ማዝሙርያ 5

ዎንታ ዎሳ

ዛማረቱዋ ካፖ ሱሱላቱዋን የጸቴዳ፥ ዳዊታ ማዝሙርያ

1 አቤት መና ጎዳዉ፥ ታን ኦድያዋ ሀይዛ፤

ታ ኦልያነ ስሳ።

2 ታ ካትያዉነ ታ ጾሳዉ፥

ታና ማዳ ጋደ ታ ኔኮ ዋስይያ ድራዉ፥

ታ ዎሳ ስሳ።

3 አቤት መና ጎዳዉ፥

ዎንታ ዎንታ ጉራን ኔን ታ ቃላ ስሳሳ።

ዎንታ ዎንታ ጉራን ታን ታ ዎሳ ነ ስን ሺሻደ፥

ኔን ታዉ እምያ ዛሩዋ አካና ጋደ ናጋይ።

4 ኔን ኢታተን ናሸተና ጾሳ፤

ኢታባይ ኔናና ደኤና።

5 ጬቀትያዋንቱ ነ ስንን ኤቂክኖ፤

ኢታባ ኦያ ኡባቱዋ ኔን እጻ።

6 ዎርዱዋ ሃሳይያዋንታካ ኔን ይሳሳ።

ሱ ጉስያዋንታነ ጭምያ አሳቱዋ፥

ጾሳይ ሸነቴ።

7 ሽን ታን ነ ማሮታ ዳሩዋን

ነ ጎልያ ገላና።

ነ ጌሻ ጎልያኮ ስማደ፥

ነዉ ያሻተን ጎይናና።

8 አቤት መና ጎዳዉ፥ ታና ነ ጽሎተን ካለ፤

ታ ሞርከቱዋ ድራዉ ጋደ፥

ነ ኦግያ ታ ስንን ሱርሳ።

9 ኡንቱንቱ ዶናፐ ከስያዌ አማንና።✝5:9 ሮመ 3:13

ኡንቱንቱ ዎዛናንካ ገኒ ኩሜዳ፤

ኡንቱንቱ ዶናይ ዶየቴዳ ዱፉዋ ማላ፤

ኡንቱንቱ ባረንቱ እንጻርሳን ጭሚኖ።

10 አቤት ጾሳዉ፥ ኡንቱንታ ኔን ፕርዳ፤

ኡንቱንቱ ኮባይ ኡንቱንታ አክ ቦ።

ኡንቱንቱ ናጋራይ ዳሮ ግዴዳ ድራዉ፥

ኔን ኡንቱንታ የደርሳ፤

አያዉ ጎፐ፥ ኡንቱንቱ ነ ቦላ ማካሌድኖ።

11 ሽን ኔኮ ባቃት ቆሰት አትያ ኡባይ ናሸትኖ፤

ኡንቱንቱ ኡባ ገደ ናሸቻን የጽኖ።

ኔንካ ኡንቱንታ ናጋና፤

ነ ሱን ሲቅያ ኡባቱ ኔናን ሎይ ናሸትኖ።

12 አያዉ ጎፐ፥ አቤት መና ጎዳዉ፥

ቱሙካ ኔን ጽሉዋ አንጃሳ።

ኔን ጎንዳሊ ካምያዋዳን ነ ኬካተን አ ካማሳ።