ኢታ ቦላን ፕርዳ
ዛማረቱዋ ካፖ፥ "ናኣ ሀይቁዋን" የጸቴዳ፥ ዳዊታ ማዝሙርያ።
1 አቤት መና ጎዳዉ፥ ታን ኔና ታ ኩመን ዎዛናፐ ጋላታና፤
ኔን ኦዳ ማላልስያ
ነ ኦሱዋ ኡባካ ኦዳና።
2 ኔናን ናሸታናነ ሀሹ ጋና።
ኡባፐ ቂያ ጾሳዉ፥
ታን ነ ሱንዉ ጋላታ የጻና።
3 ታ ሞርከቱ ጉየ ስምያ ዎደ፥
ነ ስንፐ በት ያና።
4 ኔን ታዉ ጽሎ ፕርዳ ፕርዳዳ፤
ኔን ጽሎተን ፕርዳደ፥
ነ ካዉተ አራታን ኡታዳ።
5 ኔን ካዉተ ሴራዳ፤
ኢታቱዋካ ይሳዳ።
ኔን ኡንቱንቱ ሱን መ መናዉካ ቁጫ ድጋዳ።
6 ሞርከቱ መና ዩዋ ዬድኖ፤
ቃይ ኡንቱንቱ ካታማቱዋ ኡባና ቆላ ድጋዳ።
ኡንቱንቱ ኡባና ዶገት አቴድኖ።
7 ሽን መና ጎዳይ መናዉ ካተቲደ ደኤ፤
እ ባረ ካዉተ አራታ ፕርዳዉ ጊግሴዳ።
8 ሀ ሳኣ ጽሎተን ፕርዳና፤
አሳቱዋካ ሱረተን ፕርዳና።
9 መና ጎዳይ ኡንኤቴዳዋንቶ ባቃት አትያዋ፤
መቶ ዎድያንካ ገል አትያ ጌሱዋ።
10 ነ ሱን ኤርያዋንቱ ኔናን አማነቲኖ፤
አያዉ ጎፐ፥ መና ጎዳዉ፥ ኔን ኔና ኮይያዋንታ የጋ አጋ በይካ።
11 ጽዮነ ደርያን ካተት ኡቴዳ መና ጎዳዉ ጋላታ የጽተ።
እ ኦዳ ኡባባካ አሳ ኡባዉ ኦድተ።
12 አያዉ ጎፐ፥ ሱ ጉስያዋንቶ
ሀሉዋ ከስያ ጾሳይ
ናቀቴዳዋንቱ ዋሱዋ ሸነኮ ጌና።
13,14 አቤት መና ጎዳዉ፥ ጽዮነ አሳ ካርያን ታን ኤቃደ፥
ነ ጋላታ ኦዳና ማላነ
ሄዋን ነ አቶተን ሎይ ናሸታና ማላ፥
ታ ሞርከቱ ታና የደርስያዋ በአ።
ኔን ነ ማሮታን፥ ሀይቁዋፐ ታና አሻ።
15 ካዉተቱ ባረንቱ ቦኬዳ ኦላን ባረንቶ ኩንዴድኖ።
ኡንቱንቱ ቆስ ዎዳ ጲሪ ኡንቱንቱ ገድያ ኦይቄዳ።
16 መና ጎዳይ ባረ ጽሎ ፕርዳን ባረዉ ኤረቴዳ፤
ኢታ አሳይ ባረ ኩሽያን ኦዳ ኦሱዋ ጲርያን ኦይቀቴዳ።
17 ኢታቱ ዱፉዋ ባና፤
ጾሳ ዶግያ ካዉተቱ ኡባይካ ኡንቱንቱዳን ሀናና።
18 ህዬሳይ ኡባ ገደ ዶገት አተና፤
ዎይ መቶታንቻይ ዎዳ ህዶታይ መናዉ የና።
19 አቤት መና ጎዳዉ፥ አሳይ ነ ቦላ ደንዲደ፥
ባረ ዎልቃን ጬቀተና ማላ፥ ኔን ደንዳ!
ነ ስንን ካዉተቱዋ ቦላ ኔን ፕርዳ።
20 አቤት መና ጎዳዉ፥ ኡንቱንታ ኔን ያሽሳ፤
ኡንቱንቱ አሳ ግድያዋ ኔን ኡንቱንታ ኤርሳ።