ማዝሙርያ 101

ካቲ ጾሳዉ ገልያ ቃላ ጫቁዋ

ዳዊታ ማዛሙርያ

1 ታን አገና ሲቁዋባነ ጽሎ ፕርዳባ የጻና፤

አቤት መና ጎዳዉ፥ ታን ነዉ የጻና።

2 ታን ሱረ ኦግያባ ቆፓና።

ኔን ታኮ አዉደ ያን?

ታን ታ ጎልያን ሱረተን ሀመታና።

3 ታን ታ አይፍያን ፖኮባ ጼልከ።

ጾሳፐ ዎራ ስሜዳ አሳቱዋ ኦሱዋ እጻይ፤

ኡንቱንቱ ሙለካ ታናና ግድክኖ።

4 ዎዛና ጌላተይ ታፐ ሃኮ፤

ኢታተ ታን ኤርከ።

5 ጌማን ባረ ሾሩዋ ዝግርያዋ፥

ታን ስርጵ ኦና።

ኦቶረትያነ አይያ አሳ ታን ዳንዳይከ።

6 ኡንቱንቱ ታናና ደአና ማላ፥

ቢታ ቦላ ደእያ አማነትያዋንታ፥

ታን ኬካ አይፍያን ጼላይ።

ሱረተን ሀመትያ አሳይ ታዉ ኪተታና።

7 ጭምያዌ ታ ጎልያን ደኤና፤

ዎርዱዋ ሃሳይያዌ ታ ስንን ጋምኤና።

8 ቢታን ደእያ ኢታ አሳ ኡባ፥

ታን ጋላስ ጋላስ ይሳና፤

ኢታ ኦያዋንታ ኡባ፥

ታን መና ጎዳ ካታማፐ ቆላና።