1 አቤት መና ጎዳዉ፥ ኢታ አሳቱዋፐ ታና አሻ፤

ማካላንቻ አሳቱዋፐ ታና ናጋ።

2 ኡንቱንቱ ኡባ ዎደ፥

ኢታባ ኦናዉ ማቀቲኖ፤

ኡባ ጋላስካ፥

ዋላሳ ደንናዉ ቆፒኖ።

3 ኡንቱንቱ ባረንቱ እንጻርሳ ሾሻዋዳን ቃራዪኖ፤✝

ኡንቱንቱ ዶናፐ አሳ ዎያ ሀሱዋ ሾሻ ይሻ ማላ ሃሳያይ ከሴ።

4 አቤት መና ጎዳዉ፥ ኢታ አሳቱዋ ኩሽያፐ፥

ታና አሻ፤

ታ ገድያ ቃጻናዉ ቆፕያ ማካላንቻ አሳቱዋፐ ታና ናጋ።

5 ኦቶራንቻ አሳቱ ታዉ ዲዛ ጊግሴድኖ፤

ግትያ ሂጼድኖ፤

ታና ኦይቃናዉ ጲርያ ኦግያን ዎድኖ።

6 ታን መና ጎዳ፥ "ኔን ታ ጾሳ" ያጋይ።

አቤት መና ጎዳዉ፥ ታን ዋትዋትያ ዋትዋቱዋ ስሳ።

7 አቤት ኡባ ሞድያ መና ጎዳዉ፥

ታና አሽያ ምኖ፥

ኦላ ጋላስ ታዉ ጎንዳለ ግዳዳ።

8 አቤት መና ጎዳዉ፥

ኢታቶ ኡንቱንቱ አሙዋ እሞፓ፤

ኡንቱንቱ ኢታ ማቁዋ ፖልሶፓ።

9 ታ ሞርከቱዋን ታና ጾንሶፓ፤

ኡንቱንቱ ዶናፐ ከስያ ኢታባይ ኡንቱንቶ ስሞ።

10 ኡንቱንቱ ቦላ ጹግያ ቦንቁ ቆለቶ፤

ኡንቱንቱ ታማን ኦለትኖ፤

ሄዋፐ ላኤን ደንደና ኦላን ኦለትኖ።

11 ዝግርያዋንታ ቢታይ ቶኮፖ፤

ማካላንቻ አሳቱዋ ኢታባይ ሻንካቲደ ኦይቆ።

12 መና ጎዳይ ህዬሳቶ ፕርድያዋነ፥

መቶታንቻቱዋ ማታ ናግስያዋ ኤራይ።

13 ቱሙፐ ጽሎቱ ነ ሱን ጋላታና፤

ሱረ አሳቱ ነ ስንን ደአና።