1 አቤት መና ጎዳዉ፥ ታ ዛላዉ፥ ታን ኔና ጼሳይ፤

ታን ኔና ጼስና፥ ታዉ ስሳ እጾፓ።

ነ ጮኡ ጎፐ፥

ታን ዱፉዋ ቤዳ አሳቱዋ ማላ ግዳይ።

2 "ማዶ" ጋደ ታን ኔና ጼስያ ዎደነ

ነ ኡባፐ ጌሻ ዱንካንያኮ ዛራደ፥

ታ ኩሽያ ምጭያ ዎደ፥

ኔን ታ ዋትዋቱዋ ስሳ።

3 ኢታ ኦያ ኢታ አሳቱዋና ታና ጋደ ኦይቆፓ፤

ሄዋንቱ ባረንቱ ዎዛናን ኮባባ ቆፕ ኡቲደ፥

ባረንቱ ዶናን ባረንቱ ሾሩዋና ሳሮባ ሃሳይያዋንታ።

4 ኡንቱንቱ ኦሱዋዳንነ ኡንቱንቱ ኦሱዋ ኢታተዳን፥

ኡንቱንቶ ጭጋ፤✝

ኡንቱንቱ ኩሺ ኦዳባዉ ኡንቱንቶ ዛራ።

ኡንቱንቶ በስያ ኢታ ኡንቱንቶ ዛራ።

5 ኡንቱንቱ ጾሳ ኦሱዋነ አ ኩሺ መዳዋ

ዶሰናን እጼዳ ድራዉ፥ ጾሳይ ኡንቱንታ ኮላና፤

ዛሪደ ኡንቱንታ ኡባካ ኬጸና።

6 ታ ዋትዋቱዋ ስሴዳ ድራዉ፥ መና ጎዳይ ጋላተቶ።

7 መና ጎዳይ ታዉ ዎልቃነ ጎንዳለ፤

ታ ዎዛናይ አን አማነቴ፤

ሄዋን ታን ማደታድ።

ሄዋ ድራዉ፥ ታ ዎዛናይ አን ናሸቴ፤

ታን የን አ ሳባና።

8 መና ጎዳይ ባረ አሳዉ ዎልቃ፤

እ ባረ ኦኬዳ ካትያ አሽያ ሚጻ።

9 ጾሳዉ፥ ነ አሳ አሻ፤

ነዉ ግድያዋንታ አንጃ።

ኡንቱንታ ሄምያዌ ኔና ግዳ፤

ኔን ኡንቱንታ መናዉካ ቶካ።