ማዝሙርያ 90

አሳ ናኣ ደኡዋ

ጾሳ አሳይ ሙሴ ዎሴዳ ዎሳ

1 ጎዳዉ፥ ኔን የለታ ኡባን፥

ኑን ደእያ ሳኣ ግዳዳ።

2 ደረቱ መታናፐ ካሰ፥

ዎይ ኔን ሳኣ ኦናፐ ካሰ፥

መናፐ መና ጋካናዉካ ኔን ጾሳ።

3 ኔን አሳ ናናቱዋ፥ "አሳ ናቶ፥

ጉየ ቢታዉ ስምተ" ያጋደ፥

ኡንቱንታ ጉየ ኡንቱንቱ መቴዳ ቢታዉ ዛራሳ።

4 ሻኡ ላይይ ነዉ ዝን አ ጋላሳ ማላ፤✝90:4 2 ጰጽ. 3:8

ዎይ ቃማ ግዶፐ እት ሳትያ ማላ።

5 ኔን አሳ ቆፐናን ድኡዋዳን አፋሳ።

ኡንቱንቱ አኩሙዋ ማላ፤

ዎንታ ዎንታ ዶልያ ማታ ማላ።

6 ሄ ማታይካ ዎንታ ዎደ ድጪደ ጪሼ፤

ኦማርስያ ዎደ ሹል መሌ።

7 ኑን ነ ይሉዋን ዉሬዶ፤

ነ ሀንቁዋ ሱሉዋን ዳጋሜዶ።

8 ኔን ኑ ኢታ ኦሱዋ

ነ ስንን ዎዳ፤

ቃይ ኑ ጌሜዳ ናጋራ

ነ ስን ፖኡዋኮ አዳ።

9 ኑ ጋላሳ ኡባይ ነ ሀንቁዋን አዳ፤

ኑ ላይ እት ኦልያዳን ዉርሴዶ።

10 ኑ ደኡዋ ላይይ ላፑን ታማ፤

ዎይ ምኖፐ፥ ሆስፑን ታማ፤

ሄዌካ መቱዋነ ቱጋ።

ኑ ላይይ ኤለካ አ፤

ኑንካ ኤለካ ክቼቶ።

11 ነ ሀንቁዋ ዎልቃ ኤርያዌ ኦኔ?

ነ ሀንቁዋ ሱሉ ያሽያዋ።

12 ሄዋ ድራዉ፥ ኑ ላይ በስያዋዳን፥

ጎኤታና ማላ አዳ ኤራ ኑና ታማርሳ።

13 አቤት መና ጎዳዉ፥ ነ ሀንቁ አዉደ ጋካናሴ?

ሀያና፤ ነ ቆማቶ ቃረታ!

14 ኑ ላይ ኡባን

ኑን ናሸታናዳንነ የጻናዳን፥

ዎንታ ዎንታ አገና ነ ሲቁዋን ኑና ካልሳ።

15 ኔን ኑና መቶዬዳ ጋላሳቱዋ ኬሻነ

ኑን ቱጋ በኤዳ ላይቱዋ ኬሻ፥

ኑና ናሸቻ።

16 ኑዉ ነ ቆማቶ ነ ኦሱ ቆንጮ፤

ነ ቦንቾ ዎልቃይ ኡንቱንቱ ናናቶ ቤቶ።

17 ጎዳ ኑ ጾሳ ኬካተይ ኑ ቦላን ግዶ፤

ኑ ኩሽያ ኦሱዋ ኑዉ ሱርሳ።

ኤ፥ ኑ ኩሽያ ኦሱዋ ሱርሳ።