ୍ୱୁନ୍ୟା ବାସାଲେ । କିଣାନ ମେଁନେ ଚାକର୍‌ ଡିଙ୍ଗ୍‌ଲେ ।

28 ବନ୍ୟା ଇଡ଼ିଙ୍ଗ୍‌ ନୋହ ଞ୍ଜିସ ପଚାସ୍ ମୁଆଁ ବ୍ରୁଆକେ । 29 ଦେକ୍‌ରକମ୍‌ ନୋହ ନଅସ ପଚାସ୍‌ ମୁଆଁ ବ୍ରୁଆକେ । ଏନ୍‌ ଇଡ଼ିଙ୍ଗ୍‌ ମେଁ ଗୁଏକେ ।