1 መና ጎዳይ፥ ታ ዛላይ ጋላተቶ! እ ታ ኩሽያ ኦላዉ፥

ታ ብራቱዋካ ቶራዉ ሎህሴ።

2 እ ታና ሲቅያ ጾሳነ ታ ጌሱዋ፤

እ ታ ሚጻነ ታና አሽያዋ።

እ ታ ጎንዳልያነ ታን ባቃታደ አትያ ሳኣ።

ካዉተቱዋ እ ታዉ ሞድስያዋ።

3 አቤት መና ጎዳዉ፥

ኔን አዉ ቆፕያ አሳይ እ አዬ?✝

ኔን ናገትያ አሳ ናአይ አዬ?

4 አሳይ እት ገደ ጫርክያ ጫርኩዋ ማላ፤

አ ጋላሳቱካ አያ ኩዋ ማላ።

5 አቤት መና ጎዳዉ፥ ነ ሳሉዋ ዳካደ ዱገ ዎ!

ዎጋ ደረቱዋ ቦቻ፤ ኡንቱንቱካ ጩዋትኖ!

6 ዋልቃን የዳደ ነ ሞርከቱዋ ላላ!

ነ ዎንዳፍያ ፖ የዳደ ኡንቱንታ የደርሳ!

7 ቦላና ነ ኩሽያ ዱገ የዳደ፥

ታና ጪሞ ሃቱዋፐ ጎቻደ ከሳ፤

አላጋ አሳቱዋ ኩሽያፐ ታና ዎ አካ።

8 ኡንቱንቱ ቱሙዋ ሃሳይክኖ፥

ጫቂደካ ዎርዱዋ ሃሳዪኖ።

9 አቤት ጾሳዉ፥ ታን

ነዉ ኦራ የ የጻና፤

ታሙ ባቀን ዋጸቴዳ ዲን ነዉ ዲጻና።

10 ካተቶ ጾኑዋ እማሳ፤

ነ ቆማ ዳዊታ አሻሳ።

11 ታና ኢታ ማሻፐ አሻሳ፤

አላጋ አሳቱዋ ኩሽያፐ ታና ዎ አካ።

ኡንቱንቱ ቱሙዋ ሃሳያና ጊደ ጫቂደካ፥

ዎርዱዋ ሃሳዪኖ።

12 ኑ አቱማ ናናቱ፥

ባረንቱ ያላጋተን ዶልቂዶልቂደ፥

ድጭያ ም ማላ ግድኖ።

ኑ ማጫ ናናቱካ ካትያ ጎልያ ዞዝያን፥

አሌቆ ኤሴዳ ቱቅያ ማላ ግድኖ።

13 ኑ ድየቱ፥

ዳሮ ዱማ ዱማ ቆሞ ካን ኩምኖ፤

ኑ ደምባቱዋን ደእያ ዶርሳቱ ሻኣ፥

ታሙ ሻኣ የልኖ።

14 ኑ ሚዛቱ ብራስኖ፤

ኡንቱንቱ ሳልኤሰናን የለቲደ ጮራትኖ።

ኑ ኦገቱዋን ዳጋማ ዋሱ ስሰቶፖ።

15 ሀ የዉ ቱሙ ሀንያ አሳቱ፥

አንጀቴዳዋንታ።

ኡንቱንቱ ጾሳይ መና ጎዳ ግድያ አሳቱ

አንጀቴዳዋንታ።