ማዝሙርያ 106

ጾሳይ ባረ አሳዉ በስያ ኬካተ

1 መና ጎዳ ጋላትተ!✝106:1 1 ኦዱዋ 16:34፤ 2 ኦዱዋ 5:13፤ 7:3፤ እዝራ 3:11፤ ማዝ. 100:5፤ 107:1፤ 118:1፤ 136:1፤ ኤር. 33:11

እ ኬካ ግድያ ድራዉነ፥

አገና አ ሲቁ መናዋ ግድያ ድራዉ፥

መና ጎዳ ጋላትተ።

2 መና ጎዳይ ኦዳ ዎልቃማ ኦሱዋ ኦዳናዉ፥

ዎይ አ ጋላታ ኡባ ቆንጭሳናዉ፥ ዳንዳይያዌ ኦኔ?

3 ፕርዳ ናግያዋንቱነ፥

ኡባ ገደ ጽሎባ ኦያዋንቱ አንጀቴዳዋንታ።

4 አቤት መና ጎዳዉ፥ ኔን ነ አሳዉ ኬክያ ዎደ፥

ታናካ ቆፓ፤

ኡንቱንታ ኔን አሽያ ዎደ፥

ታዉካ አላ።

5 ሄዌነ፥ ነ ዶሬዳ አሳዉ፥

ሳአይ ሎእና፥ ታን በአናዳና፤

ነ አሳ ናሸቻ ታንካ ናሸታናዳንነ

ነዋንቱና እትፐ ታንካ ጋላታናዳና።

6 ኑን ኑ አዎቱዋዳን ናጋራ ኦዶ፤

ባይዞባነ ኢታባ ኦዶ።

7 ኑ አዎቱ ግብጼን ደእያ ዎደ፥

ነ ማላልስያ ኦሱዋ ቆፕበይክኖ።✝106:7 ከሳ 14:10-12

አገና ነ ሲቁዋ ዳሮተ ኡንቱንቱ ሀሳይበይክኖ፤

ዞኦ አባ ላንቂያን ነ ቦላ ማካሌድኖ።

8 ግዶፐካ እ ባረ ሱን ድራዉ፥

ባረ ዎልቃማ ዎልቃ ኤርሳናዉ ኡንቱንታ አሼዳ።

9 እ ዞኦ አባ አዛዝና፥ አባይ መሌዳ፤✝106:9-12 ከሳ 14:21-31

ባዙዋን ካለያዋዳን፥

ጪማ ግዱዋና ኡንቱንታ ካለደ ፕንዳ።

10 እ ኡንቱንታ እጽያዋንቱ ኩሽያፐ አሼዳ፤

ሞርከቱዋ ኩሽያፐ ኡንቱንታ ዎዜዳ።

11 ኡንቱንቱ ሞርከቱዋ ሃይ ምቴዳ፤

ኡንቱንቱፐ እቱነ አትቤና።

12 ሄ ዎደ እስራኤላቱ አ ቃላ አማኔድኖ፤✝106:12 ከሳ 15:1-21

አ ሳቤድኖ።

13 ግዶፐነ፥ ኡንቱንቱ እ ኦዳዋ

ኤለካ ዶጌድኖ።

አ ዞርያ ናገናን ባረንቱ ኮዬዳዋ ኦድኖ።

14 ባዙዋን ደኢድ፥ ኡንቱንቱ

ዳሮፐ አሞቴድኖ፤✝106:14-15 ፓይ. 11:4-34

ቃይ መላ ቢታን ጾሳ ፓጬድኖ።

15 ሄዋዳን እ ኡንቱንቱ ዎሴዳዋ እሜዳ፤

ሽን ኡንቱንቱ ሸምፖ ግልቃተ ኪቴዳ።

16 አሳቱ ባዙዋን ባረንቱ ዱንካንያን ደኢድ፥

ሙሳነ መና ጎዳዉ ዱማቴዳ፥

ቆማ አሮና ቃናቴዳ ዎደ፥✝106:16-18 ፓይ. 16:1-35

17 ቢታይ ዶየቲደ ዳታና ምቴዳ፤

አቤሮና አ ጎልያ አሳቱዋና ሞጌዳ።

18 ቃይ ኡንቱንቱ ማባራ ግዶን ታማይ ኤጽና፥

ላጩ ሄ ኢታ አሳቱዋ ጹጌዳ።

19 ኮሬባ ደርያን ደኢድ፥

ዎርቃ ሙሽሲደ ማራ ምስልያ መድኖ፤✝106:19-23 ከሳ 32:1-14

ሄ ምስልያዉ ጎይኔድኖ።

20 ኡንቱንቱ ባረንቱ ቦንቾ ጾሳ

ማታ ምያ ሚዛ ምስልያን ላሜድኖ።

21 ኡንቱንቱ ባረና አሼዳ ጾሳ ዶጌድኖ፤

እ ግብጼን ዎልቃማ ኦሱዋ፥

22 ካመ ቢታን ማላልስያባነ፥

ዞኦ አባን፥ "ሆላ!" ጊስያባ ኦዳ።

23 ሄዋ ድራዉ፥ ጾሳይ ኡንቱንታ ይሳና ጌዳ፤

ሽን ይሰና ማላ፥ አ ሀንቁዋ ዛራናዉ፥

ጾሳይ ዶሬዳ ሙሴ ግዱዋን ኤቄዳ።

24 ሄዋፐ ጉይያን፥ ኡንቱንቱ

አ ቃላ አማነና ድራዉ፥

ሄ ሎኦ ቢታ ካድኖ።✝106:24-26 ፓይ. 14:1-35

25 ኡንቱንቱ ባረንቱ ዱንካንያ ግዶን

ዙዙሜድኖነ

መና ጎዳ ቃላዉ አዛዘትበይክኖ።

26 ሄዋ ድራዉ፥ እ ኡንቱንታ ባዙዋን አጋናዋ፥

ባረ ኩሽያ ደንደ ጫቄዳ።

27 ኡንቱንቱ ዘረ ካዉተቱዋ ግዶን አጋናዉነ

ቢታን ኡንቱንታ ላላናዉ ጫቄዳ።✝106:27 ዎጋ 26:33

28 ሄዋፐ ጉይያን፥ ኡንቱንቱ ፓኦራን ደእያ ባኣላ ኤቃዉ፥

ጎይንያዉንቱና እትፐ ጋከቴድኖ፤✝106:28-31 ፓይ. 25:1-13

ሸምፑ ባይና ኤቃቶ ያርሸቴዳ ያርሹዋ ሜድኖ።

29 ኡንቱንቱ ባረንቱ ኦሱዋን መና ጎዳ ሀንቀድኖ፤

ኡንቱንቱ ግዶን ኢታ ሀርጊ ዎዳ።

30 ሽን ፒንሃስ ደንዲደ፥

ኡንቱንቱ ባይዙዋ ፕርድና፥

ኢታ ሀርጊ ኡንቱንቱ ቦላፐ ክቼዳ።

31 ሄዌነ፥ የለታፐ የለታ ጋካናዉ፥

መናዉ አዉ ጽሎተ ግዲደ ፓይደቴዳ።

32 ማሪባ ፑልቱዋ ማታን መና ጎዳ ሀንቀድኖ፤✝106:32-33 ፓይ. 20:2-13

ኡንቱንቱ ጋሱዋን ሙሴ ቦላ መቱ ጋኬዳ።

33 አያዉ ጎፐ፥ ኡንቱንቱ አ ሀንቀድኖ፤

ሙሴ ዶናፐ በሰና ቃላይ ከሴዳ።

34 መና ጎዳይ ይስተ ጊና፥

ኡንቱንቱ ካናነ አሳቱዋ ይስበይክኖ።✝106:34-36 ዳና. 2:1-3፤ 3:5-6

35 ሄዋፐካ፥ ኡንቱንቱ ሄ አሳቱዋና

ገለት አከቲደ፥ ዋላከቴድኖነ፤

ኡንቱንቱ ደኡዋ ዎጋ ካሌድኖ።

36 ጾሳ አሳቱ ኡንቱንቱ ኤቃዉ ጎይኔድኖ፤

ሄዌነ፥ ኡንቱንቶ ጲረ ግዴዳ።

37 ኡንቱንቱ ባረንቱ አቱማነ ማጫ ናናቱዋ

ጻላሄቶ ያርሼድኖ።✝106:37 2 ካታ. 17:17

38 ኡንቱንቱ፥ ጽሎ ሱ

ካናነ ኤቃቶ ያርሸድኖ፥

ባረንቱ አቱማነ ማጫ ናናቱዋ ሱ ጉሰድኖ፤✝106:38 ፓይ. 35:33

ሄ ሱን ቢታይ ቱኔዳ።

39 ሄዋዳን ኡንቱንቱ ባረንቱ ኦሱዋን ቱኔድኖነ፥

ሻርሙጻዳን ኡንቱንቱ ባረንቱ ጾሳዉ አማነተናን እጼድኖ።

40 ሄዋ ድራዉ፥ መና ጎዳ ሀንቁ፥

አ አሳ ቦላ ኤጽ ከሴዳ፤✝106:40-46 ዳና. 2:14-18

እ ባረዋንታ ሸነቴዳ።

41 እ ኡንቱንታ ሀራ ጋድያ አሳቱዋ ኩሽያን አደ እሜዳ፤

ኡንቱንቱ እጼዳዋንቱ ኡንቱንታ ሞዴድኖ።

42 ኡንቱንቱ ሞርከቱ ኡንቱንታ ናቄድኖነ

ባረንቱ ሸንያዳን አይሴድኖ።

43 እ ኡንቱንታ ዳሮ ገደ አሼዳ፤

ሽን ኡንቱንቱ ማካላዉ ዳንጭ ደንዴድኖ፤

ባረንቱ ናጋራ ጋሱዋን ዬድኖ።

44 ግዶፐነ፥ እ ኡንቱንቱ ዋሴዳ ዋሱዋ ስሲደ፥

ኡንቱንቱ ዋይያ ቆፔዳ።

45 እ ኡንቱንቱ ድራዉ፥ ባረ ጫቁዋ ሀሳዬዳ፤

አገና ባረ ሲቁዋ ዳሩዋዳን ኡንቱንታ ማሬዳ።

46 ኡንቱንታ ኦሞዴዳ ኡባይ ኡንቱንቶ ቃረታናዳን ኦዳ።

47 አቤት መና ጎዳዉ፥ ኑ ጾሳዉ፥ ኑና አሻ።✝106:47-48 1 ኦዱዋ 16:35-36

ኑን ነ ጌሻ ሱን ጋላታናዳንነ

ነ ቦንቹዋን ጬቀታናዳን፥

ካዉተቱዋ ግዶፐ ኑና ሺሻ።

48 መና ጎዳይ፥ እስራኤልያ ጾሳይ

መናፐ መና ጋካናዉ ጋላተቶ!

አሳይ ኡባይ፥ "አመንእ!" ጎ።

መና ጎዳ ጋላትተ!