Salmos 18

ጾኑዋ ማዝሙርያ

ዛማረቱዋ ካፖ የጸቴዳ ዳዊታ ማዝሙርያ። መና ጎዳይ አ ሞርክያፐነ ሳኦላ ኩሽያፐ አሼዳ ዎደ ዳዊ ተ መና ጎዳዉ ሀ የ የጼዳ

1 አቤት መና ጎዳዉ፥

ታ ዎልቃዉ፥ ታን ኔና ሲቃይ።

2 መና ጎዳይ ታዉ ዎጋ ዛላ፤

ታን ኦላፐ ናገትያ ሚጻ፤

እ ታና አሽያዋ።

ታ ጾሳይ ታን አኮ ባቃትያ ታ ዎጋ ዛላ።

እ ታ ጎንዳልያ፤ እ ታና አሽያ ዎልቃ፤

እ ታን ቆሰታ አትያ ሳኣ።

3 ጋላታይ በስያ መና ጎዳ ታን ጼሳይ፤

እ ታ ሞርከቱዋፐ ታና አሼ።

4 ሀይቁዋ ዎዶሩ ታና ቃቼዳ፤

ባሻይ ድኡዋዳን ታና ዳጋንዳ።

5 ዱፉዋ ዎዶሩ ታና ቃቼዳ፤

ሀይቁ ጲርያዳን ታና ኦይቄዳ።

6 ታና መቱ ኢስና፥ መና ጎዳ ጼሳድ፤

"ታና ማዳ" ጋደ ታ ጾሳዉ ዋሳድ።

እ ባረ ጌሻ ሳኣን ታ ኮሻ ስሴዳ፤

ታን ዋሴዳ ዋሱ አ ሀይን ዎዳ።

7 ዎና ጾሳይ ሀንቀቴዳ ድራዉ፥

ቢታይ ዪቂዪቂደ ቃጼዳ፤

ደረቱዋ ጻጱ ጋጅ ጋጂደ ኮኮሬዳ።

8 አ ሲያፐ ሀንቁዋ ጩዋይ ጩዋቴዳ፤

አ ዶናፐ ምያ ታማ ላጩነ ጹግያ ቦንቁ ከሴዳ።

9 ሳሉዋ እ ጳልቂደ፥ ዱገ ዎዳ፤

ሄ ዎደ አ ገድያፐ ጋርሳና ስቅመቴዳ ሻሪ ደኤ።

10 ቀፍያና ደእያ ኪታንቻ ክሩብያን ኡቲደ ፓሌዳ፤

ጫርኩዋ ቀፍያ አኪደ ኤሌሌዳ።

11 ባረና ማን ካሜዳ፤

አ ዱንካኒ እራና ስቅመቴዳ ሻርያ።

12 አ ስንን ደእያ ዎልቃማ ፖኡዋፐ

ሻቻይነ ታማ ላጩ ከሴዳ፤

ከሲደ ስቅመቴዳ ሻርያ አደ ቤዳ።

13 ቃይ መና ጎዳይ ጉጉንዳን ሳሉዋፐ ጉሜዳ፤

ኡባፐ ቂያ ጾሳይ ዋልቃንንነ ታማ ላጩዋን ቆንጬዳ።

14 ባረ ዎንዳፍያ ጩብያ የዲደ፥

ባረ ሞርከቱዋ ላሌዳ፤

ዋልቃን ፖኡዋ ኪቲደ፥ ኡንቱንታ የደርሴዳ።

15 አቤት መና ጎዳዉ፥ ኔን ሴሬዳ ዎደነ፥

ሀንቀታደ ፔኑቄዳ ዎደ፥

አባ ሃይ ግሴዳ ቢታይ ቤቴዳ።

ቃይ ሳኣ ባሱካ ቆንጬዳ።

16 ጾሳይ ቦላፐ ኩሽያ ዱገ የዲደ፥

ታና ኦይቄዳ፤

ጪሞ ሃፐ ታና ከሴዳ።

17 እ ታና ታ ዎልቃማ ሞርክያፐነ፥

ታና እጽያዋንቱፐ አሼዳ።

አያዉ ጎፐ፥ ኡንቱንቱ ታዉ ሎይ ዳሮ ዎልቃማ።

18 ታ ዋይያ ጋላስ ኡንቱንቱ ታ ቦላ ደንዴድኖ፤

ሽን መና ጎዳይ ታና ዘምፕስያዋ።

19 እ ታና አኮ ሳኣ ከሴዳ፤

ታናን ናሸቴዳ ድራዉ፥ ታና አሼዳ።

20 ታ ጽሎተዳን መና ጎዳይ ታዉ ጭጌዳ፤

ታ ኩሽያ ጌሻተዳን እ ታዉ ዛሬዳ።

21 ታን መና ጎዳ ኦግያ ካላድ፤

ታን ታ ጾሳ አጋደ ዎራ ባበይከ።

22 ታን አ ህግያ ኡባ ናጋድ፤

አ ዎጋ ፖልያዋ አጋበይከ።

23 ታን አ ስንን ሱረ ደኣድ፤

ታን ታና ናጋራፐ ናጋድ።

24 ሄዋ ድራዉ፥ መና ጎዳይ ታዉ ታ ጽሎተዳንነ

ታ ኩሺ አ ስንን ጌሻ ግድያዋዳን ዛሬዳ።

25 አቤት ጾሳዉ፥ አማነትያዋንቶ ኔን አማነትያዋ፤

ሱረቶ ኔንካ ሱረ።

26 ጌሻቶ ኔንካ ጌሻ፤

ሽን ጌላቶ ኔን ጭንጫ።

27 ባረንታ ሆክስያዋንታ አሻሳ፤

ሽን ባረንታ ቂስያዋንታ ኔን ዝቂሳሳ።

28 አቤት መና ጎዳዉ፥ ኔን ታ ጾምፕያ ፖእሳሳ፤

ታ ጾሳይ ፖእስና፥ ታ ማይ ክቼ።

29 ነ ማዱዋን ታን ታ ሞርከ ዎታዳራቱዋ ኦላይ፤

ታ ጾሳን ታን ኡንቱንቱ ሚጻ ጼራና ጉፓ አይ።

30 ጾሳ ኦጊ ሱረ።

መና ጎዳ ቃላይ ጌሻ።

አኮ ባቃትያ ኡባቶ እ ጎንዳለ።

31 ጾሳፐ አትና፥ ሀራ መና ጎዳይ ባዋ፤

ኑ ጾሳፐ አትና፥ ሀራ ዎጋ ዛል ባዋ።

32 ታዉ ዎልቃ እምያዌነ

ታ ኦግያ ሳሮ ኦያዌ ጾሳተኔ።

33 እ ታ ገድያ ገንእያ ገድያዳን ምንሴ፤✝18:33 እምባ. 3:19

ታና ቃ ሳአቱዋን ሳሮተን ዎ።

34 እ ታ ኩሽያ ኦላ ሜዘዬ፤

ሄዋ ድራዉ፥ ታን ታ ቀስያን

ናስያ ግያ ብራታ ዎንዳፍያ ዳፋደ ዱካይ።

35 ታና አሽያ ነ ጎንዳልያ ኔን ታዉ እማዳ።

ነ ኡሸቻ ኩሺ ታና ዘምፕሴ፤

ነ ሎኦ ኦይይ ታና ቂሴ።

36 ታ ሀመትያሳ አሳሳ፤

ሄዋ ድራዉ፥ ታ ገዲ ሀልጽቤና።

37 ታ ሞርከቱዋ ታን የደርሳ ኦይቃድ፤

ታን ኡንቱንታ ይሰናን ደኣደ ጉየ ስማበይከ።

38 ታን ኡንቱንታ ላኤን ደንደናዳን ሾጫድ፤

ኡንቱንቱ ታ ገድያን ኩንዴድኖ።

39 ኦላዉ ታና ዎልቃ ዳንጭሳዳ፤

ታናና ጋዳትያዋንታ ታዉ ጉልባትሳዳ።

40 ታ ሞርከቱዋ ታ ስንፐ ጉየ ባቃትሳዳ፤

ታና እጽያዋንታ ታን ይሳድ።

41 ባረንታ ማዳና ማላ ዋሴድኖ፥

ሽን ኦንነ ኡንቱንታ አሽቤና።

መና ጎዳካ ኡንቱንቱ ጼሴድኖ፥

ሽን እ ኡንቱንቶ ኮይቤና።

42 ጫርኩ ፕቲደ አፍያ ባናዳን ታን ኡንቱንታ ሊቅሳድ፤

ኦግያን ደእያ ኡርቃዳንካ ኡንቱንታ የድ።

43 ማካላ አሳፐ ታና አሻዳ።

ታና ካዉተቱዋ ቦላን ሱንዳ፤

ታን ኤረና አሳይ ታዉ ሞደቴዳ።

44 ኡንቱንቱ ታ ዎርያ ስሲደ፥ ታዉ አዛዘቲኖ፤

አላጋ ደረ አሳይካ ታ ስንን ሆኪኖ።

45 ኡንቱንቱ ዎዛና ካሃ አጊኖ።

ባረንቱ ናገትያ ሚጻፐ ኮኮሪደ ዪኖ።

46 መና ጎዳይ ደኤ!

ጾሳይ፥ ታ ዎጋ ዛላይ ጋላተቶ!

ታና አሽያ ጾሳይ ቁ ቁ ጎ!

47 እ ታ ሀሉዋ ከስያ ጾሳ፤

ካዉተቱዋ ታፐ ጋርሳና ሞድስያዋ፤

48 ታ ሞርከቱዋፐ ታና አሽያዋ።

አቤት ጾሳዉ፥ ኔን ታናና ጋዳትያዋንቱ ቦላን

ታና ቁ ቁ ኦሳ፤

ማካላንቻ አሳቱዋፐ ኔን ታና አሻሳ።

49 ሄዋ ድራዉ፥ ታን ኔና ካዉተቱዋ ግዶን ጋላታና፤✝18:49 ሮመ 15:9

ታን መና ጎዳ ሱን ሳባና።

50 ጾሳይ ባረ ካትያዉ ጾኑዋ ቦላን ጾኑዋ እሜ።

ባረ ኦኬዳ፥ ዳዊተዉነ አ ዘረዉ፥

ሎኦተ መናዉ በሴ።