ማዝሙርያ 95

ጋላሳ ጋላሳ ማዝሙርያ

1 ሃይተ፤ አነ መና ጎዳ ሳቦይተ።

ኑና አሽያ ዛላዉ ናሸቻዉ የጾይተ።

2 አ ስን ጋላታና ሺቆይተ።

ጋላታ የ ናሸቻን የጾይተ።

3 አያዉ ጎፐ፥ መና ጎዳይ ዎልቃማ ጾሳ፥

ጾሳቱዋ ኡባ ቦላ ዎልቃማ ካትያ።

4 ቢታ ጪማቱ አ ኩሽያን ደኢኖ፤

ደርያ ሁጰቱካ አዋ።

5 አባ ሃይካ አዋ፤

ሄዋ እ መዳ፤

መላ ቢታካ አ ኩሺ ኦዳ።

6 ሃይተ፤ ሆኪደ አነ አዉ ጎይኖይተ፤

ኑና መዳ መና ጎዳ ስንን ጉልባቶይተ።

7 አያዉ ጎፐ፥ እ ኑ ጾሳ።✝95:7-8 እብራ. 3:15፤ 4:7✝95:7-11 እብራ. 3:7-11

ኑን አ ቆሩዋን ደእያ አሳቱዋ፤

ኑን እ ሄምያ አ ዶርሳ ዉደቱዋ።

ጾሳይ ህንተና ግያዋ ሀች ስስተ!

8 "ካሰ ህንተ ማይዛ አዎቱ፥

ማሪባ ግያ ሳኣን ሀኔዳዋዳን፥✝95:8 ከሳ 17:1-7፤ ፓይ. 20:2-13

ሄ ጋላስ ማሳ ባዙዋን እጼዳዋዳን፥

ህንተካ ዞርያ አከናን እጾፕተ።

9 ኡንቱንቱ ታ ኦሱዋ በኢደካ፥

ታና ኤቀቴድኖነ ፓጬድኖ።

10 ታን ሄ የለታ ኦይታሙ ላይ ሻተታድ፤

‘ኡንቱንቱ ኡባ ዎደ ባረንቱ ዎዛናን ባሊኖ፤

ኡንቱንቱ ታ ኦግያ ኤርበይክኖ ያጋድ።

11 ሄዋዳንካ ቃይ፥ ታን ሀንቀታ ጫቃደ፥✝95:11 ፓይ. 14:20-23፤ ዛረ. 1:34-36፤ 12:9-11፤ እብራ. 4:3-5

ኡንቱንቱ ታ ሸምፑዋሳ ኡባካ ገልክኖ’ ያጋድ" ያጌ።