ጾሳይ ዶሬዳ ካትያ ዳውት ጻፌዳ ማዛሙርያ
1 መና ጎዳይ ታ ጎዳ፥110:1 ማቶሳ 22:44፤ ማር. 12:36፤ ሉቃሳ 20:42-43፤ ኪታ 2:34-35፤ 1 ቆሮ. 15:25፤ ኤፈ. 1:20-22፤ ቆል. 3:1፤ እብራ. 1:13፤ 8:1፤ 10:12-13
"ታን ነ ሞርከቱዋ ኔን ገድያን
የ ኤቂያዋ ኦና ጋካናዉ፥
ሀዋን ታፐ ኡሸቻ ባጋና ኡታ" ያጌዳ።
2 መና ጎዳይ ነ ምኖተ ጻምኣ ጽዮነፐ ኪታና፤
ያትና፥ "ነ ሞርከቱዋ ሞዳ!" ያጋና።
3 ኔን ነ ሞርከቱዋና ኦለትያ ጋላስ፥
ነ አሳይ ኤኖ ጋና።
ዎንታ ጉራ ከተርሳዳን፥
ነ ዎዳላ አሳይ ኔኮ ጌሻ ደረቱዋን ሺቃና።
4 መና ጎዳይ፥ "ማልካ ጸደቅ ቄስያ ግዴዳዋዳን፥
ኔንካ መናዉ ቄስያ ግዳና" ያጊደ ጫቄዳ፤
እ ባረ ቆፋ ላመና።110:4 እብራ. 5:6፤ 6:20፤ 7:17፣ 21
5 ጎዳይ ነ ኡሸቻን ደኤ፤
ባረ ሀንቁዋ ጋላስ እ ካተቱዋ ክንቼሬና።
6 ካዉተ ቦላ እ ፕርዳና፤
ኦላ ደምባቱዋካ አሃ ጻላላ ኦና፤
ሳኣን ኡባን ደእያ ካተቱዋ እ መንሬና።
7 ካቲ ኦግያ ማታን ደእያ ሃ ፑልቱዋፐ ኡሺደ፥
እ ባረ ሁጲያ ቁ ኦና።