ኢታቱዋ ዉርሰ ካጫ
ዛማረቱዋ ካፖ የጸቴዳ፥ ኤዶማ ቢታ አሳ ግድያ ዶይቅ ሳኦላኮ ቢደ፥ "ዳዊተ አብመሌካ ጎለ ቤዳ" ያጊደ ኦዲደ ስምና ዳዊታ አኬካ ግንጹዋ.
1 ኔኖ፥ ዎልቃማ ብታንያዉ፥
ጾሳ አሳቱዋ ቦላ ኢታባ ኦያዋዳን፥
ጋላሳ ኡባን አያዉ ጬቀታይ?
2 ኔኖ፥ ዎርዶባ ሀንያዎ፥
ኔን ሀራቱዋ ይሳናዉ ማቀታሳ።
ነ እንጻርሳይ ኩሳ ማቂልያ ማላ።
3 ኔን ሎኡዋፐ ኢታ ሲቃሳ፤
ቃይ ቱሙዋ ሃሳይያዋፐ፥
ዎርዱዋ ሃሳይያዋ ዶሳሳ።
4 ኔኖ፥ ዎርዳንቻዉ፥
ኔን ቆህያ ቃላ ኡባ ሲቃሳ።
5 ሽን ጾሳይ ኔና መናዉ ይሳና።
እ ኔና ዳፋናነ ነ ጎልያፐ ቦንቂደ ከሳና፤
እ ኔና ፓጻ ደእያዋንቱ ግዶፐ ቆላና።
6 ጽሎቱ ሀዋ በኢደ ያያና።
ኡንቱንቱ ሀዋዳን ያጊደ፥ ነ ቦላ ሚጫና፤
7 "ጾሳ ባረዉ ጌሱዋ ኦቤና፥
ባረ ዱረተ ዳሩዋን አማነቴዳ፥
ኢታ ኦሱዋን ምኔዳ ብታንያ
ሀዋ በእተ!" ያጋና።
8 ሽን ታን ጾሳ ጎልያን አጭያ ዎጋራ ማላ።
አገና አ ሲቁዋን ታን መ መናዉ አማነታይ።
9 ኔን ኦዳ ድራዉ፥
ታ ኔና ጋላታና፥
ታን ኔን ኬካ ግድያ ድራዉ ነ ሱንን ህዶታ ዎይ።
ታን ጾሳ አሳቱዋ ስንን ኔና ሳባና።