1 መና ጎዳ ጋላትተ!✝ አያዉ ጎፐ፥

እ ኬካ፤ አገና አ ሲቁ መናሳ።

2 መና ጎዳይ አሼዳዋንቱነ፥

ሞርከቱዋ ኩሽያፐ ዎዜዳዋንቱ፥

ሄዋዳን ጊደ ሃሳይኖ።

3 ኡንቱንታ እ ቢታቱዋፐ፥

አዋይ ዶልያሳፐነ ዉልያሳፐ፥

ሁጲሳነ ገድሳ ባጋፐ

ሺሼዳዋንታ።

4 ኡንቱንቱፐ እቱ እቱ ባዙዋ ቢታን ዩዬድኖ።

ባረንቱ ደእያ ካታማ ብያ ኦግያ፥

ደማናዉ ዳንዳይበይክኖ።

5 ኡንቱንቱ ኮሻቴድኖነ ሳመቴድኖ፤

ኡንቱንቱ ይባቴድኖ።

6 ኡንቱንቱ መቶቴዳ ዎደ፥

መና ጎዳዉ ዋሴድኖ፤

እ ኡንቱንታ ኡንቱንቱ ዋይያፐ አሼዳ።

7 ኡንቱንቱ ደአና ካታማ ጋካናዉ፥

እ ኡንቱንታ ስታ ኦግያና ካለዳ።

8 አገና አ ሲቆነ፥

እ አሳዉ ኦዳ ማላልስያባዉ፥

ኡንቱንቱ መና ጎዳ ጋላትኖ።

9 አያዉ ጎፐ፥ እ ሳመቴዳዋንታ አሌ፤

ኮሻቴዳዋንታካ ሎኦባ ካልሴ።

10 ኡንቱንቱፐ እቱ እቱ

ጵ ጎ ማ ግዶን ኡቴድኖ፤

ኡንቱንቱ ብራታ ሳንሳላታን ዋየቴድኖ።

11 አያዉ ጎፐ፥ ኡንቱንቱ ጾሳ ቃላዉ ማካሌድኖነ፥

ኡባፐ ቂያ ጾሳ ዞርያ ካድኖ።

12 እ ኡንቱንታ ቱጋ ኦሱዋን ዳቡርሴዳ፤

ኡንቱንቱ ኩንዴድኖ፤

ሽን ኡንቱንታ ማድያዌ ዬዳ።

13 ኡንቱንቱ መቶቴዳ ዎደ፥ መና ጎዳዉ ዋሴድኖ፤

እ ኡንቱንታ ኡንቱንቱ ዋይያፐ አሼዳ።

14 ባረቶ ማፐካ ከሴዳ፤

ኡንቱንቱ ቃሸቴዳ ብራታ ሳንሳላታካ ዱዳ።

15 አገና አ ሲቆነ

እ አሳዉ ኦዳ ማላልስያዎ

ኡንቱንቱ መና ጎዳ ጋላትኖ።

16 አያዉ ጎፐ፥ እ ናሃስያፐ ኦሰቴዳ ፐንግያ መንዳ፤

ብራታ ኩልቡዋካ ኬዳ።

17 ኡንቱንቱፐ እቱ እቱ ቦዛ ግዴድኖ፤

ባረንቱ ኦዳ ናጋራ ጋሱዋንነ፥

ባረንቱ ኢታተ ጋሱዋን ቱጋቴድኖ።

18 ኡንቱንቱ ቁማ ኡባ ሸነቲደ፥

ሀይቆ ማቴድኖ።

19 ኡንቱንቱ መቶቴዳ ዎደ፥ መና ጎዳዉ ዋሴድኖ፤

እ ኡንቱንታ ኡንቱንቱ ዋይያፐ አሼዳ።

20 እ ባረ ቃላ ኪቲደ፥ ኡንቱንታ ፓዳ፤

ዱፉዋን ገልያዋፐ አሼዳ።

21 አገና አ ሲቆነ

እ አሳዉ ኦዳ ማላልስያዎ

ኡንቱንቱ መና ጎዳ ጋላትኖ።

22 ኡንቱንቱ አዉ ጋላታ ያርሹዋ ያርሽኖ፤

ቃይ ናሸቻ የን እ ኦዳዋ ኦድኖ።

23 ኡንቱንቱፐ እቱ እቱ፥

ማርካብያን ዎልቃማ አባ ቦላን ቤድኖ።

ኡንቱንቱ ሄ ዎልቃማ አባ ቦላ ባረንቱ ኦሱዋ ኦያዋንታ።

24 ኡንቱንቱ መና ጎዳ ኦሱዋ፥

እ ጪማ ጋርሳን ኦዳ ማላልስያባ በኤድኖ።

25 እ አዛዚደ፥ ጎትያ ደንዳ፤

አባ ሆቢ ቃጼዳ።

26 ኡንቱንቱ ፑደ ሳሉዋ ጩጉደቴድኖ፤

ሄዋፐ ዱገ ጪማ ዎድኖ።

ሄ ኢታ መቱ ጋክና፥ ኡንቱንቱ ዎዛናይ ቶዩ ጌዳ።

27 ኡንቱንቱ ማቴዳ አሳዳን

በቲደ ጋንድጋሬድኖ፤

ኡንቱንቱ ኤራይካ ጆሌዳ።

28 ኡንቱንቱ መቶቴዳ ዎደ፥ መና ጎዳዉ ዋሴድኖ፤

እ ኡንቱንታ ኡንቱንቱ ዋይያፐ አሼዳ።

29 እ ጎትያ ጮኡ ኦዳ፤

አባ ቤታካ ስርጵ ኦዳ።

30 ጮኡ ጌዳ ድራዉ፥

ኡንቱንቱ ናሸቴድኖ፤

ጾሳይ ኡንቱንታ ኡንቱንቱ አሞቴዳ ካታማ አሄዳ።

31 አገና አ ሲቆነ

እ አሳዉ ኦዳ ማላልስያባዉ

ኡንቱንቱ መና ጎዳ ጋላትኖ።

32 ኡንቱንቱ አ አሳቱዋ ሺቁዋን ቁ ቁ ኦኖ፤

ቃይ ጭማቱዋ ሺቁዋን አ ጋላትኖ።

33 ጾሳይ ሻፋቱዋ መልሴዳ፤

ፑልቶቱካ ጎገናዳን ተኤዳ።

34 ሄዋን ደእያ አሳቱዋ ኢታተ ድራዉ፥

ሞክያ አራዳ ቢታካ፥

ሞከና መላ ቢታዉ ላሜዳ።

35 እ ዛሪደ መላ ባዙዋን ሃይ ኤላናዳን፥

ቃይ መላ ቢታን ፑልቱ ቃናዳን ኦዳ።

36 ኮሸቴዳዋንታ ሄ ሳኣን ዎዳ፤

ኡንቱንቱ ባረንቶ ደእያ ካታማ ኬጼድኖ።

37 ኡንቱንቱ ባረንቱ ጎሻን ዘሪደ፥

ዎይንያ ቶኪደ፥

ዳሮ ሙሩታ ሺሼድኖ።

38 እ ኡንቱንታ አንጅና፥ ኡንቱንቱ ሎይ ጮራቴድኖ፤

ኡንቱንቱ መህያካ ጉቤና።

39 አሳቱ ጾነትያ ዎደነ ኡንቱንቱ ኡቁና፥

መቱዋነ ካዩዋ ጋሱዋን ካዉሽያ ዎደ፥

40 ጾሳይ ካፖቱዋ ካዳዋ በሴ፤

ኦጊ ባይና ባዙዋን ቶይላካታናዳን እ ኡንቱንታ ኦ።

41 ሽን እ ህዬሳቱዋ ቱጋፐ ከሲደ፥

ኡንቱንቱ ጎለ አሳ ዶርሳ ዉድያዳን ጮራዬ።

42 ሱረ አሳቱ እ ኦያዋ በኢደ ናሸቲኖ፤

ሽን ኢታ አሳቱ ኡባይ ጮኡ ጊኖ።

43 አዳ ኤራንቻ ግድያዌ ሀ የዉዋ ቆፖ፤

መና ጎዳ አገና ሲቁዋ አኬኮ።