1 ኔን መቶቴዳ ዎደ መና ጎዳይ ነ ዎሳ ስሶ፤

ያቆባ ጾሳ ሱንይ ኔና ምንሶ።

2 ባረ ጌሻ ሳኣፐ ነዉ ማዱዋ ኪቶ፤

ጽዮነፐ ኔና ዘምፕሶ።

3 ነ ያርሹዋ ኡባ እ ነዉ ሀሳዮ፤

ነ ጹግያ ያርሹዋን ናሸቶ።

4 ነ ዎዛና አሙዋ ነዉ እሞ፤

ነ ሀልቹዋ ኡባ ፖሎ።

5 ነ ጾኑዋ ድራዉ፥ ኑን ናሸቻዉ ሆምቦጫና፤

ኑ ጾሳ ሱንን ኑ ባንድራ ቁ ኦና።

ኔን ዎሴዳዋ ኡባ መና ጎዳይ ነዉ እሞ።

6 መና ጎዳይ ባረ ዶሬዳ ካትያዉ

ጾኑዋ እምያዋ ታን ብሮ ኤራይ።

እ ባረ ጌሻ ሳሉዋን ስሳና፤

ባረ ኡሸቻ ኩሽያን ዎልቃማ ጾኑዋ አዉ እማና።

7 እቱ እቱ ባረንቱ ኦላ ፓራይ ጎችያ ጋርያን፥

ሀራቱ ባረንቱ ፓራን ጬቀቲኖ፤

ሽን ኑን መና ጎዳ ኑ ጾሳ ዎልቃን ጬቀቴቶ።

8 ኡንቱንቱ በቲደ ኩንዳና፤

ሽን ኑን ደንዲደ፥ ምን ኤቃና።

9 አቤት መና ጎዳዉ፥ ካትያዉ ጾኑዋ እማ፤

ኑን ኔና ጼስያ ዎደ ስሳ።