1 አቤት መና ጎዳዉ፥ ኔን ታና ብዳደ ኤራዳ።

2 ታን አዉደ ኡትንቶነ

አዉደ ኤቂንቶ፥ ኔን ኤራሳ፤

ኔን ታ ቆፋ ኡባ ሃኩዋን ኤራሳ።

3 ታን ብያሳነ፥

ሸምፕያ ሳ ጾሞሳሳ፤

ታ ኦገቱዋ ኡባ ኔን ኤራሳ።

4 አቤት መና ጎዳዉ፥ ታን ታ እንጻርሳን

እት ቃላ ሃሳያናፐ ካሰታደ፥

ኔን ታ ቆፋ ኡባ ኤራሳ።

5 ኔን ታ ዩሹዋን ደኣሳ፤

ነ ኩሽያን ታና ናጋሳ።

6 ነ ኤራይ ታና ሎይ ማላልሴ፤

ታን አኬካናዉ ዳንዳይያሳፐ ቃ።

7 ታን ነ አያናፐ ሀቃ ባናዉ ዳንዳያይታ?

ዎይ ነ ስንፐ ሀቃ ባቃታናዉ ዳንዳያይታ?

8 ፑደ ሳሉዋ ከሶፐ፥

ኔን ያን ደኣሳ!

ዱገ ስኦልያ ዎንቶካ፥

ኔን ያን ደኣሳ።

9 አዋይ ሞክያሳ ባጋ ፓላደ ቦፐ፥

ዎይ አዋይ ዉልያሳ ባጋን ሃካደ ደኦፐ፥

10 ሄ ሳንካ ነ ኩሺ ታና ካለ፤

ነ ኡሸቻ ኩሺ ታና ዘምፕሴ።

11 ታን፥ "ማዉ፥ ታና ገን፤

ፖኡዋ፥ ቃማዉ ላመታ" ያግንቶካ፥

12 ማ ዳሩ ነዉ መና፤

ቃማይ ጋላሳዳን ፖኤ፤

አያዉ ጎፐ፥ ነዉ ማይ ፖኡዋ ማላ።

13 ኔን ታ ግዶ አሳተ ኡባ መዳ፤

ታ አት ኡሉዋን ታና ኔን ዋጻ መዳ።

14 ኔን ታና ማላልስያባነ ኦራባ ኦደ መዳ ድራዉ፥

ታን ኔና ጋላታይ።

ነ ኦሶቱ ማላልስያዋንታ!

ታን ቃይ ሄዋ ዉርሳደ ኤራይ።

15 ታን ጌማ ሳኣን መትያ ዎደ፥

ታ መቀቱ ኔፐ ጌምበይክኖ።

ታ ቦላይ ታ አት ኡሉዋ ጪማ ግዶን

ሂላን አሌቀቲደ ኦሰትያ ዎደ፥

16 የለትቤና ታ አሳተ ነ አይፊ በኤዳ።

ብሮ እቱነ ዶመተናን ደእሽን፥

ታዉ ኔን ጊግሴዳ ጋላሳቱ ኡባቱ

ነ ማዝጎብያን ጻፈቴድኖ።

17 አቤት ጾሳዉ፥

ነ ቆፋቱ አያ ጮራቴድኖ!

ኡንቱንታ ኤራናዌ አያ ዋይሲ!

18 ታን ኡንቱንታ ፓይድንቶ፥

ኡንቱንቱ ሻፍያፐ ዳራና ሽን።

ታን ቤጎትያ ዎደ፥

ሀእካ ኔናና ደአይ።

19 አቤት ጾሳዉ፥ ኔን ኢታቱዋ ዎድንቶ አዬ ደኢ!

ሱ ጉስያ አሳቱ ታፐ ሃክኖ!

20 ኡንቱንቱ ነ ቦላ ኢታባ ሃሳዪኖ፤

ነ ሞርከቱ ነ ሱን ባይዚኖ።

21 አቤት መና ጎዳዉ፥ ኔና እጽያዋንታ

ታን እጽክታ?

ነ ቦላ ደንድያዋንታ

ታን ሸነትክታ?

22 ታን ኡንቱንታ ኡባ እጻይ፤

ኡንቱንታ ታን ታ ሞርከቱዋዳን ፓይዳይ።

23 አቤት ጾሳዉ፥

ታና ብዳደ፥ ታ ዎዛና ኤራ፤

ታና ፓጫደ፥ ታ ኡንኤትያ ቆፋ ኤራ።

24 አነ ታናን ኢታባይ ደኦፐ ጼላ፤

መና ኦግያን ታና ካለ።