1 ታን መና ጎዳ ኡባ ዎደ ጋላታና፤

አ ጋላታይ አይ ዎደነ ታ ዶናፐ ፓጨና።

2 ታን መና ጎዳን ጬቀታይ፤

ናቀቴዳዋንቱ ሄዋ ስሲደ ናሸትኖ።

3 ታናና ግዲደ፥ መና ጎዳ ግታይተ።

አነ እትፐ አ ሱን ቁ ቁ ኦይተ።

4 ታን መና ጎዳ ኮያድ፤

እ ታዉ ዛሬዳ፤

ታን ያይያዋ ኡባፐ ታና እ አሼዳ።

5 ኔኮ ጼልያዋንቱ ናሸቲኖ፤

ኡንቱንቱ ሶምኢ ኡባካ ዬላተና።

6 ሀ ህዬሳ ብታኒ ዋሴዳ፤

መና ጎዳይ አ ዋሱዋ ስሴዳ፤

አ መቱዋ ኡባፐ አ አሼዳ።

7 መና ጎዳ ኪታንቻይ አ ያይያ አሳቱዋ ናጌ፤

እ ኡንቱንቱ ዩሹዋን ግዲደ፥ ኡንቱንታ አሼ።

8 መና ጎዳይ ኬካ ግድያዋ ጼል በእተ።✝

አኮ ባቃትያ አሳይ አንጀቴዳዋ።

9 ህንተኖ፥ አ ጌሻ አሳቶ፥ መና ጎዳዉ ያይተ፤

አያዉ ጎፐ፥ አዉ ያይያ ኡባቶ አያይነ ፓጨና።

10 ጋሞቱካ ምያዌ ይና ኮሻቲኖ፤

ሽን መና ጎዳ ኮይያዋንቶ ሎኦባይ ፓጨና።

11 ታ ታማረቶ፥ ሃ ዪተ፤ ስስተ፤

መና ጎዳ ያሻ ታን ህንተና ታማርሳና።

12 ሎኦ ደኡዋ ደአናዉነ

ኬካባ በአና ማላ፥✝

ባረ ላይይ አዱቃናዉ ኮይያ አሳይ ኦኔ?

13 ነ እንጻርሳይ ኢታባ ሃሳየናዳን፥

ነ ዶናይካ ጭሜናዳን ተአ።

14 ኢታፐ ሻከታ፤ ሎኦባ ኦ፤

ሳሮተ ሎይ ኮያደ ካላ።

15 መና ጎዳ አይፊ ጽሎቱዋኮ ጼሌ፤

ቃይ አ ሀይይካ ኡንቱንቱ ዋሱዋ ሀይዜ።

16 ኡንቱንታ ሀሳይስያዋ ቢታፐ ይሳና ማላ፥

መና ጎዳይ ኢታ ኦያዋንታ፥

ባረ ሀንቁዋ ሶምኡዋን ጼሌ።

17 ጽሎቱ ዋሲኖ፤

መና ጎዳይ ኡንቱንቱ ዋሱዋ ስሴ።

እ ኡንቱንቱ መቱዋ ኡባፐ አሼ።

18 መና ጎዳይ ዎዛናይ መኤዳዋንቶ ማታና፤

ቃይ ባረንቱ ህዶታ ቃንጼዳዋንታ አሼ።

19 ጽሎ አሳ መቱ ዳራ፤

ሽን መና ጎዳይ አ ሄ ኡባፐ አሼ።

20 ጾሳይ አ ምን ናግያ ድራዉ፥✝

አ መቀፐ እቱነ መኤና።

21 ኢታቱዋ ኢታተይ ዎና፤

ጽሎቱዋ እጽያዋንቱ ፕርደታና።

22 መና ጎዳይ ባረ ቆማቱዋ አሼ።

አኮ ባቃቲደ ኦንነ ፕርደተና።