ማዝሙርያ 6

ኡንኦ ዎድያን ሺቄዳ ዎሳ

ዛማረቱዋ ካፖ ዲቱዋን የጸቴዳ፥ ዳዊታ ማዝሙርያ

1 አቤት መና ጎዳዉ፥ ነ ሀንቁዋን ታና ሴሮፓርኪ፤✝6:1 ማዝ. 38:1

ዎይ ነ ይሉዋን ታና ሙሮፓርኪ።

2 አቤት መና ጎዳዉ፥ ታን ላባኔዳ ድራዉ፥

ታና ማራርኪ።

አቤት መና ጎዳዉ፥ ታ ዎዛናይ ማዱጾ ድራዉ፥ ታና ፓ።

3 ታ ሸምፓታ ዳሮፐ ኡንኤታዱ፤

ሽን ጾሳዉ፥ ታና ማዳናዉ ኔን አዉደ ጋካናዉ ጋምአይ?

4 አቤት ጾሳዉ፥ ኔን ስማደ፥ ታና አሻ፤

ነ ማሮታ ዳሩዋን ታና ከሳ አካ።

5 ሀይቄዳ ኡራይ ኦንነ ኔና ሀሳየና፤

ዱፉዋን ኔና ጋላትያዌ ባዋ።

6 ታን ኦልያን ዳቡራድ፤

ቃማ ኡባን ታን ዬካደ፥ ታ ሂጻ እርጽሳድ፤

ታ ቦርኮካ ታ አፎን ሙሱሳድ።

7 ታ ሞርከቱዋ ኡባ ጋሱዋን ታን አፎጼዳ ድራዉ፥

ታ አይፊ ጋልጄዳ፤

ታ አይፊ ደመናን እጼዳ።

8 መና ጎዳይ ታን ዬክያ ዬኩዋ ስሴዳ ድራዉ፥

ህንተኖ፥ ኢታ ኦያ ኡባቶ፥

ገደ ታፐ ሻከትተ።✝6:8 ማቶሳ 7:23፤ ሉቃሳ 13:27

9 መና ጎዳይ ታ ዋትዋቱዋ ስሴዳ፤

መና ጎዳይ ታ ዎሳነ ስሴ።

10 ታ ሞርከ ኡባቱ ዬላትኖነ ቱጋትኖ።

ኡንቱንቱ ቆፐናን ዬላቲደ፥ ጉየ ስምኖ።