Salmos 62

ህዶታይ ጾሳ ቦላ ጻላላን

ዳዊተ ዛማረቱዋ ካፑዋ ጁዱቶ የጼዳ ማዝሙርያ።

1 ጾሳ ጻላላን ታን ሸምፑዋ ደማድ፤

ታ አቶተይ አፐ ዬ።

2 አ ጻላላይ ታ ዛላነ ታ አቶተ፤

እ ታን ቆሰታ አትያ ሳኣ ግድያ ድራዉ፥

አይነ ህርግከ።

3 ዎድያ ጎዳነ ቃጽያ ድርሳ ማላትያ አሳ ዎናዉ፥

ህንተ አዉደ ጋካናዉ ደንዲቴ?

4 ኡንቱንቱ አ ቦንቾ ሳኣፐ

አ ዎናዋ ጻላላ ኮዪኖ፤

ኡንቱንቱ ዎርዱዋን ናሸቲኖ።

ባረንቱ ዶናን አንጂኖ፤

ሽን ባረንቱ ዎዛናን ሸቂኖ።

5 ታ ሸምፓታ ጾሳ ጻላላን ሸምፑዋ ደማዱ፤

ታን ህዶታን ናግያዌ አፐ ዬ።

6 አ ጻላላይ ታ ዛላነ ታ አቶተ፤

እ ታን ቆሰታ አትያ ሳኣ ግድያ ድራዉ፥

አይነ ህርግከ።

7 ታ አቶተይነ ታ ቦንቹ ጾሳና፤

እ ታ ምኖ ዛላነ ታ ጌሱዋ።

8 አሳዉ፥ ኡባ ዎደ ጾሳን አማነትተ፤

እ ኑዉ ጌሱዋ ግድያ ድራዉ፥

ህንተ ዎዛና ቆፋ አዉ ኦድተ።

9 አሳይ ኡባይ እት ገደ ሸምፕያ ጫርኩዋ ማላ፤

ቂና ዝቂና፥ አሳይ መላ።

ሚዛንያን ዎናካ ኡንቱንቱ አይነ ዴጽክኖ፤

ኡንቱንቱ እት ገደ ሸምፕያ ጫርኩዋፐካ ካዉሺኖ።

10 ማካላን ሺሾዋን አማነቶፕተ፤

ዉእ ሺሺደ ዱረታናዉ ሀልቾፕተ።

ህንተ ዱረተይ ዳሮፐካ፥

ህንተ ዎዛና አ ቦላ ዎፕተ።

11 ጾሳይ እት ገደ ኦዴዳ፥ ታን

ላኡ የዉዋ ስሳድ፤ "ዎልቃይ ጾሳሳ።

12 አገና ሲቁ ጎዳዋ" ያጌዳ።✝62:12 ኢዮባ 34:11፤ ኤር. 17:10፤ ማቶሳ 16:27፤ ሮመ 2:6፤ ሳፃ 2:23

አቤት ጾሳዉ፥ ኔን አሳ ኡባዉ

አ ኦሱዋዳን ኦሱዋዳን ዛራና።✝62:121 ሳሜላ 23:14