ዛማረቱዋ ካፖ የጸቴዳ፥ ዳዊታ ማዝሙርያ። ዎንታ ጉራ "ገንእያ" የዳን የጸቴዳ ዳዊታ ማዝሙርያ

1 ታ ጾሳዉ፥ ታ ጾሳዉ፥ ታና አያዉ አጋዲ?✝22:1 ማቶሳ 27:46፤ ማር. 15:34

ታና ማዳ ጋደ ታን ነዉ ዋትዋትያ ዎደ፥

አያዉ ታፐ ሃካይ?

2 አቤት ታ ጾሳዉ፥ ጋላሳን ኡባን ታን ነዉ ዋሳይ፤

ሽን ኔን ታዉ አላካ።

ቃማን ኡባንካ ነዉ ዋሳይ፥

ሽን ዎፓ ደምከ።

3 ግዶፐነ፥ ኔን ጌሻ።

እስራኤልያ ጋላታይ ነ አራታ ዩሹዋን ደኤ።

4 ካሰ ኑ አዎቱ ኔናን አማነቴድኖ፤

ኔናን አማነትና፥ ኔን ኡንቱንታ አሻዳ።

5 ነዉ ዋሲደ አቴድኖ፤

ኔናን አማነቲደ ዬላትበይክኖ።

6 ሽን ታን አሳ ግድከ፤ ታን ጉጹንያ።

ታን አሳን ካተዳዋነ ቅሊጨቴዳዋ።

7 ታና በእያ ኡባቱ ቅኖ፤✝22:7 ማቶሳ 27:39፤ ማር. 15:29፤ ሉቃሳ 23:35

ኡንቱንቱ ታና ጽት ጼሊኖነ ባረንቱ ሁጲያ ቃኖ።

8 ያቶፐ፥ "እ መና ጎዳን አማነቴዳ፤✝22:8 ማቶሳ 27:43

አያዉ አ አሸኔ?

መና ጎዳይ አ ዶሶፐ፥

አነ አ አሾ" ያጊኖ።

9 ግዶፐነ፥ ታና ታ አት ኡሉዋፐ ሱረ የልሴዳዌ ኔና፤

ታ አት ን ምያ ዎደካ ታን አማነታናዳን ኦዳ።

10 ታን የለቶደፐ ዶማደ ኔናን ድጫድ፤

ታ አት ኡሉዋፐ ዶማደካ፥ ኔን ታ ጾሳ።

11 መቱ ታኮ ማትያ ድራዉነ

ታና ማድያዌ ባይና ድራዉ፥

ሀእ ኔን ታፐ ሃኮፓ።

12 ዳሮ ሞርከቱ ኮሩማ ቦራቱዋዳን ታና ዶዲኖ፤

ቃይጭያ ባሳነ ቢታ ቦራቱዋዳን ታና ዶዲኖ።

13 መንሬያነ ጉድያ ጋሙዋዳን

ባረንቱ ዶና ታ ቦላ ሀንጊኖ።

14 ታን ሃዳን ጎጋድ፤

ታ መቀቱ ባረንቱ ኩሻፐ ኮለቴድኖ።

ታ ዎዛናይ ኤሳ ሙቃዳ ማላ፥

ታ ግዶን ሴር ዉሬ።

15 ታ ቆ ኮንኣዳን መሌ፤

ታ እንጻርሳይ ኮክያና ኦይቀቴ።

ኔን ታና ሀይቄዳ አሳዳን ባናን የጋዳ።

16 ካናቱ ታና ተኤድኖ፤

ኢታ አሳቱ ታ ዩሹዋን ዶዴድኖ።

ታ ኩሸቱዋነ ታ ገደቱዋ ጫዲኖ።

17 ታ መቀቱዋ ኡባ ታን ፓይዳይ።

ታ ሞርከቱ ታና ጼሊኖነ ደረቂኖ።

18 ታ ማዩዋ ሻክ አኪኖ፤✝22:18 ማቶሳ 27:35፤ ማር. 15:24፤ ሉቃሳ 23:34፤ ዮሃ. 19:24

ታ አዱሳ ማዩዋን ሳማ የጊኖ።

19 አቤት መና ጎዳዉ፥ ኔን ታፐ ሃኮፓ።

አቤት ታ ዎልቃዉ፥ ታና ማዳናዉ ኤለካ ሃያ።

20 ታና ማሻፐ አሻ፤

ታ አልኦ ደእያ ካናቱዋ ዎልቃፐ አሻ።

21 ጋሞቱዋ ዶናፐ ታና አሻ፤

ቃይጭያ ባዙዋ ቦራቱዋ ካጭያፐ ታና ናጋ።

22 ታን ነ ሱን ታ እሻቶ ኦዳና፤✝22:22 እብራ. 2:12

ማባራ ሺቁዋንካ ኔና ጋላታና።

23 ህንተኖ፥ መና ጎዳዉ ያይያዋንቶ፥ አ ጋላትተ።

ህንተኖ፥ ያቆባ ዘረቶ፥

ኡባይካ አ ቦንችተ።

ህንተኖ፥ እስራኤልያ ዘረቶ፥

ኡባቱካ ቦንቹዋን አዉ ያይተ።

24 እ ናቀቴዳዋንታ ካና፤

ኡንቱንታ ጋኬዳ ቆሁዋ ታዉ አይ መቴ ጌና።

ባረ ሶምኡዋ ኡንቱንቱፐ ገንና፤

ሽን ኡንቱንቱ ማዶ አኮ ዋስያ ዎድያን፥

ኡንቱንቱ ዋሱዋ ስሴ።

25 ታን ኔን ኦዳ ሎኦ ኦሱዋ ድራዉ፥

ኩንዳ ሺቁዋን ጋላታና።

ታን ሺቀቴዳዋ ነዉ ያይያ አሳ ስንን ጋና።

26 ህዬሳቱ ሚደ ካላና።

መና ጎዳ ኮይያዋንቱ አ ጋላታና።

ኡንቱንቱ መናዉ ደአና።

27 ሳኣ ጋጻ ጋካናዉ አሳይ ኡባይ

ሀሳዪደ፥ መና ጎዳኮ ስማና።

አሳ ዛረ ኡባይ አዉ ጎይናና።

28 አያዉ ጎፐ፥ ካተትያ ማታይ መና ጎዳዋ፤

ካዉተቱዋ እ ሞዴ።

29 ሳኣን ደእያ ዱረ አሳቱ ኡባይ

አዉ ጎይናና።

ባረንታ ሀይቁዋፐ አሻናዉ ዳንዳየናዋንቱነ

ባናዉ ላመትያዋንቱ ኡባቱ አዉ ጉልባታና።

30 ይያ ዘረይ አዉ ኪተታና፤

አሳይ ጎዳ ኦሱዋ ይያ የለታዉ ኦዳና።

31 ብሮ የለትቤና አሳይካ አ ጽሎተ ኦዳና።

"ጾሳይ ባረ አሳ አሼዳ" ያግያዌ ኦደታና።