ማዝሙርያ 45

ሲቁዋ ግንጹዋ

ቆረ ናናቱ ዛማረቱዋ ካፖ ጪሻ ዋ ግያ ዋን የጼዳ የ. አኬካን ጻፈቴዳ ሲቁዋ የ.

1 ታን ታ የ ካትያ ስሳና፥

ታ ዎዛናይ ሎኦ ቆፋ ፑልቴ፤

ታ እንጻርሳይ ሎኦ ጻፍያ አሳ ብእርያ ማላ።

2 አሳ ኡባፐ ኔን ማላንቻነ፤

ነ ሃሳያይ ናሸያዋ ግዳና ማላ፥

ጾሳይ ኔና መናዉ አንጄዳ።

3 ዎልቃማ ካትያዉ፥

ነ ማሻ ነ ጼሳን ዳንጫ፤

ቦንቹነ ግታተይ ነዋ።

4 ነ ቱማተ፥ አሽከተነ ጽሎተ ድራዉ፥

ነ አንጋ ማያደ፥ ጾናናዉ ፕሪጻ።

ነ ኡሸቻ ኩሺ ማላልስያባ በሶ።

5 ነ ፖይ ቃራ፤

ኡንቱንቱ ካትያ ሞርከቱዋ ዎዛና አይፍያ ጫድኖ።

ካዉተቱ ነ ገድያን ኩንድኖ።

6 አቤት ጾሳዉ፥

ነ ካዉተ አራታይ መ መናዉ ደኤ፤✝45:6-7 እብራ. 1:8-9

ነ ካዉተ ጻምአይካ ሱረተ ጻምኣ።

7 ኔን ጽሎተ ሲቃሳ፤

ጌላተ እጻ።

ጾሳይ፥ ነ ጾሳይ፥ ኔና

ነ ላገቱዋፐ አደ፥

ናሸቻ ዛይትያ ኦኬዳዌ ሄዋሳ።

8 ካዋራን፥ ጎዳረ ኡንነ ብርጉድያን፥

ነ ማዩ ኡባይ ፑሻከቴዳ።

ዳንጋርሳ ዛልያን አሌቀቴዳ፥

ነ ካዉተ ጎልያን ዲጽያዋንቱ ኔና ናሸቺኖ።

9 ካትያ ጎልያን ደእያ ማጫ አሳቱዋ ግዶን፥

ካተቱዋ ማጫ ናናቱ ደኢኖ፤

ካታታ ጌሻ ዎርቃን አሌቀታደ፥

ኔፐ ኡሸቻ ባጋን ኤቃዱ።

10 ታ ናቴ፥ ስሳ፤ ሀይዛ፤

ነ ሀይ ሃ የጋ።

ነ ዛርያነ ነ አዉዋ ጎልያ ዶጋ።

11 ነ ፑላ ካቲ አሞቴ፤

እ ነዉ ጎዳ ግድያ ድራዉ፥ አዉ አዛዘታ።

12 ጽሮሳ አሳይ እዝዉ እሞታ አኪደ ያና፤

ዱረቱ ኔና አዉዳሻና።

13 ካትያ ናታ ካትያ ጎልያ ግዶን ዋታ ሎአይ!

እዝ ቡላቻ ማዩካ ዎርቃ ቃጭናን ዳደቴዳ።

14 ባረ አሌቆ ማዩዋ ማያደ፥ ካትያኮ ሞይዘታዉ፤

እዝ ላገ ናናቱ ዎዶሮቱ፥

እዞ ካሊደ፥ አ ስን አሄድኖ።

15 ኡንቱንቱ ናሸቲደነ ሆምቦጪደ ዪደ፥

ካትያ ጎልያ ገሊኖ።

16 ካትያዉ፥ ነ አዎቱዋ ኮታ ነ ናናቱ አካና።

ኔን ኡንቱንታ ቢታ ኡባ ቦላን ሱንና።

17 ታን ነ ሱንይ የለታ ኡባን ሀሳየታናዳን ኦና።

ሄዋ ድራዉ፥ አሳይ መ መናዉ ኔና ጋላታና።