ማዝሙርያ 81

ባላ ማዝሙርያ

ዛማረቱዋ ካፖ ሱሱላቱዋን የጸቴዳ፥ አሳፍ ጻፌዳዋ

1 ኑዉ ዎልቃ ግድያ ጾሳዉ፥

ህንተ ቃላ ቁ ኦደ የጽተ፤

ያቆባ ጾሳ ሳቢተ።

2 የ ዶምተ፤ ካራቡዋ ባቂተ፤

ዲንነ ማስንቁዋን ሎአ የ ስስተ።

3 አግናይ ጼርያ ዎደነ፥

አግናይ ዶይስያ ዎደ

ባላ ጋላሳን ማላካታ ፑንተ።✝81:3 ፓይ. 10:10

4 ሀዌ እስራኤልያዉ ህግያ፤

ያቆባ ጾሳፐ እመቴዳ ዎጋ።

5 ግብጼ ቢታ እ ሾጬዳ ዎደ፥

ዮሴፎ አሳዉ ሀ ዎጋ አዋዬዳ።

ታን ኤረና ኮሻ ሀዋዳን ያግያዋ ስሳድ።

6 "ህንተ ሀሽያፐ ቶኩዋ ዎድ፤

ህንተ ኩሽያ ጹብያፐ ሸምፕሳድ።

7 ህንተ መቱዋ ዎደ ታና ጼሴድታ፤

ህንተና አሻድ፤✝81:7 ከሳ 17:7፤ ፓይ. 20:13

ታን ጉምያ ሻርያ ግዶን ጌሜዳሳፐ ህንተና አላድ።

ማሪባ ግያ ፑልቱዋ ማታን ታን ህንተና ፓጫድ።

8 ታ አሳዉ፥ ታን ህንተና ሴርያዋ ስስተ፤

ሀእ እስራኤላቶ፥ ሀይዜርክተ!

9 ህንተ ግዶን አላጋ ጾስ ደኦፖ፤✝81:9-10 ከሳ 20:2-3፤ ዛረ. 5:6-7

ሀራ ጾሳዉ ጎይኖፕተ።

10 ታን፥ መና ጎዳ ህንተ ጾሳ፥

ህንተና ግብጼ ቢታፐ ከሳደ አሄዳዋ።

ነ ዶና ሎይ ሀንጋ፤

ታን ኔና ዳርሳደ ባርሳና።

11 "ሽን ታ አሳቱ ታ ቃላ ስስበይክኖ፤

እስራኤላቱ ታዉ አዛዘትበይክኖ።

12 ሄዋ ድራዉ፥ ታን ኡንቱንቱ ባረንቱ ቆፋ ካላና ማላ፥

ኤኖ ጌና ዎዛናዉ አደ እማድ።

13 ታ አሳይ ታና ስሴደንቶ፥

እስራኤላቱ ታ ኦግያ ካሌደንቶ አዬ ደኢ!

14 ታን ኡንቱንቱ ሞርክያ ኤለ ጾናና ሽን፤

ኡንቱንቱ ባልጋራቱዋ ቦላ ታ ኩሽያ ዎና ሽን።

15 መና ጎዳ እጽያዋንቱ አ ስንን ሆካና፥

ኡንቱንቱ ሙሩካ መናሳ ግዳናዋ።

16 ታን ህንተና ሎኦ ዛርጋ ምዛና፤

ቃይ ኤሳ፥ ሹቻ ጎንጎሉዋፐ ካልሳና" ያጌ።