ማዝሙርያ 64

ናጋናዳን ሺቆ ዎሳ

ዛማረቱዋ ካፖ የጸቴዳ፥ ዳዊታ ማዛሙርያ

1 አቤት ጾሳዉ፥ ታን ማጋንያ ማጋና ኔን ስሳ።

ታን ታ ሞርከቶ ያያድ፤ ታና አሻ።

2 ኢታቱዋ ማቁዋፐነ፥

ኢታ ኦያዋንቱ ሽቁዋፐ ታና ገን።

3 ኡንቱንቱ ባረንቱ እንጻርሳ ማሻዳን ሌፌድኖ፤

ቃይ ማርዘ ቃላቱዋ፥

ዎንዳፍያ ፖዳን ዱካናዉ ጊግሴድኖ።

4 ኡንቱንቱ ቆሰቲደ፥

ባረንቱ ዎንዳፍያ ጽሎ አሳ ቦላ ዳፊኖ፤

አኬካይ ባይናን ዱኪኖ፤ ኡንቱንቱ ያይክኖ።

5 ኡንቱንቱ ባረንቱ ኢታ ማቆ እቱ እቱዋ ምንኖ፤

ባረንቱ ጲርያ ቆስያሳ ዞረቲኖ።

ኡንቱንቱ፥ "ኑና ኦን በአኔ?" ያጊኖ።

6 ኡንቱንቱ ኢታባ ማቀቲደ፥

"ኑን ሎኦ ማቁዋ ማቀቴዶ" ያጊኖ።

ሄዌነ፥ አሳዉ ዎዛናይነ ካሀይ ጪማ ግድያዋ በሴ።

7 ሽን ጾሳይ ኡንቱንታ ባረ ዎንዳፍያን ዱካና፤

ኡንቱንቱ አኬከናን ማዱጻና።

8 ኡንቱንቱ ማቁዋ ድራዉ፥

እ ኡንቱንታ ይሳና፤

ኡንቱንታ በእያ ኡባይ ሁጲያ ቃና።

9 ሄ ዎደ አሳይ ኡባይ ጾሳዉ ያያና፤

አ ኦሱዋባ ኦዳናነ ዛር ዛሪደ ቆፓና።

10 ጽሎቱ መና ጎዳን ናሸትኖነ፥

አኮ ባቃቲደ አቲኖ፤

ዎዛና ሱረቱ ኡባይ ጋላትኖ።