ማዝሙርያ 48

ጾሳ ካታማት ጽዮኖ

ቆራሀ ናናቱዋ ማዛሙርያ፤ የ

1 መና ጎዳይ ዎልቃማ።

ኑ ጾሳ ካታማን አ ጌሻ ደርያን አ ጋላታይ አዉ በሴ።

2 ጾሳ ደርያ ጽዮነ ቃነ ሎአ።✝48:2 ማቶሳ 5:35

ፑደሃ ባጋና ደእያ

ሄ ዎልቃማ ካትያ ካታማይ ሳኣ ኡባዉ ናሸቻ።

3 ሄ ካታማ ግምቢያ ግዶን፥

ባረናን ሳሮ አሳይ ደእያዋ ጾሳይ በሴዳ።

4 ካተቱ ባረንቱ ቶራንቻቱዋና እትፐ ሺቄድኖ፤

ጽዮነ ኦላናዉ ዬድኖ።

5 አ በኢደ፥ ማላለቲድነ ዳጋሚደ፥

ባቃቴድኖ።

6 ኡንቱንቱ ሄዋን ደእሺና፥

ኡንቱንታ ያሻ ኮኮርሳይ ኦይቄዳ፤

ኦይይ ኦይቄዳ ምሽራቲዳን ኡንኤቴድኖ።

7 አዋይ ዶልያ ባጋ ዎልቃማ ጫርኩዋን፥

መእያ ታርሴሰ ማርካብያዳን ኡንቱንቱ ኮኮሬድኖ።

8 ኑን ስሴዳዋዳንካ፥

ኡባፐ ዎልቃማ መና ጎዳ ካታማን፥

ኑ ጾሳ ካታማን፥ እ ኦዳዋ በኤዶ።

ጾሳይ ሄ ካታማ መናዉ ምንስ ኤሴ።

9 አቤት ጾሳዉ፥ ነ ጌሻ ጎልያ ግዶን

አገና ነ ሲቁዋ ቆፔዶ።

10 አቤት ጾሳዉ፥ ነ ሱንዳንካ፥

ነ ጋላታይ ሳኣ ጋጻ ጋኬዳ።

ነ ኡሸቻ ኩሺ ጽሎተን ኩሜዳዋ።

11 ነ ፕርዳ ድራዉ፥

ጽዮነ አሳይ ናሸቴ፤

ይሁዳ ሞቱካ ናሸቲኖ።

12 ጽዮነ ዩሹዋን ሀመትተ፤

እ ዩሹዋን ያነ ሃነ ስመረትተ።

እ ዎችያ ሳ ፓይድተ።

13 ይያ የለታዉ ኦዳናዳን፥

እዝ ግምቢያ አኬክተነ እዝ አኮ ግምቢያ ጾሞስተ።

14 ህንተ፥ "መ መናዉ

ሀ ጾሳይ ኑ ጾሳ፤

እ ኑና ሀይቃና ጋካናዉ ካለና" ያጊደ ኦድተ።