ማዝሙርያ 98

ጾሳይ አላምያ ሞድያዋ

ማዝሙርያ

1 መና ጎዳዉ ኦራ የ የጽተ፤

አያዉ ጎፐ፥ እ ማላልስያባ ኦዳ።

አ ኡሸቻ ኩሺነ አ ጌሻ ቄሲ

አዉ ጾኑዋ እሜዳ።

2 መና ጎዳይ ባረ ጾኑዋ ኤርሴዳ፤

እ አሽያዋ ካዉተቶ ቆንጭሴዳ።

3 እ እስራኤልያ ሶ አሳ ሲቅያዋነ

ኡንቱንቶ አማነትያዋ ሀሳዬዳ።

ሳኣ ጋጻ ጋካናዉ ደእያ አሳይ ኡባይ

ኑ ጾሳይ አሽያዋ በኤዳ።

4 ሳኣ ቦላን ደእያ አሳ ኡባይ፥

መና ጎዳዉ ናሸቻን የጽተ፤

ቃላ ቁ ኦደ፥ ናሸቻ ሳባ ሳቢተ።

5 ዲ መና ጎዳዉ ዲጽተ፤

ዲንነ የን ጾሳ ሳቢተ።

6 ጹሩምባነ ሎኩዋ ፑኒደ፥

ናሸቻን መና ጎዳ ኑ ካትያ ስንን ሆምቦጭተ።

7 አባይነ አባ ግዶን ኩሜዳዌ ኡባይ ጉሞ።

ሳአይነ ሳኣ ቦላን ደእያ ኡባይ የጾ።

8 ሻፋቱ እትፐ ባረንቱ ኩሽያ ባቂኖ።

ቄር ደረቱ መና ጎዳ ስንን እትፐ ናሸቻን የጽኖ።

9 አያዉ ጎፐ፥ እ ሳኣ ቦላን ዳናታናዉ ዬ።

እ ሀ ሳኣ ቦላ ጽሎተን፥

አሳ ቦላካ ሱረተን ዳናታና።