1 አቤት መና ጎዳዉ፥ አገና ነ ሲቁዋባ፥

ታን መናዉ የጻና።

ጾሳይ አማነትያዋ ጋደ፥

የለታ ኡባዉ ታ ዶናን አዋያና።

2 ታን አገና ነ ሲቁ መናዉ ኤቄዳዋነ

ኔን ነ ቱማተ ሳሉዋዳን ምንሳደ ኤሴዳዋ ኦዳና።

3 ኔን፥ "ታን ዶሬዳዋና ጫቁዋ ጫቀታድ።

ታ ቆማ ዳዊታዉ ሀዋዳን ያጋደ ጫቃድ፤

4 ‘ታን ነ ዘረ መናዉ ካዉና፤✝

ነ ካዉተ አራታ የለታ ኡባዉ ምንሳና’ " ያጋዳ።

5 አቤት መና ጎዳዉ፥ ሳሎቱ፥

ነ ማላልስያ ኦሱዋ ኦድኖ፤

ነ አማነትያዋ ኪታንቻቱዋ ሺቁ ኦድኖ።

6 ሳሉዋን መና ጎዳና ልከታናዉ ዳንዳይያዌ ኦኔ?

ሳሉዋ መተቱዋ ግዶን ቃይ መና ጎዳ ማል ኦኔ?

7 ጌሻቱዋ ሺቁዋ ግዶን ጾሳይ ያየቴዳዋ።

ባረና ዶዴዳዋንቱ ኡባፐ አደ፥ ሎይ ዳጋንያዋ።

8 አቤት ኡባፐ ዎልቃማ መና ጎዳዉ፥ ጾሳዉ፥

ኔናዳን ዎልቃማይ ኦኔ?

አቤት መና ጎዳዉ፥ ኔን ኡባባንካ አማነትያዋ።

9 ኔን ቡልአከትያ አባ ዎልቃ አዛዛሳ።

ደንድያ ቤታካ ጮኡ ኦሳ።

10 ኔን ራኣባ ግያ አባ ዳዊያ፥

ዎ የጌዳዋዳን መንሬዳ፤

ነ ሞርከቱዋ ነ ዎልቃማ ቀስያን ላላዳ።

11 ሳሎቱ ነዋንታ፤ ሳአይካ ነዋ፤

ቢታነ አን ኩሜዳ ኡባባ ኔን መዳ።

12 ሁጲሳነ ገድሳ ኔን መዳ፤

ታቦራነ ሄርሞነ ግያ ዎልቃማ ደረቱ

ናሸቻን ነ ሱን ሳቢኖ።

13 ነዉ ዎልቃማ ቄሲ ደኤ፤

ነ ኩሺ ምና፤

ነ ኡሸቻይ ዎልቃማ።

14 ጽሎተይነ ሱረ ፕርዳይ

ነ ካዉተ አራታዉ ባሶ።

አገና ሲቁነ ቱማተይ ነ ስንን ቢኖ።

15 አቤት መና ጎዳዉ፥ ናሸቻን እልልያዋንቱነ

ነ ሶምኡዋ ፖኡዋን ሀመትያዋንቱ አንጀቴዳዋንታ።

16 ነ ሱንን ጋላሳ ኡባ ናሸቲኖ፤

ነ ጽሎተ ድራዉ፥

ኡንቱንቱ ኔና ቁ ቁ ኦኖ።

17 ኡንቱንቱ ጬቀትያ ዎልቃይ ኔና፤

ነ ናሹዋን ኑ ካጪ ቁ ቁ ያጌዳ።

18 ኑ ጎንዳሊ፥ ኑ መና ጎዳሳ፤

ኑ ካቲካ፥ እስራኤልያ ጌሻ ሳ።

19 በን ኔን ነ አማነቴዳ አሳቶ፥

እት ገደ አኩሙዋን ኦዳዳ፤

"አሳ ግዶፐ ዶሬዳዎ ካዉተ አራታ እማዳ።

20 ታ ቆማ ዳዊታ ካተ ከሳድ፤✝

ታ ጌሻ ዛይትያን ኦካደ።

21 ታ ኩሺ አናና ደአና፤

ታ ቀሲካ አ ምንና።

22 አ አይ ሞርኪነ ጾነና፤

አይ ኢታ አሳይነ አ ቶቼና።

23 ታን አ ሞርከቱዋ አ ስንን ክንቼሬና፤

አ እጽያዋንታ ሾጫ የጋና።

24 ታ ቱማተይነ ታ አገና ሲቁ

አናና እትፐ ግዳና።

ታ ሱንን አ ካጪ ቁ ቁ ጋና።

25 ታን አ ካዉተ መደትራንያ አባ ጋካናዉ አሳና፤

አ ዛዋካ፥

ኤፍራጼሰነ ጸግሮሰ ሻፋ ጋካናዉ አሳና።

26 ዳዊተ ታና፥ ‘ኔን ታ አዉዋ፥

ታ ጾሳነ ታና አሽያ ዛላ’ ያጊደ ጼሳና።

27 ታን አ ባይራ ናኣ ኦና፤✝

ሳኣን ደእያ ካተቱዋ ኡባፐ አ ዳርሳና።

28 ታን አገና ታ ሲቁዋ

አዉ መናዉ ናጋና።

ታን አናና ቃላ ጫቁዋ ምንና።

29 ታን አ ዘረ መናዉ ምንሳደ ኤሳና፤

አ ካዉተ አራታካ ሳሉዋዳን ጋምኤና።

30 "ሽን አ ዘረቱ ታ ህግያ አጎፐ፥

ቃይ ኡንቱንቱ ታ ዎጋዳን ሀመተናን እጾፐ፥

31 ኡንቱንቱ ታ አዋዩዋ ሻሮፐ፥

ታ አዛዙዋ ናጋና ዮፐ፥

32 ታን ኡንቱንቱ ናጋራ ድራዉ ጋትማን፥

ኡንቱንቱ ኢታተ ድራዉ፥ ልሱዋን፥

ሾጫደ ሙራና።

33 ሽን ታን አገና ታ ሲቁዋ አፐ አክከ፤

ዎይ ታን አዉ አማነትያዋ አግከ።

34 ታን ኡንቱንቱና ጫቀቴዳ ጫቁዋ ኮልከ፤

ታ ዶናፐ ከሴዳ ቃላ ላምከ።

35 "እት ገደካ መናዉ

ታ ጌሻተን ጫቃ ድጋድ፤

ዳዊተዉ ዎርዶትከ።

36 ሄዌነ፥ አ ዘረይ መናዉ ደአና፤

አ ካዉተ አራታይካ ታ ስንን አዋዳን ጋምአና።

37 ሳሉዋን አማነትያ ማርካ ግድያ አግናዳን፥

ሄ ካዉተይ መናዉ ምን ኤቂ ደአና" ያጋዳ።

38 ሽን ሀእ ኔን

ኦካደ ካተዬዳዋ ቦላ ዳሮ ሀንቀታዳ፤

አ እጻዳነ አጋዳ።

39 ኔን ነ ቆማና ጫቀቴዳ ጫቁዋ ካዳዳ፤

አ ካላቻ ባናን ኦላደ ቱንሳዳ።

40 ኔን አ ካታማ ግምቢያ ኡባ ላላዳ፤

እ ናገትያ ሚጻ ኡባ ባይዛዳ።

41 ኦግያና አያ ኡባቱ አ ቦንቄድኖ፤

እ ባረ ሾሮቶ ቅሊጮ ግዴዳ።

42 ኔን አ ሞርከቶ ጾኑዋ እማዳ፤

ኡንቱንታ ኡባቱዋ ናሸቻዳ።

43 ኔን አ ማሻ ጼራ ቃላምኣዳ፤

ኔን ኦላን አ ማዳባካ።

44 ኔን አ ካዉታ ጻምኣ

አ ኩሽያፐ ዎ አካዳ፤

ቃይ አ ካዉተ አራታ ቢታን ኦላዳ።

45 ኔን አ ያላጋተ ዎድያ ቃምሳዳ፤

ቃይ አ ዬላ ማይዛዳ።

46 አቤት መና ጎዳዉ፥ አዉደ ጋካናዉ ቆንጭኪ?

ኔን መናዉ ጌማይ?

ነ ሀንቁ ታማዳን አዉደ ጋካናዉ ኤጻኔ?

47 ታ ላይይ አይ ኬሻ ቃንንቶ ቆፓ፤

አሳ ኡባ ጮ መላ መዲ?

48 አሳይ ሀይቀናን ጮ ደአናዉ ዋን ዳንዳዪ?

ቃይ ዱፉዋን ገለናዳን፥

ባረና አሻናዉ ዋን ዳንዳዪ?

49 አቤት ጎዳዉ፥ ኔን ነ ቱማተን ዳዊተዉ ጫቄዳ፥

አገና በን ነ ሲቁ ሀቃን ደኢ?

50 አቤት ጎዳዉ፥ ነ ቆማይ

ዎይሳ ቦረቴደንቶ ኔን ሀሳያ።

ታን አሳ ኡባ ቦርያ ዎታ ዳንዳያድታንቶ ቆፓ።

51 አቤት መና ጎዳዉ፥ ሞርከቱ ቅሊጬድኖ፤

ኔን ዶራደ ኦኬዳ ካትያ፥

ታንጉዋን ታንጉዋን ቅሊጬዳዋ ቆፓ።

52 መና ጎዳይ መ መናዉ ጋላተቶ!

አመንእ። አመንእ።