1 አቤት መና ጎዳዉ፥ ታን ኔና ጼሳይ፤

ታና ማዳናዉ ኤሌላ።

ታን ኔኮ ዋስያ ዎደ፥ ታ ኮሻ ስሳ!

2 ታ ዎሳይ እጻና ጩዋዳን፥

ነ ስን ሺቆ፤✝

ታን ታ ኩሽያ ምጭያዌ፥

ነዉ ኦማርሳ ያርሹዋ ማላ ግዶ።

3 አቤት መና ጎዳዉ፥ ታ ዶና ናግያዋ ዎ፤

ታ መተርሻቱዋ ፐንግያን ዛባይንያ ኤሳ።

4 ባይዙዋ ኦያ አሳቱዋና፥

ኢታ ኦሱዋ ኦና ማላ፥

ታ ዎዛና ኢታባኮ ዛሮፓ።

ኡንቱንቱ ግብራካ ታና ሙዞፓ።

5 ጽሎ አሳይ ታና አገና ሲቁዋን

ሴራናዉነ ሙራናዉ ዳንዳዬ፤

ኡንቱንቱ ታና ባቆፐ ሄዌ ታ ሁጲያን ዛይትያ ኦክያዋ ማላ፤

አያዉ ጎፐ፥ ታን ኡባ ገደካ

ኢታቱዋ ኦሱዋ ቦላ ዎሳይ።

6 ኡንቱንቱ ዳናቱ ዛላ አፉዋና፥

ዱገ ኦለትያ ዎደ፥

ታ ቃላይ ቱማ ግድያዋ ኡንቱንቱ አሳይ ኤራና።

7 ቢታይ ጎሸትያዋዳንነ

ጉሉ መኤረትያዋዳን

ኡንቱንቱ መቀይካ ዱፉዋ ዶናን ላለታና።

8 አቤት ኡባ ሞድያ መና ጎዳዉ፥

ታ አይፊ ኔና ጼሌ፤

ታን ኔኮ ባቃታደ አታይ፤

ታና ሀይቆ አደ እሞፓ።

9 ኡንቱንቱ ታዉ ዎዳ ግትያፐነ፥

ኢታ ኦያዋንቱ ጲርያፐ ታና ናጋ።

10 ታን ሳሮ አያ ዎደ፥

ኢታቱ ባረንቱ ዎዳ ግትያን ኦይቀትኖ።