ጾሳይ አሽያዋ ቆንጭስያ ዎሳ
ዛማረቱዋ ካፖ፥ ማስጰጾምያንነ ሶባላን ደኤዳ ሶርያ አሳቱዋና ኦለቴዳ ዎደነ፥ ዮኣብ ጉየ ስሚደ ማጽንያ ዛንጋራን ታማነ ላኡ ሻኡ አሳ ዎዳ ዎደ፥ ዳውት ትምርትያዉ ጻፌዳ ዎሳ። አድልያ ጪሻ ዋ. ማርካተ ዎሳ።
1 አቤት ጾሳዉ፥ ኔን ኑና አጋዳ፤
ኑና መንዳ።
ኔን ኑና ሀንቀታዳ፤
ሽን ሀእ ኑኮ ስማ።
2 ኔን ቢታ ቃዳነ ዛእሳዳ፤
ቢታይ ኮኮርያ ድራዉ፥ ኔን አ ዛኡዋ ባራ።
3 ኔን ነ አሳ መቱዋ በሳዳ፤
ኔን ኑና ጋንድጋርስያ ዎይንያ ኡሻዳ።
4 ነዉ ያይያዋንቱ፥
ባረንቱ ሞርክያ ዎንዳፍያፐ አታና ማላ፥
ማላ እማዳ።
5 ኔን ሲቅያዋንቱ አታና ማላ፥
ነ ኡሸቻ ኩሽያን ኑና አሻ፤
ኔን ኑዉ አላ።
6 ጾሳይ ባረ ጌሻ ሳኣን ሀዋዳን ያጌዳ፤
"ታን ጾናደ ሰኬማ ቢታ ሻካና፤
ቃይ ሱኮታ ዛንጋራ ልካና።
7 ጋላኣደ ታዋ፤ ምናሰካ ታሳ፤
ኤፍሬም ታ ሁጲያ ናግያ ቆብያ፤
ይሁዳይ ታ ካዉተ ጻምኣ።
8 ሞኣበ ታን ሜጨትያ ኩይጻሩዋ፤
ኤዶም ታዋ ግድያዋ ኤርሳናዉ ታ ጫማ አ ቦላ ዎይ፤
ታን ፕልስጼማ ጾናደ ገሬራይ" ያጌዳ።
9 ግምበቴዳ ካታማኮ፥ ታና ኦኔ አፋናዌ?
ኤዶማ ጋካናዉ ታና ኦኔ ካለናዌ?
10 አቤት ጾሳዉ፥ ኑና አጌዳዌ ኔና ግድኪ?
አቤት ጾሳዉ፥ ኔን ኑ ቶራንቻቱዋና ኦላዉ ከሳካ።
11 አሳ ማዱ ፓና ድራዉ፥
ሞርክያና ኦለታናዉ ኔን ኑና ማዳ።
12 ጾሳ ዎልቃን ኑ ሞርከቱዋ ኑን ጾናና፤
ኑ ሞርከቱዋ የናዌ አ።