1 አቤት ጾሳዉ፥ ኔን ኑና መናዉ አያዉ አጋዲ?

ነ ሀንቁ ነ ቆሩዋን ደእያ ዶርሳቱዋ ቦላ፥

አያዉ ሱሌዴ?

2 ኔን በን ዶሬዳ አሳ፥ ኔን

ነዉ ቡዞ ኦደ ዎዜዳ ዛራቱዋ ሀሳያ።

ኔን ደኤዳ ጽዮነ ደርያ ቆፓ።

3 አነ ነ ጌሻ ጎሊ ኮለቴዳ ሳኣ ያደ ጼላ።

ሞርከቱ አን ደእያባ ኡባ ይሴድኖ።

4 ነ ሞርከቱ ነ ጌሻ ጎልያ ግዶን፥

"ኑን ጾኔዶ" ያጊደ ገሬሬድኖ።

ጾኑዋ ማላታ ያጊደ፥ ባረንቱ ባንድራ ኤሴድኖ።

5 ኡንቱንቱ ም ቃንጻናዉ ባረንቱ ካልታ፥

ቁ ኦደ፥ ኤቄዳ አሳቱዋዳን ሀኔድኖ።

6 ኡንቱንቱ ማሰቴዳ ሳንቃ ኡባ፥

ባረንቱ ካልታንነ ማዶሻንነ መን የጌድኖ።

7 ጌሻ ጎልያ ታማን ጹጊደ ይሴድኖ፤

ነዉ ጎይንያ ሳኣ ቱንሴድኖ።

8 ባረንቱ ዎዛናን፥ "ኡንቱንታ ኑን፥

ኡባና ይሳና" ያጊደ ቆፔድኖ።

ቢታን አሳይ ጾሳዉ ጎይንያ ሳኣ ኡባ ታማን ጹጌድኖ።

9 ሄ ዎደ ማላይ ኑዉ እመተናን እጼዳ፤

ትምቢትያ ኦድያዌ እቱነ ባዋ።

ሀዋዳን ሀኒደ፥ ዎይሳ ዎድያ ደአነንቶ፥

ኤርያ አሳይ ኑ ግዶን እቱነ ባዋ።

10 አቤት ጾሳዉ፥ ነ ሞርከቱ፥

ዎይሳ ዎድያ ነ ቦላ ቅሊጫኔ?

ኡንቱንቱ ነ ሱን መናዉ ቦራኔ?

11 ነ ኩሽያ ሺሻ አካደ አያዉ ጋምአይ?

ነ ኡሸቻ ኩሽያ ነ ቁማዩዋፐ ከሳደ ኡንቱንታ ይሳ።

12 ግዶፐነ፥ አቤት ጾሳዉ፥

ኔን በንፐካ ታ ካትያ፤

ኔን ቢታ ቦላ አቶተ አሃዳ።

13 ነ ዎልቃማ ዎልቃን ኔን አባ ሻካዳ፤

አ ግዶን ደእያ ዳዊያ ሁጰቱዋ ኔን ቆጻዳ።

14 ሌዋታና ግያ ዳዊያ ሁጰቱዋ ቆጻደ፥

አ አሹዋ ባዙዋን ደእያ መታቶ፥

ቁማ ኦደ እሜዳዌ ኔና።✝

15 ኔን ፑልቶቱዋ ዶያ የዳዳ፤

ኡባ ገደ ጎግያ ሻፋቱዋ ቃይ መልሳዳ።

16 ጋላሳይ ነዋ፤ ቃማይካ ነዋ፤

ቃይ አዋነ አግና ኡንቱንቱ ሳኣን ዎዳዌ ኔና።

17 ቢታዉ ዛዋ ዎዳዌ፥

ባልጉዋነ ቦንያ መዳዌ ኔና።

18 ሽን አቤት መና ጎዳዉ፥ ነ ሞርከቱ፥

ኔና ዎት ቅሊጬድኖንቶ፥

ቦዛ አሳቱ ነ ሱን ዎት ቦሬድኖንቶ ሀሳያ።

19 ነዉ ሞደትያዋንቱ ሸምፑዋ

ኢታ ሞርከቶ አደ እሞፓ።

መቶታንቻቱዋ መናዉ ዶጎፓ።

20 ኑ ቢታን ደእያ ማ ሳአይ ኡባይ፥

ማካላንቻቱዋን ኩሜዳ ድራዉ፥

ኔን ኑዉ ጫቄዳ ጫቁዋ ቆፓ።

21 ናቀቴዳዋንታ ዬላዮፓ፤

ህዬሳቱነ መቶታንቻቱ ነ ሱን ጋላትኖ።

22 አቤት ጾሳዉ፥ ደንዳ፤ ነ የዉዋ ሞተታ።

ገዞ አሳቱ ጋላሳ ኡባን፥

ነ ቦላ ቅሊጬዳዋ ሀሳያ።

23 ነ ሞርከቱ ነ ቦላ ዋስያ ዋሱዋነ

ኔና እጽያዋንቱ፥

ፓጭ ባይናን ቅሊጭያ ቅሊጩዋ ዶጎፓ።