ኦሞዱዋን ደእያ እስራኤልያ ዬኩዋ
1 ባብሎነ ሻፋቱዋ ማታን ኡቲደ፥
ኑን ጽዮነ ቆፔዳ ዎደ ዬኬዶ።
2 ሄ ሳኣን ኑን፥
ኑ ዲ ሃ ማታን ድጭያ ም ቦላ ካቄዶ።
3 ኑና ኦሞዴዳ አሳቱ፥
ኑን የጺደ፥ ኡንቱንታ ናሸቻና ማላ፥
"ጽዮነ የፐ እቱዋ አነ ኑዉ የጽተ" ያጌድኖ።
4 መና ጎዳ የ፥ ኑን፥
አላጋ ቢታን ዎት የጻኔ?
5 የሩሳላመ ካታማቴ፥ ታን ኔና ዶጎፐ፥
ታ ኡሸቻ ኩሺ ባረ ኦሱዋ ዶጎ።
6 ታን ኔና ሀሳየናን አጎፐነ
ታ ናሸቻ ኡባፐ አደ የሩሳላመ ዶሰናን አጎፐ፥
ታ እንጻርሳይ ኮክያና ኦይቀቶ።
7 አቤት መና ጎዳዉ፥ የሩሳላመ ኦሞደትያ ጋላስ፥
ኤዶማ አሳቱ ኦዳዋ ሀሳያ፤
ኡንቱንቱ፥ "ኮልተ! ኮልተ!
ህርክ ጻጱዋ ጋካናዉ ላልተ!" ያጌዳዋ ዶጎፓ።
8 ባብሎነ ቢታዉ፥ ኔንካ ባያና!137:8 ሳፃ 18:6
ኔን ኑ ቦላን ኦዳ ኢታ ኦሱዋ፥
ነ ቦላ ኦያዌ አንጀቴዳዋ።
9 ነ ጉ ናናቱዋ ኦይቂደ፥
ዛላ ቦላ ሾጭያዌ አንጀቴዳዋ።