ማርያ ጾሳ ሳቡሳ
1 ህንተኖ፥ ጽሎቶ መና ጎዳዉ ናሸቻን የጽተ፤
ሱረ አሳቱ አ ጋላታናዉ በሴ።
2 ማስንቁዋ ዲጺደ፥
መና ጎዳ ጋላትተ፤
ታሙ ባቀን ዋጸቴዳ ዲካ አዉ ዲጽተ።
3 ኦራ የ የጽተ፤
ሎይ ዲጺደ፥ ቃላ ቂሲደ የጽተ።
4 መና ጎዳ ቃላይ ሱርያ፤
እ ኦያ ኦሱዋ ኡባይ አማነትያዋ።
5 መና ጎዳይ ጽሎተነ ቱሙ ፕርዳ ዶሴ፤
አገና አ ሲቁ ሳኣ ኩሜዳ።
6 መና ጎዳ ቃላን ሳሎቱ መቴድኖ።
አ ዶናፐ ከስያ ሸምፑዋን
ኡንቱንቱን ደእያ መታቱካ ኦሰቴድኖ።
7 ዎልቃማ አባ ሃ እ እትሳን ኤልሴዳ፤
ሄ ጪሞ ሃ ምንጃ ሳን ዜሬዳ።
8 ሳኣ ኡባይ መና ጎዳ ያዮ፤
ሳኣን ደእያ አሳይ ኡባይ አ ቦንቾ።
9 አያዉ ጎፐ፥ እ ሃሳይና ሀኔዳ፤
እ አዛዝና፥ ምኒደ ኤቄዳ።
10 መና ጎዳ ኤረና ካዉተቱዋ ዞረታ ጾሳይ ላሌ፤
ኡንቱንቱ ሀልቹዋካ መላ ከሴ።
11 መና ጎዳ ሀልቹ መናዉ ኤቂደ ደኤ፤
አ ዎዛና ቆፋይካ የለታ ኡባ ጋካናዉ ደኤ።
12 ጾሳይ መና ጎዳ ግዴዳ ካዉተይ፥
እ ባረሳ ኦደ ዶሬዳ አሳይ አንጀቴዳዋ።
13 መና ጎዳይ ሳሉዋና ዱገ ጼሊደ፥
አሳ ኡባ በኤ።
14 ጾሳይ ባረ ደኢያሳፐ ሳኣን ደእያ ኡባ ጼሌ።
15 እ ኡንቱንቱ ኡባ ዎዛና መዳ፤
ኡንቱንቱ ኦያዋ ኡባ ኤሬ።
16 ካቲ ባረ ዎታዳራ ጮራተን አተና፤
ኦላንቻይ ባረ ዎልቃ ምኖተን ከስ አከና።
17 ኦላ ፓራይ ጾንሳና ጊደ ናግያዌ መላ፤
እ ባረ ዎልቃ ምኖተን አሻናዉ ዳንዳየና።
18 መና ጎዳ አይፈቱ አዉ ያይያነ
አገና አ ሲቁዋን ህዶታ ኦያ አሳቱዋ ቦላና።
19 ሄዌነ፥ ኡንቱንታ ሀይቁዋፐ አሻናሳነ
ኮሻ ዎድያን ፓጻ ዎናሳ።
20 ኑን መና ጎዳን ህዶታ ኦቶ፤
እ ኑና ማድያዋነ ኑ ጎንዳልያ።
21 ኑን አ ጌሻ ሱንን አማነትያ ድራዉ፥
ኑ ዎዛናይ አን ናሸቴ።
22 አቤት መና ጎዳዉ፥
ኑን ኔናን ህዶታ ኦያዋዳን፥
አገና ነ ሲቁ ኑናና ግዶ።