ማዝሙርያ 75

ጾሳይ ፕርድያዋ ግዱሳ

ዛማረቱዋ ካፖ አሳፍ። "ይሶፓ" ጌተትያ ዲ ዋን የጼዳ የ።

1 ነዉ ጋላታ እሜቶ፤ አቤት ጾሳዉ፥ ኔና ጋላቴቶ፤

"ነ ሱንይ ዎጋ" ጊደ አዋዬቶነ፥

ማላልስያ ነ ኦሱዋ ኡባ ኦዴቶ።

2 ጾሳይ፥ "ዶራደ ኬሬዳ ጋላስ፥

ሱረ ፕርዳ ፕርዳናዌ ታና።

3 ሳአይነ አን ደእያዋንቱ ኡባይ ቃጽናካ፥

አ ቱሳ ምንሳ ኤስያዌ ታና።

4 ታን ኦቶራንቻቱዋ፥ ኦቶረቶፕተ ያጋይ፤

ኢታቱዋካ፥ ህንተ ካጭያ ደንፕተ።

5 ህንተ ካጭያ ቂስ በሶፕተ፤

ዛቱሪደ ሃሳዮፕተ ያጋይ" ያጌ።

6 ቦንቹ አዋይ ዶልያሳፐ

ዎይ ዉልያሳፐ

ዎይ ባዙዋፐ ዬና።

7 ሽን ፕርድያዌ ጾሳ፤

እ እቱዋ ቦላ ፕርዴ፤

እቱዋ ሻትን።

8 መና ጎዳ ኩሽያን እት ዋንጫይ ደኤ፤

ሄ ዋንጫይ ጾሳ ሀንቁዋ ዎይንያ ኤሳን ኩም ኡቴዳ።

እ ሄዋፐ ኡሻ ትግና፥

ሳኣን ደእያ ኢታ አሳቱ ሄዋ ኡሻና፤

ኡንቱንቱ ኦርጩዋካ አሸናን ጭንግሲደ ኡሻና።

9 ሽን ታን ያቆባ ጾሳባ ኦዳናነ

መናዉ አ ሳባና።

10 እ ኢታ አሳቱዋ ካጭያ ኡባ መንና፥

ሽን ጽሎቱዋ ካጪ ቁ ቁ ጋና።