1 ታን መና ጎዳ ዳንዳያን ናጋድ፤

እ ታኮ ስሚደ፥ ታ ዋሱዋ ስሴዳ።

2 ባሻ ኦላፐ፥ ሀልያ ኡርቃፐ ታና ከሴዳ።

ታ ገድያ ዛላ ቦላን ኤሴዳ፤

ቃይ ታ ሀመካ ሳሩዋ ኦዳ።

3 እ ታ ዶናን ኦራ የ ዎዳ፤

ሄ የይነ፥ "ኑ ጾሳይ ጋላተቶ" ያግያዋ።

ዳሮቱ በኢደ፥ ያያናነ መና ጎዳን አማነታና።

4 መና ጎዳ ባረዉ አማነትያዋ ኦዳ አሳይ፥

ኦቶራንቻቱዋኮ ጼለናዌነ፥

ዎርዳንቻቱዋኮ ስመና አሳይ አንጀቴዳዋ።

5 አቤት መና ጎዳዉ፥ ታ ጾሳዉ፥

ኔን ዳሮ ማላልስያባ ኦዳ፤

ኔናና ልከትያዌ ኦንነ ባዋ!

ኔን ኑዉ ቆፔዳ ሎኦ ቆፋ

ኦንነ ፓይዳናዉ ዳንዳየና።

ሄዌ ታን ኦድና፥ ዉርያዋ ግደና።

6 ኔን ያርሹዋነ እሙዋ ኮያባካ፤✝

ሽን ስሳና ማላ፥ ታዉ ሀይ ዶያዳ።

ጹግያ ያርሹዋነ ናጋራ ያርሹዋ ኔን ኮያባካ።

7 ሄዋፐ ጉይያን ታን፥ "ጻ ማጻፋን

ታባይ ጻፈቴዳዋዳን፥ ታን ያድ።

8 አቤት ታ ጾሳዉ፥ ታን ኔን ኮይያዋ ኦናዉ ዶሳይ፤

ነ ህጊ ታ ዎዛና ግዶን ደኤ" ያጋድ።

9 ዎልቃማ ሺቁዋን ታን፥ "ነ ጽሎተ"

ምሽራቹዋ ኦዳና።

አቤት መና ጎዳዉ፥ ኔን ኤርያዋዳንካ፥

ታን ታ ዶናን ኦድያዋ አጋበይከ።

10 ታን ነ ጽሎተ ታ ዎዛና ግዶን ቆሳበይከ፤

ኔን አማነትያዋነ አሽያዋ ኦዳድ።

ቃይ አገና ነ ሲቁዋነ ነ ቱማተ፥

ነ ዎልቃማ ሺቁዋፐ ገንበይከ።

11 አቤት መና ጎዳዉ፥ ነ ማሮተ ታፐ ሃሶፓ።

አገና ነ ሲቁነ ነ ቱማተይ

ታና ኡባ ዎደ ናጎ።

12 አያዉ ጎፐ፥ ፓይዱ ባይና ኢታባይ ታና ዶዴዳ።

ታ ኢታተይ ታና ጋኪደ ጎዜዳ፤

ታን ጼላናዉ ዳንዳይከ።

ታ ኢታ ኦሱ ታ ሁጲያ ብናናፐ ዳሬዳ፤

ታ ዎዛናይ ታ ግዶን ሴሬዳ።

13 አቤት መና ጎዳዉ፥ ታና አሻናዉ ኤኖ ጋ፤

አቤት መና ጎዳዉ፥ ታና ማዳናዉ ኤሌላ።

14 ታና ዎናዉ ኮይያዋንቱ

ኡባካ ዬላትኖነ ካዉሽኖ።

ታን ቆሄታናዋ አሞትያዋንቱ

ካዉሺደ ጉየ ስምኖ።

15 ታ ቦላ፥ "አዉ ሀሹ! ሀሹ!"

ጌዳዋንቱ ጾነቴዳ ድራዉ፥ ዬላትኖ።

16 ሽን ኔና ኮይያ ኡባቱ፥

ኔናን ናሸትኖነ ሀሹ ጊኖ።

ቃይ ነ አቶተ ዶስያዋንቱ ኡባቱ፥

"መና ጎዳይ ግታቶ!" ያግኖ።

17 ታን ህዬሳነ መቶታንቻ፤

ታዋ ጎዳይ ቆፖ።

ታና ማድያዌነ አሽያዌ ኔና፤

አቤት ታ ጾሳዉ፥ ጋምኦፓ።