ማዝሙርያ 85

አሳ ሳሮተዉ ሺቄዳ ዎሳ

ዛማረቱዋ ካፖ የጸቴዳ፥ ቆራሀ ናናቱዋ ማዛሙርያ

1 አቤት መና ጎዳዉ፥ ኔን ነ ቢታዉ ኬካዳ፤

ያቆባ አሳ ኦሞዱዋፐ ዛራዳ።

2 ኔን ነ አሳ ናቁዋ አቶ ጋዳ፤

ኡንቱንቱ ናጋራ ኡባ ካማዳ።

3 ኔን ነ ሀንቁዋ ኡባ አጋዳ፤

ነ ሀንቁዋ ሱሉዋፐካ ስማዳ።

4 አቤት ኑና አሽያ ጾሳዉ፥

ኑና ጉየ ዛራ።

ኔን ኑዉ ሀንቀቴዳዋ አጋ።

5 ኔን ኑና መናዉ ሀንቀታይ?

ነ ሀንቁዋ የለታ ኡባ ጋካናዉ ጋምእሳይ?

6 ነ አሳይ ኔናን ናሸታና ማላ፥

ኑና ኦራ።

7 አቤት መና ጎዳዉ፥ አገና ነ ሲቁዋ ኑና በሳ፤

ኔን ኑና አሻ።

8 ታን መና ጎዳይ ጾሳይ ኦድያዋ ስሳና።

ኑን ኑ ቦዛ ኦግያ ጉየ ባና ዮፐ፥

እ ኑዉ፥ ባረ አሳዉ፥ "ሳሮተ እማና" ጊደ ኦዴ።

9 ቱሙካ ጾሳዉ ያይያዋንታ አሻናዉ

እ ማታን ደኤ፤

ሄዌነ፥ አ ቦንቹ ኑ ቢታን ደአናሳ።

10 አገና ሲቁነ ቱማተይ

እትፐ ጋከታና።

ጽሎተይነ ሳሮተይ፥

እትፐ የረታና።

11 ቱማተይ ሳኣፐ ፑደ ከሳና፤

ጾሳ ጽሎተይ ሳሉዋፐ ዱገ ጼላና።

12 ኤ፥ መና ጎዳይ ኬካባ እማና፤

ኑ ቢታይካ ሎኦ ካ ሞካና።

13 ጽሎተይ ጾሳፐ ስንና ሄመታና፤

አዉ ኦግያ ጊግሳና።