ማዝሙርያ 80

እስራኤልያ ካዉተይ ዛር ኤቃናዳን ሺቆ ዎሳ

ዛማረቱዋ ካፖ አሳፍ የጼዳ፥ ጪሻ ግያ ዋን የጸቴዳ ማዛሙርያ፥ ማርካተ

1 አቤት እስራኤልያ ሄንንቻዉ፥

ዮሴፎ አሳ ዉድያዳን ካለያዎ፥✝80:1 ከሳ 25:22

ክሩበቱዋ ግያ ኪታንቻቱዋፐ፥

ቦላና ደእያ አራታን ኡቴዳዎ፥ ፖአ፥ ኔን ኑና ስሳ።

2 ኤፍሬማ፥ ቢንያማነ ምናሰ ስንን ቆንጫ።

ነ ዎልቃ ደንደ ኑና አሻናዉ ሃያ።

3 አቤት ጾሳዉ፥ ኑና ዛራ፤

ኑን አታናዳን፥ ነ ሶምኡዋ ኑዉ ፖእሳ።

4 አቤት ኡባፐ ዎልቃማ መታ ኡባ ጎዳዉ፥ ጾሳዉ፥

ነ አሳ ዎሳ ቦላ አዉደ ጋካናዉ ሀንቀታይ?

5 ኔን ኡንቱንታ ዬኩዋ ቁማዳን ምዛዳ፤

ቃይ አፎ ሃዳን ኡሻዳ።

6 ኑ ሾሮቱ ኑ ቢታ አካናዉ፥

ባረንቱ ግዶን ዋላቀታናዳን ኦዳ፤

ኑ ሞርከቱ ኑ ቦላ ሚጬድኖ።

7 አቤት ኡባፐ ዎልቃማ ጾሳዉ፥ ኑና ዛራ፤

ኑን አታናዳን፥ ነ ሶምኡዋ ኑዉ ፖእሳ።

8 ኔን ግብጼፐ ዎይንያ አኑዋ አሃዳ፤

አይሁዳ ግደና አሳቱዋ የደርሳዳ፥ ኡንቱንቱ ቢታን አ ቶካዳ።

9 ኔን ዎራ ቡዳ፤

ያትና፥ ጻጱዋ የድ ዳሺደ፥

ቢታ ኡባ ጋኬዳ።

10 ደረቱ አ ኩዋን፥

ልባኖሳ ዝጋቱ አ ታሸቱዋን ካመቴድኖ።

11 ባረ ታሸቱዋ ሜድተራነ አባ ጋካናዉ፥

ቃይ ባረ ጼራቱዋ ኤፍራጺሳ ሻፋ ጋካናዉ የዴዳ።

12 ያትና፥ ኦግያና አያ ኡባይ፥

አ አይፍያ ዱናዳን፥

አ ዩሹዋን ደእያ ግምቢያ አያዉ ኮላዲ?

13 ባዙዋ ጉዱንይ አ ቦላ ዱሪደ ባይዜ፤

ቃይ ጋደን ዎጽ ቃጽያ መታቱ ኡባይ አ ሚኖ።

14 አቤት መታ ኡባ ጾሳዉ፥

ኔን ኑኮ ስማ።

ሳሉዋና ዱገ ጼላደ በአ፤

ሀ ዎይንያ ናጋ።

15 እ ነ ኡሸቻ ኩሺ ቶኬዳ ጻጱዋ፤

ኔን ነዉ ጋደ ድቼዳ ፑትያ።

16 ነ ሞርከቱ ነ ዎይንያ ቡድኖ፤

ታማን ጹጌድኖ።

ሄዋ ድራዉ፥ ኔን ኡንቱንታ ነ ሀንቁዋ ሱሉዋን ይሳ።

17 ነ ኩሺ፥ ነ ኡሸቻን ደእያ አሳ፥

ኔን ነዉ ጋደ ድቼዳ አሳ ናጎ።

18 ያቶፐ፥ ኑን ኔፐ ጉየ ስሞኮ።

ኑና ፓጻ ዎ፤ ነ ሱን ኑን ጋላታና።

19 አቤት ኡባፐ ዎልቃማ መና ጎዳ ጾሳዉ፥

ኑና ዛራ፤ ኑን አታናዳን፥

ነ ሶምኡዋ ኑዉ ፖእሳ።