ማዝሙርያ 69

ማዱዋ ደማናዉ ሺቆ ዎሳ

ዛማረቱዋ ካፖ፥ ጪሻ ዋ ግያ ዋጹዋን የጸቴዳ ዳዊታ ማዝሙርያ

1 አቤት ጾሳዉ፥ ታና አሻ፤

አያዉ ጎፐ፥ ሃይ ታዉ ቆያ ጋኬዳ።

2 ገዲ ኤቂያ ሳአይ ባይና ጫርያን ሙከታድ፤

ጪሞ ሃ ግዶ ገላድ፤

ሃ ዙሉ ታ ቦላ ባና ሀኔ።

3 ማዶ ዋሳደ ዳቡራይ፤

ታ ኮቶኒካ መሌዳ።

ታ ጾሳይ አሌ ጋደ ጼልሽን፥

ታ አይፊ ጋልጄዳ።

4 ታና ጮ እጽያዋንቱ፥

ታ ሁጲያ ብናናፐ ዳራ።✝69:4 ማዝ. 35:19፤ ዮሃ. 15:25

ዎርዱዋን ታና ሞርክያዋንቱነ፥

ይሳናዉ ኮይያዋንቱ ዳሬድኖ።

ታን ዎልቃን አካቤና ሚሻ ታና ጭግሲኖ።

5 አቤት ጾሳዉ፥ ታ ባይዙዋ ኤያተ ኔን ኤራሳ፤

ታን ኦዳ ናጋራይ ኔፐ ቆሰተና።

6 አቤት ጎዳዉ፥ ኡባፐ ዎልቃማ መና ጎዳዉ፥

ኔና ህዶታን ናግያዋንቱ፥

ታ ጋሱዋን ዬላቶፕኖ።

አቤት እስራኤልያ ጾሳዉ፥ ኔኮ ሺቅያዋንቱ

ታ ጋሱዋን ካዉሾፕኖ።

7 ታን ቦርያ ዳንዳዬዳዌነ

ታ ሶምኢ ዬላ ማዬዳዌ ነ ድራሳ።

8 ታን ታ እሻቶ እማ፥

ቃይ ታ አት ናናቶ አላጋ ግዳድ።

9 ታን ነ ጎልያዉ ሴለትያ ሴላይ፥

ታና ታማዳን ጉዴ፤✝69:9 ዮሃ. 2:17፤ ሮመ 15:3

ኔና ቦርያዋንቱ ቦሪ ታ ቦላ ዎዳ።

10 ታን ጾማደ፥ ታ ሁጲያ ካዉሼዳዌ፥

ታዉ ቅሊጩዋ ግዴዳ።

11 ታን ካዩዋ ማዩዋ ማዬዳ ዎደ፥

ኡንቱንቶ ቶሳዉ ግዳድ።

12 ካታማ ፐንግያን ኡትያዋንቱ ታና ቅሊጪኖ፤

ማትያዋንቱ ታባ የ ከሲኖ።

13 ሽን አቤት መና ጎዳዉ፥ ታና ግዶፐ፥

ታን ኔና ዎሳይ።

አቤት ጾሳዉ፥ ነ ዶስያ ዎድያን፥

አገና ነ ሲቁዋ ዳሩዋን፥

ኔን አሻና ጌዳዋዳን ታዉ ዛሩዋ እማ።

14 ጫርያን ሙከተናዳን ታና አሻ።

ታና እጽያዋንቱፐ፥

ጪሞ ሃቱዋፐ ኔን ከሳ አካ።

15 ሃ ድኡዋን ታና አፍሶፓ፤

ዎይ ጪሞ ኦላን ታና ምትሶፓ፤

ዎይ ዱፉዋ ዶና ታ ቦላ ጎርድሶፓ።

16 አቤት መና ጎዳዉ፥ አገና ነ ሲቁዋ ኬካተዳን፥

ታዉ ዛሩዋ እማ።

ነ ቃረታ ዳሩዋዳን ታኮ ስማ።

17 ታፐ ነ ቆማፐ ነ ሶምኡዋ ገንፓ፤

ታን ዋየትያ ድራዉ፥ ታዉ ኤለ ዛሩዋ እማ።

18 ኔን ታኮ ሺቃ፤ ታና ዎዛ፤

ታ ሞርከቱዋፐ ታና ላአ ከሳ።

19 ታን ቦርያ፥ ዬላነ፥

ካዉሻ አኬዳዋ ኔን ኤራሳ።

አያዉ ጎፐ፥ ታ ሞርከቱዋ ኡባ ኔን በኣሳ።

20 ቦሪ ታ ዎዛና ፓጸናዳን መን ድራዉ፤

ህዶታ ቃንጻድ።

ታዉ ቃረትያዋ ኮያድ።

ሽን እቱነ ባዋ፤

ታና ምንያ አሳ ጼላድ፤ ሽን ደማበይከ።

21 ታን ኮሻቴዳ ዎደ፥

ታዉ ጫምያ ቁማ አድኖ።✝69:21 ማቶሳ 27:48፤ ማር. 15:36፤ ሉቃሳ 23:36፤ ዮሃ. 19:28-29

ታን ሳመቴዳ ዎደ፥

ታዉ ጫላ ዎይንያ ኤሳ እሜድኖ።

22 ኡንቱንቱ ምያ ሳምፓይ ኡንቱንቶ ጲረ ግዶ።✝69:22-23 ሮመ 11:9-10

ኡንቱንቱ ያርሹዋ ያርሺደ፥

ምያ ግብራይ ኡንቱንቶ ግትያ ግዶ።

23 ጼለናዳን ኡንቱንቱ አይፊ ጎዘቶ፤

ኡንቱንቱ ጋዱዋ ኡባ ገደ ኮኮርሳ።

24 ነ ሀንቁዋ ኡንቱንቱ ቦላ ትጋ፤

ነ ሱሎ ሀንቁ ኡንቱንታ የደርሲደ ኦይቆ።

25 ኡንቱንቱ ካምቡ መላ ደኦ፤✝69:25 ኪታ 1:20

ኡንቱንቱ ዱንካንያን ኦንነ ደኦፖ።

26 አያዉ ጎፐ፥ ኡንቱንቱ፥

ኔን ሙሬዳዋንታ የደርሲኖ፤

ቃይ ኔን ደቼዳዋንቱ ቱጋባ

ደንደ ሃሳዪኖ።

27 ኔን ኡንቱንቱ ናጋራ ቦላ

ናጋራ ጉጃናዳን አጋ፤

ነ ማሮተፐ ኡንቱንታ አያይነ ጋኮፖ።

28 ኡንቱንቱ ደኡዋ ማጻፋፐ ቁጨትኖ፤✝69:28 ከሳ 32:32፤ ሳፃ 3:5፤ 13:8፤ 17:8

ጽሎ አሳና ማዝጋበቶፕኖ።

29 ታን ሳከታደነ ቱጋታደ ደአይ።

አቤት ጾሳዉ፥ ታና አሻደ፥

ሳሮ ሳኣን ዎ።

30 ታን ጾሳ ሱን የን ጋላታና፤

ጋላታ እሙዋን አ ዳርሳና።

31 ሄዌካ፥ ቦራ ያርሽያዋፐ

ዎይ ካጫማ ኮሩማ ያርሽያዋፐ

አደ፥ መና ጎዳ ናሸቻና።

32 ናቀቴዳዋንቱ ታና ጾሳይ፥

አሼዳዋ በኢደ ናሸትኖ።

ህንተኖ ጾሳኮ ሺቅያዋንቶ፥

ህንተ ዎዛናይ ምነቶ።

33 አያዉ ጎፐ፥ መና ጎዳይ ህዬሳቱዋ ስሴ፤

ቃሾ ጎልያን ደእያ ባረ አሳካ ካና።

34 ሳሉነ ሳአይ፥ ቃይ አባይነ

አ ግዶን ዎጽ ቃጽያ ኡባቱ ጾሳ ጋላትኖ።

35 አያዉ ጎፐ፥ ጾሳይ ጽዮነ አሻና፤

ይሁዳ ካታማቱዋ ዛሪደ ኬጻና።

አ አሳይ ያን ደአናነ ሄ ቢታይ ኡንቱንቱሳ ግዳናዋ።

36 አ ቆማቱዋ ናናቱ ሄ ቢታ ላታና፤

አ ሱን ሲቅያዋንቱ ያን ደአና።