ዳውት ጻፌዳ ማዛሙርያ

1 አቤት መና ጎዳዉ፥ ታ ዎሳ ስሳ፤ ታ ዋትዋቱዋ ሀይዛ።

ኔን ጽሉዋነ አማነትያዋ ግድያ ድራዉ፥

ታዉ ዛሩዋ እማ።

2 ነ ስንን ጽሎ ግዳና አሳይ ባዋ፤✝143:2 ሮመ 3:20፤ ጋላ. 2:16

ሄዋ ድራዉ፥ ታና ነ ቆማ ፕርዳዉ ሺሾፓ።

3 ታና ታ ሞርኪ የደርሲደ፥

ቢታና ጋ ክንቼሬዳ፤

በን ሀይቄዳ አሳቱዋዳን ታና ማን ዎዳ።

4 ሄዋ ድራዉ፥ ታን ህዶታ ቃንጻድ፤

ታ ዎዛናይካ ይባቴዳ።

5 ታን በን ዎደቱዋ ሀሳያይ፤

ኔን ኦዳ ኦሱዋ ኡባ ዛራ ዛራደ ቆፓይነ

ነ ኩሺ ኦዳዋ አኬካይ።

6 ታን ታ ኩሽያ ኔኮ ምጫድ፤

መላ ቢታይ ሃ ኮይያዋዳን፥

ታ ሸምፑ ኔና ሳመቴ።

7 አቤት መና ጎዳዉ፥ ታዉ ዛሩዋ እማናዉ ኤሌላ!

ታን ህዶታ ቃንጻድ።

ታን ዱገ ዱፉዋን ገልያ አሳቱዋ ማላ ግደናዳን፥

ነ ሶምኡዋ ታፐ ገንፓ።

8 ታን ኔና አማነትያ ድራዉ፥

ዎንታ ዎንታ አገና ነ ሲቁዋ ታና በሳ።

ታን ታ ሸምፑዋፐ ኔና ዎስያ ድራዉ፥

ታን ባናዉ በስያ ኦግያ ታና ታማርሳ።

9 አቤት መና ጎዳዉ፥ ታን ኔኮ ባቃቴዳ ድራዉ፥

ታና ታ ሞርከቱዋፐ አሻ።

10 ኔን ታ ጾሳ ግድያ ድራዉ፥

ታን ነ ሸንያ ኦና ማላ፥ ታና ታማርሳ፤

ሎኦ አያናን ታና ሱረ ኦግያ ካለ።

11 አቤት መና ጎዳዉ፥ ነ ሱን ድራዉ፥ ታና አሻ፤

ነ ጽሎተን ታና መቱዋፐ ከሳ።

12 አገና ነ ሲቁዋን ታ ሞርከቱዋ ዎ፤

ታ ባልጋራቱዋ ኡባ ይሳ፤

አያዉ ጎፐ፥ ታን ነ ቆማ።