ማዝሙርያ 44

ጾሳይ ናጋናዳን ዎሳ

ዛማረቱዋ ካፖ የጸቴዳ፥ ቆረ ናናቱዋ አኬካ ግንጹዋ

1 አቤት ጾሳዉ፥ አዳ ዎድያን፥

ኔን ኦዳዋ ኑን ኑ ሀይን ስሴዶ፥

ኑ አዎቱዋ ዎድያንካ ነ ኦዳዋ ኑዉ ኦዴድኖ።

2 ካዉተቱዋ ኔን ነ ኩሽያን ላጋደ ከሳዳ፤

ኑ አዎቱዋ ኡንቱንቱ ቢታን ቶካናዉ፤

ሀራ ካዉተቱዋ ሙራዳ፤

ሽን ነ አሳቱዋ አሳዳ።

3 ኡንቱንቱ ባረንቱ ማሻን ኦሊደ፥

ሄ ቢታ ከስበይክኖ፤

ኡንቱንቱ ባረንቱ ኩሽያ ምኖተን ጾንበይክኖ።

ሽን ኔን ኡንቱንታ ሲቄዳ ድራዉ፥

ኡንቱንቱ ነ ኡሸቻ ኩሽያ፥

ነ ቀስያነ ነ ስን ፖኡዋ ዎልቃን ጾኔድኖ።

4 ያቆባ አሳዉ ጾኑዋ አዛዝያ፥

ታ ካቲነ ታ ጾሳይ ኔና።

5 ኔናን ግዲደ፥ ኑ ሞርከቱዋ ኑን ሱግ ኦላና፤

ነ ሱንን ኑ ኤቀትያዋንታ ኑን የና።

6 ታን ታ ቶራን አማነትከ፤

ታ ማሻይካ ታና አሸና።

7 ሽን ኔን ኑና ኑ ሞርከቱዋፐ አሻዳ፤

ቃይ ኑና እጽያዋንታ ኔን ካዉሻዳ።

8 ኑን ኡባ ዎደ ጾሳን ጬቀቴቶ፤

ነ ሱንዉ መናዉ ጋላታ እማና።

9 ሽን ሀእ ኔን ኑና አጋዳ፤ ካዉሻዳ፤

ኑ ቶራ አሳና እትፐ ኦላ ባካ።

10 ኑ ሞርከቱዋ ስንፐ ኑና ባቃትሳዳ፤

ኑ ኤቀትያዋንቱ ኑባ ቦንቄድኖ።

11 ኔን ኑና ዶርሳቱዋዳን ሹካዉ አደ እማዳ፤

ቃይ ካዉተቱዋ ግዶን ኑና ላላዳ።

12 ኔን ነ አሳ ህራይሱዋን ዛልኣዳ፤

አያ ዎያነ ደማበይካ።

13 ኔን ኑና ኑ ሾሮቱ ቦርያዋ፥

ቃይ ኑ ሄራን ደእያዋንቱ ቅሊጭያዋነ ሚጭያዋ ኦዳ።

14 ኔን ኑና ካዉተቱዋ ግዶን ቶሳ ከሳዳ፤

ኑና ኡንቱንቱ ባረንቱ ሁጲያ ቃ ቃ ቅያዋ ኦዳ።

15 ታን ጋላሳ ኩመንን ቶሸታድ።

ታ ሶምእያ ዬላይ ካሜዳ።

16 ታና ሸቂያዋንቱነ ቦርያዋንቱ ጋሱዋን፥

ታና ሞርክያዋንቱነ ማንድያዋንቱ ጋሱዋና።

17 ኑን ኔና ዶግቤናዋ ግዶፐካ፥

ዎይ ነ ጫቁዋ መንቤናዋ ግዶፐካ፥

ሀዌ ኡባይ ኑ ቦላ ሀኔዳ።

18 ኑ ዎዛናይ ኔፐ ጉየ ስምቤና፤

ኑ ገዲ ነ ኦግያፐ ጋጻ ከስቤና።

19 ሽን ኔን ኑና መንሬደ ዶኣ ግዶን የጋዳ፤

ጵ ጎ ማን ካማዳ።

20 ኑ ጾሳ ሱን ኑን ዶጌደንቶ፥

ሀራ ጾሳ ዎሳናዉ ኑን ኑ ኩሽያ ምጬደንቶ፥

21 ዎዛናን ጌሜዳ ጹራ ጾሳይ ኤርያ ድራዉ፥

እ ሀዋ ብዲደ ደመኔ?

22 ሽን ነ ድራዉ፥ ጋላሳ ኡባን ኑና ዎኖ፤✝44:22 ሮመ 8:36

ሹካናዉ አፍያ ዶርሳዳን ፓይደቴዶ።

23 አቤት መና ጎዳዉ፥ ደንዳ! አያዉ ገምእሻይ?

ቤጎታ! መናዉ ኑና አጎፓ።

24 ነ ሶምኡዋ ኑፐ አያዉ ገንይ?

ኑ ቆሁዋነ ኑ ኡንኣ አያዉ ዶጋይ?

25 ኑን ባናን ዱገ ኦለቴዶ፤

ኑ አሳተይካ ቢታና ኦይቀቴዳ።

26 አቤት ጾሳዉ፥ ደንዳ! ኑና ማዳ!

አገና ነ ሲቁዋ ድራዉ፥ ኑና ዎዛ።