ዳዊተ ማዝሙርያ25:0 ቆፐናባይ ጋክያ ዎደ ሺቅያ ዎሳ።
1 አቤት መና ጎዳዉ፥
ታ ሸምፑዋፐ ኔና ዎሳይ።
2 አቤት ታ ጾሳዉ፥ ታን ኔናን አማነታይ፤
ታና ዬላዮፓ፤ ታ ሞርከቱዋ ሀይ ከሶፓ።
3 ኔናን ሂዶታ ኦያዋንቱ ዬላትክኖ፤
ሽን ጋሱ ባይናን ገንያዋንቱ ዬላታና።
4 አቤት መና ጎዳዉ፥ ታና ነ ኦግያ በሳ፤
ነ ኦግያ ታና ታማርሳ።
5 ኔን ታና አሽያ ጾሳ ግድያ ድራዉ፥
ነ ቱማተን ታና ካለነ ታማርሳ።
ጋላሳ ኩመንን ታን ኔናን ህዶታ ኦይ።
6 አቤት መና ጎዳዉ፥ በኒደፐ ደእያ ነ ቃረታነ
ነ ኬካተ ሀሳያ።
7 ታ ያላጋተ ናጋራነ ባይዙዋ ሀሳዮፓ።
አቤት መና ጎዳዉ፥
ነ ኬካተነ ሎኦተ ሀሳያ።
8 መና ጎዳይ ኬካነ ሱረ፤
ሄዋ ድራዉ፥ ናጋራንቻቱዋ ባረ ኦግያ ታማርሴ።
9 አሽከቱዋ ሱረተን ካለ፤
አሽከቱዋ ባረ ኦግያ ታማርሴ።
10 መና ጎዳ ጫቁዋነ አ አዋዩዋ ናግያዋንቶ
አ ኦጊ ኡባይ ቱማተነ ኬካተ።
11 አቤት መና ጎዳዉ፥ ታ ናጋራይ ሎይ ዳራ፤
ግዶፐካ፥ ነ ሱን ድራዉ፥ አቶ ያጋ።
12 መና ጎዳዉ ያይያ አሳይ ኦኔ?
እ ዶሪደ ካላና ኦግያ ጾሳይ አ ታማርሳና።
13 እ ኡባ ገደካ ሎኦ ደኡሳ ደአና፤
አ ዘረቱ ቢታ ላታና።
14 መና ጎዳይ ባረዉ ያይያዋንቶ፥
ባረ ጹራ ሻክያዋ፤
እ ኡንቱንቶ ባረ ጫቁዋካ ቆንጭሴ።
15 መና ጎዳይ ታ ገድያ ጲርያፐ ከስያ ድራዉ፥
ታ አይፊ ማዶ ኡባ ገደ አኮ ጼሌ።
16 ጾሳዉ፥ ታን ታረካ ደእያ ቆሄቴዳ አሳ ግድያ ድራዉ፥
ሃ ታኮ ስማ፤ ነ ማሮተ ታና በሳ።
17 ታዉ ህርጋይ ዳሬዳ፤
ታ መቱዋፐ ታና ኔን ዎዛ።
18 ታ መቱዋነ ታ ቱጋ ኔን በአ።
ታ ናጋራ ኡባ አቶ ጋ።
19 ታ ሞርከቱ አይ ኬሻ ዳሬደንቶነ በአ፤
ኡንቱንቱ ታና ዎናዳን እጽያዋ ጼላ።
20 ኔን ታና ናጋ፤ ኔን ታና አሻ፤
ታን ኔኮ ባቃቴዳ ድራዉ፥ ታና ዬላዮፓ።
21 ታን ኔናን ሂዶታ ኦዳ ድራዉ፥
ሱረተይነ ቱማተይ ታና ናጎ።
22 አቤት ጾሳዉ፥ እስራኤልያ አሳ
ኡንቱንቱ መቱዋ ኡባፐ ኔን አሻ።