ማዝሙርያ 57

ማዱዋ ደማናዉ ሺቄዳ ዎሳ

ዛማረቱዋ ካፖ፥ ጎንጎሎ ግዶፐ ሳኦላፐ ባቃቲደ ብ ስምና ዳዊታ ዎሳ። "ይሶፓ" ጌተትያ ዎሳን የጸቴዳ ዎሳ።

1 ታና ማራ፤ አቤት ጾሳዉ፥ ታና ማራ፤

ታን ኔኮ ባቃታይ።

ባሻይ አና ጋካናዉ፥

ነ ቀፍያ ግዶን ባቃታደ አታይ።

2 ታን ኡባፐ ቂያ ጾሳዉ፥

ታዉ ኡባባ ኦያ ጾሳዉ ዋሳይ።

3 ጾሳይ ሳሉዋፐ ማዱዋ ኪቲደ፥ ታና አሻና፤

ታና ናቂያዋንታ ካዉሻና፤

ጾሳይ አገና ባረ ሲቁዋነ

ባረ ቱማተ ታዉ ኪታና።

4 ታን ታ ሞርከቱዋ ግዶን፥

አሳ ቦንቂደ ምያ ጋሙዋ ማላቱዋ ግዶን ደአይ።

ኡንቱንቱ አቻይ ቶራነ ዎንዳፍያ ማላ፤

ኡንቱንቱ እንጻርሳይ ኩሳ ማሻ ማላ።

5 አቤት ጾሳዉ፥ ኔን ሳሎቱዋፐ ቦላና ቁ ቁ ጋ፤

ነ ቦንቹ ሳኣ ኡባ ቦላ ደኦ።

6 ኡንቱንቱ ታ ገድያዉ ጲርያ ዎድኖ፤

ታን መቶታደ ሆካድ።

ኡንቱንቱ ታ ኦግያን ኦላ ቦኬድኖ፤

ሽን ሄ ኦላን ባረንቶ ኩንዴድኖ።

7 ታ ዎዛናይ ምኒደ ደኤ፤

አቤት ጾሳዉ፥ ታ ዎዛናይ ምኒደ ደኤ።

ታን ነዉ የጻናነ ኔና ሳባና።

8 ታ ሸምፓቴ፥ ቤጎታ!

ዲዉነ ማስንቆ፥ ቤጎትተ!

ታንካ ዎንታ ጉራና ቤጎታና።

9 አቤት ጾሳዉ፥ ታን ኔና አሳ ግዶን ጋላታና፤

ቃይ ካዉተ ግዶን ኔና ሳባና።

10 አያዉ ጎፐ፥ አገና ነ ሲቁ ዎልቃማ፤

ሳሎቱዋ ጋኬዳ።

ነ ቱማተይካ ቦላ ሻርያዳን ቄ።

11 አቤት ጾሳዉ፥

ሳሎቱዋፐ ቦላና ቁ ቁ ጋ!

ነ ቦንቹ ሳኣ ኡባ ቦላ ግዶ።