ማዝሙርያ 65

ጋላታ ማዝሙርያ

ዛማረቱዋ ካፖ የጸቴዳ፥ ዳዊታ ማዛሙርያ፥ ሳባ

1 አቤት ጾሳዉ፥ ጽዮነን ነዉ ጋላታይ በሴ፤

ኑን ነዉ ሺቀቴዳዋካ ጋና።

2 አቤት ዎሳ ስስያዎ፥

አሳይ ኡባይ ኔኮ ያና።

3 ኑ ናጋራይ ኑና ሙኬዳ ዎደ፥

ነ ኑዉ አቶተ እማዳ።

4 ኔን ዶሬዳነ ነ ችሎታን ኡታናዉ

ማታ ሺሽያ አሳይ አንጀቴዳዋ።

ኑን ነ ሶን፥ ጌሻ ዱንካንያን

ደእያ ሎኦባን ኩሜዶ።

5 አቤት ኑና አሽያ ጾሳዉ፥

ማላልስያ ነ ጽሎ ኦሱዋን ኔን ኑዉ አላሳ።

ሳኣ ጋጻፐ ጋጻ ጋካናዉ፥

ሃኮ አባቱዋፐካ ሄፍንን ደእያ አሳ ኡባዉ፥

አማነትያዌ ኔና።

6 ኔን ኔና ዎልቃ ዳንጭሳደ፤

ዎልቃማ ደረቱዋ ነ ምኖተን ኤሳዳ።

7 ኔን አባ ኮሻነ፥

ቤታ ጉን ስርጵ ኦሳ፤

ቃይ አሳይ ደንድያ ደንዱዋ እርጽሳሳ።

8 ሄዋዳን ኔን ኦዳ ማላታ ድራዉ፥

ሳኣ ጋጻ ጋካናዉ ደእያ አሳይ ኡባይ ነዉ፥ "ሆላ!" ጌ።

አዋይ ሞክያሳፐ ዉልያሳ ጋካናዉ ደእያ አሳ ኡባ ናሸቻዳ።

9 ኔን ቢታ ናጋደ እራ ቡክሳሳ፤

ያታደ ዳሮ ቱኤያሳ።

አሳዉ ካይ ሞካና ማላ፥

ጾሳ ፑልቶቱ ሃን ኩሜድኖ፤

ሄዋዳን ኦደ ኔን ጊግሳዳ።

10 ካቻ ዎና ማላነ ጉሉዋ ሹግሳና ማላ፥

ኔን ያፋራን ሃ ኩንሳ፤

ካይ ሞካና ማላ አንጃሳ።

11 ላይ ካሎ ላይ ኦሳ፤

ኔን አያ ሳአይ ኡባይ ኩም ፓላሄ።

12 ኔን ሄን ሳኣ ማታን ኩንሳ፤

ዞዘቱዋካ ናሸቻ ዳንጭሳሳ።

13 ኔን ሄን ጋድያ ዶርሳ ዉድያ ማይዛሳ፤

ዛንጋራ ቢታካ ካ ኩን።

ኡንቱንቱ ናሸቻዉ ሆምቦጪኖነ የጺኖ።